Read Nzema Aye 4 Bible Online

Aye 4 - Nzema bible

Aye 4

¹Mekɛ zɔhane dwu a, mraalɛ nsuu bahɔzɔ nrenya ko na bɛaze ye kɛ, “Yɛdayɛ yɛbali yɛ nloa anu ndɔnie, yɛadɔ yɛ ndanlɛ yɛaheda; wɔmɔ fa wɔ duma to yɛ nwo zo ala na ye anyiemgba ne fi yɛ nwo zo.”

²Mekɛ ne anu Ɛdɛnkɛma mbaka ne mɔ ngane bayɛ mgbole ngɛnlɛma. Yizilayɛma mɔɔ baha la anye balie mbaka ne nee bɛ nzoleɛ ne mɔ anwo.

³Na awie biala mɔɔ ɛha Zayɔn na ɔde Gyɛlusalɛm na bɛhɛlɛ ye duma wɔ Gyɛlusalɛm ngoane buluku ne anu la, bɛbavɛlɛ ye sonla mɔɔ anwo te.

⁴Mekɛ ne anu Awulae bava ye ɛyelalɛ sunsum ne nee ye ndɛnebualɛ tumi ne abia Gyɛlusalɛmma anwo evinli ne amuala, na yeanrinzi mogya mɔɔ bɛha bɛgua Gyɛlusalɛm la amuala.

⁵ Akee Ɛdɛnkɛma bamaa Zayɔn Boka ɛleka biala ayɛ amungu kumɔɔnwo aheda ye menli mɔɔ ɛyia la anwo zo wɔ alehyenlɛ nu, na yeayɛ esike nee sendɔlɔra wɔ nɔɔzo. Ɔluakɛ ye anyunlunyia ne bayɛ kɛ ɛdanlɛ abo kpɔda aheda bɛ muala bɛ nwo zo.

⁶Ɔbayɛ alubo yeamaa bɛ alehyenlɛ nu na bɛande wuluwulu ne, yɛɛ ɔbayɛ ɛvealeka nee ebuo wɔ ezule nee ahumu mekɛ nu.