Read Nzema Aye 41 Bible Online

Aye 41 - Nzema bible

Aye 41

¹Nyamenle se, “Bɛmɛ ɛnweanloa amra, bɛyɛ koonwu bɛdie me! Bɛmaa maanle maanle ɛmia bɛ anwosesebɛ ne anu bieko; bɛmaa bɛbikye, na bɛmaa bɛdendɛ; bɛmaa yɛhua yɛ nloa na yɛdie ndɛnebualɛ ne.

²“Nwane a hɔhanle konimnli ne mɔɔ vi aduduleɛ, mɔɔ ɛleka biala mɔɔ ɔkɛtia la ɔdi konim a? Yeye maanle maanle kɔsɔɔti yemaa ye, yemɔti ɔdi arelemgbunli nwo zo konim; ɔfa ye konle dadeɛ ne ɔbɔ bɛ asande kɛ munlutu, ɔfa ye ɛda ne ɔpia bɛ ɔkɔ kɛ ewula.

³Ɔfoa bɛ ndinlizo na ɔse bɛ nwo, wɔ adenle mɔɔ ɔtɛfale zolɛ ɛlɛ la azo.

⁴Ɔvi tete, wɔ awolɛndoazo muala anu, nwane a ɛyɛ ɛhye a? Medame Ɛdɛnkɛma ɔ, mele mɔlebɛbo, mele awieleɛ. Medame mumua ne ɛne.

⁵“Ɛnweanloa amra ɛnwu ye na bɛ ahonle ɛdu, azɛlɛ ye azo amra amuala anwo wozo bɛ; bɛhuohua bɛ nloa bɛra.

⁶Awie biala boa ɔ gɔnwo, na ɔka ɔkile ɔ diema kɛ, ‘Gyinla ɛ nwo!’

⁷Dwinvolɛ mɔɔ se mbaka la si ezukoa dwinvolɛ ahonle, mɔɔ tenrɛdenrɛ ahyɛnze la si mɔɔ di mbulalɛ adwinli la ahonle; bɛse, ‘Ye ɛsosɔlɛ ne mɔ le kpalɛ;’ na bɛfa agbɛlɛko bɛbobɔ nu amaa yeandu.

⁸ “Na bɛmɛ Yizilayɛma, me sonvolɛ Gyekɔbo abo zo amra mɔɔ mekpa nu meye bɛ, me gɔnwo Ebileham nlɔnra,

⁹bɛmɛ a menvale bɛ menvile ewiade ye amuala anu, na menvɛlɛle bɛ menvile ye muleɛ biala azo, na menzele bɛ kɛ, ‘Bɛle me sonvolɛma’ a, menlea nu meye bɛ, metɛkpole bɛ.

¹⁰Bɛmmasulo, ɔluakɛ me nee bɛ lua; bɛmmamaa bɛ ahonle tu, medame a mele bɛ Nyamenle a. Mebamaa bɛ anwosesebɛ, mebaboa bɛ, mebava me konimlilɛ tumi ɛsalɛ ne meazɔ bɛ.

¹¹“Bɛnlea, menli mɔɔ ɛva bɛ nwo ɛya kpole la anyunlu bagua aze na bɛ adwenle aha abɔ nu. Bɛdabɛ mɔɔ bɛko bɛtia bɛ la ɛnrɛhola ɛhwee yɛ, yɛɛ bɛ bo zo baminli.

¹²Bɛbakpondɛ menli mɔɔ nee bɛ dwudwu la, na bɛnrɛnwu bɛ. Menli mɔɔ zo konle doa bɛ la ɛnrɛhola ɛhwee yɛ.

¹³Ɔluakɛ medame, Ɛdɛnkɛma bɛ Nyamenle, melɛ bɛ sa fema ne anu. Medame yɛɛ melɛka meahile bɛ a: Bɛmmasulo na mebaboa bɛ.”

¹⁴Ɛdɛnkɛma se, “Gyekɔbo abo zo amra, Yizilayɛma, mɔɔ bɛ anwosesebɛ le kɛ sone a, bɛmmasulo! Mebaboa bɛ, bɛ Kpɔnevolɛ a le Yizilayɛ Nwuanzanwuanza Ko ne.

