Read Nzema Aye 37 Bible Online

Aye 37 - Nzema bible

Aye 37

¹Mɔɔ Belemgbunli Hɛzikaya dele edwɛkɛ ne la, nyane ngome manle ɔsuosuanle ye adɛladeɛ mɔɔ ɔwula la anu, ɔvale ɛrele adɛladeɛ ɔwulale na ɔhɔle Ɛdɛnkɛma Ɛzonlenlɛ Sua ne anu.

²Ɔzoanle Yilayakem, mɔɔ nea belemgbunli suakunlu ɛkɛ ne la, kɔɔto kɛlɛhɛlɛvolɛ Hyɛbena, yɛɛ sɛlɛvolɛ mgbanyinli ne mɔ wɔ Nyamenle kpɔmanvolɛ Ayezaya mɔɔ ɔ ze a le Emɔzo la anwo ɛkɛ. Bɛdabɛ noko bɛwulale ɛrele adɛladeɛ a bɛhɔle a.

³Nrɛlaleɛ mɔɔ bɛ nee ye hɔle la a le kɛ, “Belemgbunli Hɛzikaya se yɛraze wɔ kɛ, ‘Ɛnɛ le nyanelilɛ kenle; abule ɛbu yɛ, anyiemgba ɛha yɛ. Yɛyɛ kɛ raalɛ mɔɔ ɛvo awolɛ zo na ɔ nwo ɛbɛlɛ ye, na ɔngola ɔ nwo twe la.

⁴Aselea belemgbunli ne ɛzoa ye Safohyenlema Kpanyinli ne yemaa yerabɔ tease Nyamenle ne aholoba. Medie medi kɛ Ɛdɛnkɛma wɔ Nyamenle ne dele mɔɔ ɔhanle la, na ɔbadea menli mɔɔ hanle la. Yemɔti sɛlɛ Ɛdɛnkɛma maa ye menli ekyi ne mɔɔ ɛha la!’ ”

⁵Belemgbunli Hɛzikaya soanvolɛma ne dwule Ayezaya anwo ɛkɛ ne la,

⁶ɔzele bɛ kɛ, “Bɛha bɛhile bɛ menle kɛ, ‘Ɛdɛnkɛma se: Mmamaa edwɛkɛ mɔɔ wɔde la tu wɔ ahonle kɛ Aselea belemgbunli soanvolɛma ne ɛbɔ me aholoba a.

⁷Nea, mebamaa belemgbunli ne sunsum bie meamaa yeade anzodwɛkɛ bie na yeazia yeahɔ ye maanle nu, na mebamaa yeadɔ dadeɛ nloa wɔ ɔdaye ye maanle nu.’ ”

⁸Aselea Safohyenlema Kpanyinli ne dele kɛ ye belemgbunli ne ɛvi Leekehye, na ɔranwunle kɛ yeva ɛlɔnema ɔ nee Lebenama ɛlɛko.

⁹Akee nrɛlaleɛ dole Aselea belemgbunli ne kɛ Yigyibiti ɛlɔnema mɔɔ Sudan Belemgbunli Tɛheeka a li bɛ ti la ɛlɛba aradoa ye nee ye aho. Aselea belemgbunli ne dele nrɛlaleɛ ne la ɔzoanle menli ɔmanle bɛhɔzele Hɛzikaya

¹⁰kɛ, “Bɛze Dwuda Belemgbunli Hɛzikaya kɛ: Mmamaa wɔ Nyamenle ne mɔɔ wɔva ɛ rɛle wɔwula ye nu la bɛlɛbɛla wɔ na ɔka kɛ bɛnrɛye Gyɛlusalɛm bɛnrɛmaa medame Aselea belemgbunli.

¹¹Nea, wɔde mɔɔ Aselea arelemgbunli ɛva ɛyɛ maanle maanle dɔɔnwo na bɛzɛkye bɛ bɔkɔɔ la. Ɛdwenle kɛ ɛkɛvi ɛsalɛ ɔ?

¹²Asoo maanle maanle ne mɔ awozonle holale liele bɛ vile egya mɔ asa anu? Me mgbanyima zɛkyele azuamgbole Gozan, Hɛlan, yɛɛ Rilezɛfe na bɛhunle Bɛtɛdɛn amra mɔɔ de Tɛlasaa la.

