Read Nzema Aye 36 Bible Online

Aye 36 - Nzema bible

Aye 36

¹Dwuda Belemgbunli Hɛzikaya lile ɛvolɛ bulu nee nna wɔ ebia zo la, Aselea Maanle Maanle Belemgbunli Sɛnakɛlebe vale ɛlɔnema ratetale Dwuda azuamgbole mɔɔ bɛlie nwolɛ bane la kɔsɔɔti na ɔhonle ɔvale bɛ.

²Na akee Aselea belemgbunli ne zoanle ye Safohyenlema Kpanyinli ne manle ɔvale ɛlɔnema dɔɔnwo kpalɛ vi Leekehye rale Belemgbunli Hɛzikaya anwo zo wɔ Gyɛlusalɛm, na bɛrayɛle bɛ azokoɛleɛ wɔ ɛleka mɔɔ menli mɔɔ nwo ndanlɛ la yɛ bɛ gyima la adenle zo. Adenle zɔhane zua kuma ne mɔɔ bɛvu na nzule dua nuhua vi sɔlɔ nzule ne anu ba la.

³Na Hɛzikaya suakunlu ɛkɛ ne mbɔlɔba nsa: Helekaya ara Yilayakem mɔɔ nea suakunlu ɛkɛ ne la, Hyɛbena mɔɔ le kɔɔto kɛlɛhɛlɛvolɛ ne, yɛɛ Esafe ara Dwowaa mɔɔ nea suakunlu ɛkɛ ne ngɛlata zo la rayiale bɛ.

⁴Aselea Safohyenlema Kpanyinli ne zele bɛ kɛ, “Bɛha bɛhile Hɛzikaya kɛ, ‘Aselea Maanle Maanle belemgbunli ne ɛlɛbiza kɛ: Duzu debie yɛɛ bɛ kpundii ɛgyinlanlɛ ne gyi zo a?

⁵Bɛdwenle kɛ bɛfa bɛ nloa tunli a bɛbɔ konle nwo mgbɔlɔka na bɛnyia tumi bɛko a? Nwane a bɛ nye la ɔ nwo zo mɔɔ yemɔti bɛde me nwo atua a?

⁶ Bɛnlea, bɛva bɛ adwenle bɛzɔ Yigyibiti. Ɔdaye mumua ne ɔle baka wulera. Awie mɔɔ kɛva ɔ rɛle kɛwula ye nu la, saa ɔkomo zo a ɔbu ɔwɔ ye. Menli mɔɔ fa bɛ rɛle wula Yigyibiti belemgbunli ne nu la kɛ wie ye la ɛne.’ ”

⁷Aselea kpanyinli ne vale zɔle zolɛ kɛ, “Saa bɛka bɛkile me kɛ, ‘Yɛ rɛle wɔ Ɛdɛnkɛma yɛ Nyamenle ne nu’ a, ɛnee mebiza bɛ kɛ: asoo tɛ ye azukponle a Hɛzikaya ɛzɛkye bɛ wɔ ɛleka ɛleka mɔɔ bɛsonle ye, na yeze Dwudama nee Gyɛlusalɛmma kɛ ɔwɔ kɛ bɛsonle ye wɔ azukponle kokye anwo la ɔ?

⁸Bɛrɛla, bɛ nee me menle Aselea belemgbunli ne ɛrayɛ ngyehyɛlɛ. Saa bɛkɛnyia menli mɔɔ ka mgbɔnwɔ la a anrɛɛ menwɔmaa bɛ mgbɔnwɔ apenle nwiɔ.

⁹Na saa bɛdabɛ mumua ne bɛ rɛle wɔ Yigyibitima anu kɛ bɛkɛmaa bɛ konle ehwili nee menli mɔɔ ka mgbɔnwɔ la a ɛnee kɛ bɛsi bɛte me menle ne safohyenlema ne mɔ anu ekyi ko bɔbɔ anwo atua ɛ?