¹⁵Bɛnlea, mebamaa bɛayɛ kɛ ma ɛwozolɛ taboa mɔɔ le fofolɛ, na ɔlɛ mbulalɛ egyele mɔɔ yɛ nla; bɛbava bɛahili awoka mgbole ne mɔ bɛagua, na bɛapia awoka ngyikyi ne mɔ kɛ ma abonle.

¹⁶Bɛbakpogya bɛ na anwoma ne abɔ bɛ ahɔ, na ahumu abɔ bɛ asande. Ɛdɛnkɛma ati, bɛ nye balie, na bɛaye Yizilayɛ Nwuanzanwuanza Ko ne ayɛlɛ.

¹⁷“Saa ehyianli nee mɔɔ ɛhyia la kpondɛ nzule, na bie ɛnle ɛkɛ, na nzuhɔne maa bɛ kɔmenzia we resee a, medame Ɛdɛnkɛma, mebadie bɛ nzɛlɛlɛ; medame Yizilayɛ Nyamenle, menrɛkpo bɛ.

¹⁸Mebamaa azule aze awoka ne mɔ azo, na nzule feanvea adenrɛ mbɔnza ne mɔ anu. Mebamaa nzule agyinlegyinla ɛsɛlɛ zo, na meamaa nzubula agyinlegyinla azɛlɛ resee zo.

¹⁹Mebamaa sida mbaka afifi fienemgbole nu, akasea, mɛtɛle nee ɔlivi mbaka kɔsɔɔti; mebamaa sepelɛse mbaka afifi ɛsɛlɛ zo, dwunipa nee bolonyia mbaka kɔsɔɔti,

²⁰amaa menli anwu ye na bɛanwu ye, bɛadwenle nwolɛ na bɛade ɔ bo kɛ, Ɛdɛnkɛma yɛɛ ɛyɛ ɛhye a; Yizilayɛ Nwuanzanwuanza Ko ne a bɔle bɛ a.”

²¹Ɛdɛnkɛma, Yizilayɛ Belemgbunli ne se, “Bɛha bɛ edwɛkɛ ne, bɛhile nɔhalɛ mɔɔ wɔ nu la.

²²Bɛrɛla bɛraha mɔɔ bazi la, bɛha mɔɔ ɛzi dɛba la bɛhile yɛ, amaa yeadwenle nwolɛ, amaa yɛanwu kɛ bɛ awieleɛ zile wiele la; anzɛɛ bɛha mɔɔ bara la bɛhile yɛ.

²³Bɛha mɔɔ bara ɛhye mɔ anzi la bɛhile yɛ, amaa yɛanwu kɛ bɛle nyamenle; bɛyɛ kpalɛ, anzɛɛ bɛyɛ amumuyɛ, amaa yɛ ahonle adu na yɛazulo.

²⁴Bɛnlea, bɛnle ɛhwee, yɛɛ bɛ gyima le mgbane; mɔɔ kɛva bɛ la ɛbɔ munzule.

²⁵“Meye awie vi aduduleɛ lɔ memaa yera, ɔvi aduduleɛ lɔ ɔbarazonle me; ɔbatietia arelemgbunli nwo zo kɛ buakɛnwovolɛ ɛlɛtietia ndɛtɛlɛ zo la.

²⁶Nwane a alumua ne ɔhanle a, amaa yɛanwu ye, yɛɛ ɔhanle ye dɛba, amaa yeaha kɛ, ‘Ɔle nɔhalɛ’ a? Awie anga, yɛɛ awie ambɔ ye nolo, awie ande bɛ edwɛkɛ ne.

²⁷Mame, melumua meha mehile Zayɔn, yɛɛ memaa Gyɛlusalɛm ɛde amaneɛ fɛlɛko.

²⁸Na meneanle la, awie ko bɔbɔ ɛnle ɛkɛ; awie ɛnle bɛ avinli mɔɔ tu folɛ, mɔɔ saa mebiza a ɔye ɔ nloa a.

²⁹Bɛnlea, bɛ muala bɛle mgbane, bɛ gyima ne mɔ ɛnle ɛhwee; bɛ ananze ne mɔ mɔɔ bɛgua la le kɛ anwoma.”