¹³Arelemgbunli mɔɔ wɔ azuamgbole Heemate, Aapade, Sifaveeyem, Hina, yɛɛ Ayeva la wɔ nienwu?”

¹⁴Belemgbunli Hɛzikaya liele kɛlata ne mɔɔ soanvolɛma ne nee ye rale la na ɔgengale. Akee ɔhɔle Ɛdɛnkɛma Ɛzonlenlɛ Sua ne anu na ɔvale kɛlata ne ɔdole Ɛdɛnkɛma anyunlu ɛkɛ,

¹⁵na ɔzɛlɛle Ɛdɛnkɛma kɛ,

¹⁶ “O Tumivolɛ Ɛdɛnkɛma, Yizilayɛ Nyamenle mɔɔ ɛde wɔ belemgbunli ebia nu wɔ abɔdeɛ ne mɔ mɔɔ lɛ ndɛbalɛ la azo anwuma a; ɛ ngomekye ala a ɛle Nyamenle mɔɔ sie arelemgbunli maanle maanle mɔɔ wɔ aleɛabo la a. Ɛdawɔ a ɛbɔle azɛlɛ ye nee anwuma a.

¹⁷O Ɛdɛnkɛma, yɛ ɛnzonlɛ na tie; O Ɛdɛnkɛma, buke ɛ nye nea na tie edwɛkɛ mɔɔ Sɛnakɛlebe ɛva ɛzoa kɛ bɛva bɛrabɔ tease Nyamenle ne aholoba la.

¹⁸O Ɛdɛnkɛma, ɔle nɔhalɛ kɛ Aselea arelemgbunli ɛzɛkye maanle maanle dɔɔnwo, ɛbɔ bɛ bo zo,

¹⁹na bɛvuandi bɛ awozonle ne mɔ bɛgua senle nu bɛyela bɛ, ɔluakɛ bɛnle nyamenle, bɛle menli asa anloa gyima, mbaka nee awolɛ; yemɔti a bɛzɛkyele bɛ a.

²⁰Yemɔti kɛkala, O Ɛdɛnkɛma yɛ Nyamenle, die yɛ fi ɔ sa nu, amaa ewiade maanle maanle kɔsɔɔti anwu kɛ ɛ ngomekye ala a ɛle Ɛdɛnkɛma a.”

²¹Akee Ayezaya zoanle manle bɛhɔzele Belemgbunli Hɛzikaya kɛ, “Ɛdɛnkɛma, Yizilayɛ Nyamenle ne se, ‘Mede wɔ nzɛlɛlɛ ne mɔɔ fane Aselea Belemgbunli Sɛnakɛlebe anwo la.’

²²Na kɛ medame Ɛdɛnkɛma mese la ɛne: Sɛnakɛlebe, Gyɛlusalɛm suakpole ye azo amra ɛmbu wɔ bie, bɛsele wɔ ala.

²³Nwane a wɔgolo ɔ nwo, wɔyɛ ye aholoba la? Nwane a wɔmaa ɛ nloa ɛdo ye na wɔholoholo ɛ nye wɔhile ye la? Wɔyɛ wɔtia medame Yizilayɛ Nwuanzanwuanza Ko ne!

²⁴Wɔzoa wɔ sonvolɛma wɔmaa bɛrazi me amgbu na wɔha kɛ wɔva wɔ konle ehwili dɔɔnwo wɔli Lɛbanɔn awoka mgbole nwo zo konim. Ɛdule ɛ nloa anu kɛ ɛbubule ɛkɛ ne sida mbaka mgbole mɔɔ le ndendenle, nee ɛkɛ ne sepelɛse mbaka ngɛnlɛma ɛguale, na ɛwolole ɛhɔle ye kpɔkɛmile nu, ɛvole ɛkɛ ne boka tendenle kpalɛ ne.

²⁵Ɛvale ɛdule ɛ nwo kɛ ɛbɔle bula dɔɔnwo na ɛnlonle nuhua nzule, yɛɛ wɔ ɛlɔnema vale bɛ gyakɛ venle Yigyibiti Azule Naele ne manle ɔsesanle.

