Read Nzema Aye 42 Bible Online

Aye 42 - Nzema bible

Aye 42

¹ Ɛdɛnkɛma se, “Bɛnlea me sonvolɛ ne mɔɔ sɔ me nye la, yemɔ a mekpa nu meye ye a; me nye die ɔ nwo. Meva me Sunsum ne mewula ye, ɔbava pɛlepɛlelilɛ yeara maanle maanle ne mɔ anu.

²Ɔnrɛmaa ɔ ne zo ɔnrɛdea nu, anzɛɛ ɔnrɛmaa bɛnrɛde ɔ ne wɔ gua ne mɔ azo.

³Ɔnrɛpɛ ndɔ mɔɔ bɛkposo ye la, yɛɛ ɔnrɛnlua senle mɔɔ asɛɛ ɛnlu la; ɔbamaa pɛlepɛlelilɛ ali gyima nɔhalɛ nu.

⁴Ɔnrɛkpo aze anzɛɛ ye ahonle ɛnrɛdu, kɔkpula kɛ ɔkɛmaa pɛlepɛlelilɛ kɛra ewiade. Ɛnweanloa amra ɛlɛkendɛ ye mɛla ne.”

⁵ Ɛdɛnkɛma Nyamenle ne mɔɔ bɔle anwuma na ɔdɛlɛle ye, mɔɔ bɔle azɛlɛ ye nee zolɛ debie biala, na ɔmaa menli mɔɔ de azɛlɛ ye azo la ɛnwomenle nee sunsum la se,

⁶“Medame a mele Ɛdɛnkɛma a, tenleneyɛlɛ ti a mevɛlɛ wɔ a; mezɔ ɛ sa meva wɔ mezie gyɛlɛɛnye. Meva wɔ meyɛ kɛ ngyekyeleɛ memaa menli ne, ɛbayɛ kɛnlaneɛ wɔamaa maanle maanle ne mɔ.

⁷Ɛbadukuedukue mɔɔ anye ɛzi la anye, na wɔaye bɛdabɛ mɔɔ bɛhye bɛ nuokɛ bɛgua efiade anu awozinli nu la.

⁸“Medame a mele Ɛdɛnkɛma a, me duma ɛne! Menva me anyunlunyia memmaa awie, yɛɛ menva me ayɛlɛyelɛ memmaa ananze mɔɔ bɛgua.

⁹Bɛnlea, ninyɛne dɛba ne mɔɔ menganle nwolɛ edwɛkɛ la ɛyɛ zɔ; kɛkala, melɛka ninyɛne fofolɛ nwo edwɛkɛ; melɛka nwolɛ edwɛkɛ meahile bɛ kolaa na bɛasisi.”

¹⁰Bɛdo edwɛne fofolɛ bɛmaa Ɛdɛnkɛma; ewiade amra amuala, bɛdo ye ayɛlɛyelɛ edwɛne! Nyevile zo amra, bɛye ye ayɛlɛ, bɛdabɛ mɔɔ bɛde ɛnweanloa la, bɛdo edwɛne.

¹¹Bɛmaa ɛsɛlɛ nee zolɛ azuamgbole ne mɔ ɛye ye ayɛlɛ. Kidaa namunamu ne mɔ azo amra ɛye ye ayɛlɛ; bɛmaa bɛdabɛ mɔɔ bɛde Sila la ɛva anyelielɛ ɛdo edwɛne, bɛva anyelielɛ bɛdeɛdea nu wɔ awoka ne mɔ azo.

¹²Bɛmaa bɛwula Ɛdɛnkɛma anyunlunyia, na bɛbɔ ye ayɛlɛyelɛ ne nolo bɛhile ɛnweanloa amra.

¹³Ɛdɛnkɛma tudu ɔ gyakɛ kɛ ɔle katakyie, ɔle kɛ ɛlɔnenli mɔɔ ɛva ɛya; ɔtea nu, ɔtea nu ɛsesebɛ, ɔkile ye katakyie tumi ne wɔ ye kpɔvolɛma anwo zo.

