Read Nzema Aye 39 Bible Online

Aye 39 - Nzema bible

Aye 39

¹Mekɛ ne ala anu, Babelonia Belemgbunli Mɛlodake Baladan, mɔɔ ɔ ze bɛfɛlɛ ye Baladan la dele kɛ Belemgbunli Hɛzikaya anwo dole ye na yede kpɔkɛ la, ɔvale kɛlata nee ahyɛlɛdeɛ ɔzoanle kɛ bɛva bɛhɔmaa ye.

²Hɛzikaya liele menli mɔɔ bɛzoanle bɛ la gyɛlɛɛnye na ɔvale ye anwonyia muala, ye dwɛtɛ fufule, ezukoa nvutuke, aledonlɛ ninyɛne evuanlɛ, nwole evuanlɛ, yɛɛ ye ɛlɔne ninyɛne kɔsɔɔti, debie biala mɔɔ wɔ ye konle ninyɛne ɛzielɛ ɛleka ne la ɔhilele bɛ. Debie biala ɛnle ye suakunlu ɛkɛ anzɛɛ ye maanle ne anu mɔɔ yeanva yeangile bɛ a.

³Na Nyamenle kpɔmanvolɛ Ayezaya hɔle Belemgbunli Hɛzikaya ɛkɛ ne hɔbizale ye kɛ, “Menli ɛhye mɔ vi nienwu a rale a, yɛɛ bɛ amaneɛ se duzu?” Hɛzikaya buale kɛ, “Bɛvi maanle bie anu moa moa a bɛrale a; bɛvi Babelonia.”

⁴Ayezaya bizale ye kɛ, “Yɛɛ duzu debie a bɛnwunle ye wɔ wɔ suakunlu ɛke a?” Hɛzikaya buale kɛ, “Bɛnwu debie biala mɔɔ wɔ suakunlu ɛke la. Meanva ɛhwee meanvea bɛ.”

⁵Na Ayezaya zele belemgbunli ne kɛ, “Tie, Tumivolɛ Ɛdɛnkɛma se:

⁶Mekɛ bara mɔɔ bɛbarahwe debie biala mɔɔ wɔ suakunlu ɛkɛ nee debie biala mɔɔ wɔ mgbanyima ɛgyakyi wɔ la bɛahɔ Babelonia. Bɛnrɛgyakyi wɔ ɛhwee.

⁷ Ɛdawɔ ɛ bo zo amra fɔɔnwo ne, bɛbahye bie mɔ nuokɛ bɛahɔ, bɛaza bɛ, na bɛamaa bɛazonle Babelonia belemgbunli suakunlu ɛkɛ.”

⁸Belemgbunli Hɛzikaya dele ɛhye abo kɛ ɔ nwo badɔ ye, ɔ nzo nu adwo ye wɔ mekɛ mɔɔ ɔde aze la, yemɔti ɔbuale Ayezaya kɛ, “Nrɛlaleɛ mɔɔ ɛ nee ye vi Ɛdɛnkɛma ɛkɛ ne ɛra la ɛnle ɛtane.”