²⁶“Asoo ɛtɛtele kɛ mengyehyɛle ɛhye mendole ɛkɛ ne dɛba, yɛɛ memaa yeyɛ zɔhane a? Memanle wɔ anwosesebɛ kɛ ɛva ɛbutubutu azuamgbole mɔɔ bɛbɔ nwolɛ bane la anye aze ɛyɛ bɛ azuadu.

²⁷Memanle menli mɔɔ ɛnee wɔ azua zɔhane mɔ azo la asa anu tutole, bɛ anwosesebɛ wiele na bɛ adwenle zɛkyele. Bɛyɛle kɛ ɛya nu ndile bɛtɛbɛtɛ bie anzɛɛ ndile mɔɔ ɛfifi sua ti zo la. Ɔkawie nyi la ɛnee yenwoso.

²⁸“Meze wɔ tɛnlabelɛ nu, wɔ ɛhɔlɛ nee wɔ ɛralɛ nu, nee me nwo ɛya mɔɔ wɔva, nee mgbane mgbane mɔɔ wɔdendɛ wɔtia me la.

²⁹Kɛmɔ wɔva me nwo ɛya kpole na wɔ mgbole ɛhehanlɛ ne ɛdwu me nzo nu la, mebava me koba ne meazɔ ɛ bonyi, meava kɔleɛ meatosa ɛ kɔmenzia na meaziane wɔ meamaa wɔava adenle ne mɔɔ ɛvale zolɛ ɛrale la azo wɔahɔ.”

³⁰Na Ayezaya hanle hilele Belemgbunli Hɛzikaya kɛ, “Mɔɔ bazi la anwo sɛkɛlɛneɛ ɛne: ɛvolɛ ɛhye nee ɛvolɛ bieko, bɛbali ma mɔɔ bɛ ngome bɛfifi la, na ɛvolɛ ne mɔɔ tɔ zolɛ nsa la anu, bɛbazo ɛya bɛalua na bɛabu; bɛbayɛ vanye egyinli na bɛali zolɛ ma ne bie.

³¹Bɛdabɛ Dwudama ekyi ne mɔɔ bɛbavi ɛsalɛ la abo bazɔ ndinli bieko na bɛazo ma.

³²Menli baha Gyɛlusalɛm nee Zayɔn Boka, ɔluakɛ Tumivolɛ Ɛdɛnkɛma ɛhulo kɛ ɔkɛyɛ ye zɔhane.

³³“Zɔhane ati, mɔɔ Ɛdɛnkɛma ɛha mɔɔ fane Aselea belemgbunli ne anwo la ɛne: Ɔ gyakɛ ba ɛnrɛtia suakpole ɛhye azo, yɛɛ ɔnrɛdo ɛda ko bɔbɔ wɔ zolɛ. Ɔnrɛva ɛlɔnema mɔɔ dedɛ bɛ sa nu enyinlike la ɔnrɛbikye suakpole ne, yɛɛ ɔnrɛra kɛ ɔfa ɛlɔnema yearabɛnra suakpole ye yeayia.

³⁴Adenle ne mɔɔ ɔvale zolɛ ɔrale la, zɔhane adenle ne ala yɛɛ ɔbava zolɛ yeazia yeahɔ a. Ɔnrɛra suakpole ɛhye azo. Medame Ɛdɛnkɛma a mese a.

³⁵Ɔluakɛ mebalie suakpole ye ati na mealie ye wɔ medame nee me sonvolɛ Devidi ati.”

³⁶Ɛdɛnkɛma soanvolɛ ne hɔle Aselea ɛlɔnema azokoɛleɛ ne na ɔhɔhunle bɛ nuhua apenle ngoko ɛya ko abulatwɛ nee nnu. Mɔɔ menli dwazole nwonlomɔ mangyee ne la ɛnee bɛ kɔsɔɔti bɛ avunli gua ɛkɛ.

³⁷Akee Aselea Belemgbunli Sɛnakɛlebe ziale hɔle ye sua zo na ɔhɔdɛnlanle Nenɛvɛ.

³⁸Na mɔɔ ɔwɔ ye bozonle Nezelɔko amonle sua ne anu ɔlɛsonle la, ɔdaye ɔ mra mrenya, Adelamɛlɛke nee Hyalizɛ vale dadeɛ rahunle ye na bɛnriandile bɛhɔle Arelalate maanle nu. Na ɔ ra nrenya Yisaahadɔn lile ye agya ziele maanle ne.