Read Nzema Aye 40 Bible Online

Aye 40 - Nzema bible

Aye 40

¹Yɛ Nyamenle ne se, “Bɛkyekye me menli ne arɛle, bɛkyekye bɛ rɛle.

²Bɛdendɛ bɛtɛɛ bɛhile Gyɛlusalɛmma, na bɛdea nu bɛze bɛ kɛ bɛ ɛbɛla nu konle ne ɛwie; bɛva bɛ ɛtane bɛhyɛ bɛ. Na mɔɔ bɛ ɛtane ne mɔ ati bɛminlinle ye la Ɛdɛnkɛma bamaa bɛanyia ye mɔnwo.”

³ Ɛnelɛ bie tea nu: “Bɛdu adenle wɔ fienemgbole nu lɔ bɛmaa Ɛdɛnkɛma! Bɛdenrɛ adenle ne mɔɔ la ɛsɛlɛ ne azo la bɛmaa yɛ Nyamenle ne.

⁴Bɛdua bɔnza biala na bɛze awoka mgbole nee ngyikyi ne mɔ; bɛduodua azɛlɛ nwo ahuma ne mɔ, na bɛyɛ ɛleka ahuhunduu ne mɔ sɛlɛsɛlɛ.

⁵Na Ɛdɛnkɛma anyunlunyia ne bala ali, ɛnyelɛ kɔsɔɔti banwu ye. Ɛdɛnkɛma ɔdaye a ɔse a.”

⁶ Ɛnelɛ bie se, “Tea nu bɔ nolo ne!” Membizale kɛ, “Duzu nolo a membɔ a?” Ɔzele kɛ, “Bɔ nolo kɛ menli kɔsɔɔti le kɛ ndile, bɛ kɛnlɛma kɔsɔɔti le kɛ ɛbɔ nu ndotolo.

⁷Ndile nwoso, ndotolo kɛnlɛma kpa, mekɛ mɔɔ Ɛdɛnkɛma kɛmaa ye anwoma ne kɛbɔ bɛ la. Nɔhalɛ, menli le kɛ ndile la.

⁸Ɛhɛe, ndile nwoso, ndotolo kɛnlɛma kpa, noko Nyamenle edwɛkɛ ne bagyinla ɛkɛ dahuu.”

⁹O, wɔmɔ mɔɔ ɛlɛ amaneɛ fɛlɛko ɛbabɔ Zayɔn a, fo kɔ boka tendenle ne azo; wɔmɔ mɔɔ ɛlɛ amaneɛ fɛlɛko ɛbabɔ Gyɛlusalɛm a, fa wɔ anwosesebɛ muala kpogya ɛ ne zo ka. Kpogya ɛ ne zo, mmasulo! Ka kile Dwuda azuamgbole ne mɔ kɛ, “Bɛnlea, bɛ Nyamenle ne ɛne!”

¹⁰ Bɛnlea, Awulae Nyamenle ne lɛ tumi ɛlɛba, Ɔbava ye tumi ne yeazie ye menli ne; bɛnlea, ɔlɛ ye ahatualɛ ɔ sa nu, yɛɛ ɔlɛ ye ndeanlɛ noko ɔlɛba.

¹¹ Ɔbanlea ye menli ne boɛ kɛ mboaneneavolɛ yɛne nyɛmoa, ɔbaboɔboa mboane mralɛ ne anloa yeadedɛ bɛ ɔ sa zo. Ɔbavia bɛ ɔ kɛnra azo, na yeali mɔɔ lɛ mralɛ la anyunlu bɛtɛɛ.

¹²Nwane a ɛva ɔ sa akunlu ɛzuzu nzule, na yeva ɔ sa yezuzu anwomanyunlu a? Nwane a ɛhola ɛva debie ɛzuzu azɛlɛ ye azo munlutu, na yeva awoka mgbole nee ngyikyi yegua tone zo yezuzu a?

¹³ Nwane a ɛhile Ɛdɛnkɛma Sunsum ne adenle, anzɛɛ ɛyɛ ɔ nwo Ɛdɛnkɛma folɛtuvo ɛhilehile ye a?

¹⁴Nwane a Ɛdɛnkɛma bizale ye adwenle a, yɛɛ nwane a hilehilele ye pɛlepɛlelilɛ adenle a? Nwane a bukele Ɛdɛnkɛma adwenle nu manle ɔnyianle ndelebɛbo a?