¹⁴Nyamenle se, “Mekɛ tendenle mɔɔ ɛze ɛhɔ la meyɛ koonwu, meyɛ koonwu, mehomo me nwo zo; na kɛkala mebadea kɛ raalɛ mɔɔ ɛvo awolɛ zo, mebalie ɛnwomenle mgbole kɛ sonla mɔɔ ɛvɛ la.

¹⁵Mebadwulu awoka mgbole nee ngyikyi, na meamaa mbaka mɔɔ wɔ zo la anwoso; mebamaa azule ne mɔ apepɛ bula bula, na bula ne mɔ asesa ayɛ resee.

¹⁶“Mebahile anyenzinliravolɛma adenle, wɔ adenle mɔɔ bɛdabɛ bɛnze la anu, adenle mɔɔ bɛtɛfale zolɛ ɛlɛ la azo yɛɛ mebava bɛ mealua a. Mebamaa awozinli ne mɔɔ wɔ bɛ nyunlu la ayɛ wienyi, na ɛleka ahuhunduu ne mɔ ayɛ azɛlɛ sɛsɛ. Ninyɛne mɔɔ mebayɛ la ɛne, yɛɛ menrɛkpo bɛ.

¹⁷Bɛdabɛ mɔɔ bɛfa bɛ rɛle bɛwula ananze mmonle nu, na bɛka bɛkile bɛ ananze mmonle ne mɔ kɛ, ‘Bɛle yɛ nyamenle’ la bakpo aze na bɛ nyunlu agua aze.”

¹⁸Ɛdɛnkɛma se, “Bɛmɛ anzondiliravolɛma, bɛdie! Bɛmɛ anyenzinliravolɛma, bɛnlea, amaa bɛanwu debie!

¹⁹Nwane a anye ɛzi kɛ me sonvolɛ ne, anzɛɛ anzo ɛdi kɛ me soanvolɛ ne la a? Nwane a anye ɛzi kɛ me ra ne mɔɔ ɛdu ɔ nwo ɛmaa me, anzɛɛ anye ɛzi kɛ Ɛdɛnkɛma soanvolɛ ne la a?

²⁰Ɔnwu ninyɛne dɔɔnwo, noko ɔnvede ɔ nye ɔnnea, yebuke ɔ nzo, noko ɔnde edwɛkɛ.”

²¹Ye tenleneyɛlɛ ti, Ɛdɛnkɛma lile fɛlɛko, kɛ yekpogya Nyamenle mɛla ne zo yemaa bɛli ye eni.

²²Noko bɛwua ye menli ne bɛve bɛ nwo ninyɛne, bɛhye bɛ nuokɛ bɛgua bɛ azɛlɛ bo efiade. Bɛdɔ agye, bɛnlɛ awie mɔɔ die bɛ a, bɛyɛ afedeɛ mɔɔ awie ɛnga kɛ, “Bɛgyakyi!”

²³Nwane a wɔ bɛ avinli mɔɔ kɛdie ɛhye a, mɔɔ kɛgyinla kɛdie mekɛ ne mɔɔ bara la a?

²⁴Nwane a vale Gyekɔbo abo zo amra manle sɛkyevolɛ ne, yele Yizilayɛma manle nwule a? Asoo tɛ Ɛdɛnkɛma, mɔɔ yɛyɛ ɛtane yɛtia ye, mɔɔ bɛkpo kɛ bɛnrɛlua ye ndenle nu, na bɛse bɛnrɛli ye mɛla zo la ɔ?

²⁵Yemɔti ɔwolale ye ɛya wuluwulu ne ɔguale yɛ nwo zo, na yɛnwunle kɛ konle si yɛ ɛzulolɛ la; ɔmanle ye ɛya senle ne zɔle bɔle yiale Yizilayɛ, noko yeande ɔ bo; ɔyelale ye, noko yeandwenle nwolɛ bɔbɔ.