¹⁰Anzɛɛ bɛnze kɛ Ɛdɛnkɛma asa wɔ nu yɛɛ mera kɛ mebazɛkye maanle ɛhye a? Ɛdɛnkɛma zele me kɛ, ‘Kɔteta maanle ɛhye na sɛkye ye.’ ”

¹¹Na Yilayakem, Hyɛbena, yɛɛ Dwowaa zele Safohyenlema Kpanyinli ne kɛ, “Yɛbodo wɔ, tendɛ Arelameeyeke nu kile wɔ sonvolɛma na yɛte. Mmatendɛ ɛkile yɛ wɔ Dwuda aneɛ nu ɛmaa menli mɔɔ gua bane ye ati zo ɛke la te bie.”

¹²Safohyenle ne buale bɛ kɛ, “Bɛdwenle kɛ bɛ ngome nee bɛ belemgbunli ne ati a me menle ɛzoa me kɛ membanga edwɛkɛ ɛhye mɔ a, na menli mɔɔ gua bane ne ati zo la ɛmboka nwolɛ? Munzule ɛdo bɛ muala, bɛbali bɛ ebinli, bɛanlo bɛ miene.”

¹³Akee Safohyenle ne dwazole gyinlanle na ɔvale Hibulu aneɛ ne ɔhanle ye kpole kpalɛ kɛ, “Bɛdie mɔɔ belemgbunli kpole ne, Aselea belemgbunli ne ɛlɛka ahile bɛ la.

¹⁴Ɔse, ‘Bɛmmamaa Hɛzikaya bɛlɛbɛla bɛ, ɔluakɛ ɔnrɛhola ɔnrɛlie bɛ.’

¹⁵Bɛmmamaa ɔdi bɛ adwenle kɛ bɛva bɛ rɛle bɛwula Ɛdɛnkɛma anu na Ɛdɛnkɛma balie bɛ, na Aseleama ɛnrɛhola ɛnrɛho ɛnrɛva bɛ suakpole ne.

¹⁶Bɛmmatie Hɛzikaya! Aselea belemgbunli ne se bɛ nee ye ɛyɛ anzonudwolɛ ngyehyɛlɛ na bɛvi suakpole ne azo bɛvinde bɛrabɔ bɛ ti aze bɛmaa ye. Bɛyɛ ye zɔhane a ɔkɛmaa bɛ adenle ɔkɛmaa awie biala ɔdaye ɔkɛli ye vanye nee ye feege mbaka zo ma, na bɛanlo bɛdabɛ bɛ bula nu nzule,

¹⁷kɔkpula mekɛ mɔɔ ɔkɛra ɔkɛrava bɛ ɔkɛhɔ azɛlɛ mɔɔ le kɛ bɛ ɛdeɛ ne, na zolɛ le abɛlɛ, nwanye, aleɛ nee vanye egyinli ngome la azo la.

¹⁸Bɛnlea na Hɛzikaya ambɛlɛbɛla bɛ anga kɛ Ɛdɛnkɛma balie bɛ. Maanle maanle dɔɔnwo awozonle angola anlie bɛ anvi Aselea belemgbunli ne asa anu.

¹⁹Heemate nee Aapade awozonle ne mɔ wɔ nienwu? Sifaveeyem awozonle hale nienwu? Asoo bɛholale bɛliele Samɛlea bɛvile ɔ sa nu.

²⁰Awozonle ɛhye mɔ anu boni yɛɛ holale liele bɛ maanle ne mɔ vile Aselea belemgbunli ne asa anu mɔɔ yemɔti bɛse Ɛdɛnkɛma bahola alie Gyɛlusalɛm avi ɔ sa nu a?”

²¹Na Hɛzikaya mbɔlɔba ne mɔ andɛ bɛ nloa anu, ɔluakɛ ɛnee belemgbunli ne ɛze bɛ kɛ, “Bɛmmabua ye.”

²²Akee Yilayakem, Hyɛbena, yɛɛ Dwowaa vale nyane suosuanle bɛ adɛladeɛ mɔɔ bɛwula la anu na bɛziale bɛhɔle Belemgbunli Hɛzikaya ɛkɛ bɛhɔhanle mɔɔ Aselea Safohyenlema Kpanyinli ne hanle la bɛhilele ye.