¹⁵Bɛnlea, maanle maanle ne mɔ le kɛ nzule kpɔnwo ko mɔɔ vi bokiti nu ɛpe la; bɛle kɛ munlutu wɔ tone zo; ɔfula mbɔra ne mɔ ɔ sa nu kɛ munlutu.

¹⁶Lɛbanɔn mbaka ɛnza senle wuda, yɛɛ ye nyɛmoa ɛnza ɛyelalɛ azu bɔ.

¹⁷Maanle maanle kɔsɔɔti ɛnle ɛhwee wɔ ɔ nyunlu, ɔbu bɛ kɛ bɛndo ɛhwee.

¹⁸ Nwane anwo a bɛfa Nyamenle bɛto a, anzɛɛ duzu debie a zɔho ye a?

¹⁹Amonle! Sonla a yɛ a, yɛɛ dwinvolɛ kolo ezukoa nvutuke gua nwolɛ, na ɔyɛ dwɛtɛ fufule ndweabane ɔmaa ye.

²⁰Mɔɔ ɛnlɛ ezukoa nvutuke nee dwɛtɛ fufule la fa baka ɛsesebɛ mɔɔ ɛmkpɔlɔ la yɛ; ɔmaa dwinvolɛ kpalɛ se ananze mɔɔ ɔsie ye aze a ɔndu ɔndɔ la maa ye.

²¹Bɛnze ɔ? Bɛtɛtele ɔ? Bɛanga bɛangile bɛ wɔ mɔlebɛbo ne ɔ? Tete mɔɔ aloa bɔle la bɛtɛtele ɔ bo ɔ?

²²Ɔdaye mumua ne a ɔde ye ebia nu wɔ azɛlɛ ye ati zo anwuma lɔ. Ɔnea menli mɔɔ wɔ aze ɛke la a bɛ mgbole le kɛ abɛbɛ. Ɔdɛlɛle anwomanyunlu kɛ ɛdanlɛ, na ɔzieziele ye kɛ ndanlɛ sua ɔdɛnlanle nu.

²³Ɔbɛlɛ arelemgbunli aze; ɔnva azɛlɛ ye azo arelemgbunli ɔnyɛ ɛhwee.

²⁴Kɛ bɛdua bɛ la, ɛkɛ ne ala ɛnee bɛfifi, kɛ bɛfifi ala la, ɛnee bɛzɔ ndinli; saa ɔbɔ ye anwoma wuluwulu ne a, bɛnwoso na ahumu pia bɛ kɔ kɛ ewula.

²⁵“Ɛnee akee nwane anwo a bɛfa me bɛto a, amaa meazɔho ahenle,” Nwuanzanwuanza Ko ne ɛlɛbiza bɛ.

²⁶Bɛdo bɛ nye anwuma na bɛnlea, nwane a bɔle ɛhye mɔ a? Yemɔ yɛɛ ɔbɔle bɛ kɔsɔɔti a, yɛɛ ɔfa ko biala duma ɔfɛlɛ ye. Ye tumi kpole ne ati, yɛɛ ɔlɛ tumi na ɔ nwo yɛ se la ati, ko bɔbɔ ɛmminli.

²⁷Yizilayɛ, duzu ati a ɛtendɛ ɛka kɛ, “Ɛdɛnkɛma ɛnze me adenle ne mɔɔ melua nu la, bɛsisi me a ɔnvane me Nyamenle ne anwo” ɛ?

²⁸Bɛnze ɔ? Bɛtɛtele ɔ? Ɛdɛnkɛma le damɛnlangoate Nyamenle, ewiade amuala Bɔvolɛ. Ɔnvɛ yɛɛ ɔ nwo ɛmbɛlɛ ye, ye ndelebɛbo ɛnlɛ nvedenvedenu.

²⁹Ɔmaa mɔɔ anye zo ɛbulu la anwo gyinla ye, ɔmaa mɔɔ ɛnlɛ anwosesebɛ la anwosesebɛ.

³⁰Mgbavolɛ nee mbɛlɛra bavɛ ayɛ bɛtɛɛ, mrenya kpukputilii bavɛ bɛadu bɛagua;

³¹na bɛdabɛ mɔɔ bɛ rɛle wɔ Ɛdɛnkɛma anu la, bɛbanyia anwosesebɛ fofolɛ; bɛbanyia ndɛbalɛ mɔɔ le kɛ kɔleɛ ɛdeɛ ne. Bɛbanriandi na bɛnrɛvɛ, bɛbadia na bɛ nye zo ɛnrɛbulu.