Read Nzema Aye 43 Bible Online

Aye 43 - Nzema bible

Aye 43

¹O Yizilayɛma, Gyekɔbo abo zo amra, Ɛdɛnkɛma mɔɔ bɔle bɛ yɛle bɛ muala la se, “Bɛmmasulo, ɔluakɛ mekpɔne bɛ; meva bɛ duma mevɛlɛ bɛ, bɛle me ɛdeɛ.

²Saa bɛlua nzule buma nu a, me nee bɛ balua; bɛlua azule ne mɔ anu a, bɛnrɛmonla bɛ; saa bɛlua senle nu a, senle ne ɛnrɛyela bɛ, yɛɛ ye ɛzɔlɛ gbolamgbolam ne ɛnrɛyela bɛ.

³Ɔluakɛ medame a mele Ɛdɛnkɛma bɛ Nyamenle ne, Yizilayɛ Nwuanzanwuanza Ko ne, bɛ Dievolɛ ne a. Mefa Yigyibiti meyɛ bɛ ɛkpɔnedeɛ, mefa Sudan nee Siba memaa na medie bɛ.

⁴Kɛmɔ bɛsonle bolɛ wɔ me nye zo, medi bɛ eni, na mekulo bɛ la ati, mefa menli memaa na medie bɛmɛ bɛ ngoane.

⁵Bɛmmasulo, ɔluakɛ me nee bɛ lua. “Mebava bɛ bo zo amra meavi aduduleɛ, meaboɔboa bɛ nloa meavi adɔleɛ meara.

⁶Mebaha meahile sɔlɔ amra kɛ, ‘Bɛgyakyi bɛ,’ na meaze nyiakɛ amra kɛ, ‘Bɛmmafa bɛ sa bɛka bɛ;’ me mra mrenya ne mɔ vi moa moa, yɛɛ me mra mraalɛ ne mɔ vi ewiade ɛleka biala bara.

⁷Awie biala mɔɔ bɛfa me duma bɛfɛlɛ ye, mɔɔ me anyunlunyia ti membɔle ye, na mengyehyɛle menyɛle la bara.”

⁸Nyamenle se, “Bɛva menli ne mɔɔ lɛ ɛnyelɛ, noko bɛ nye ɛzi, bɛlɛ ɛnzonlɛ, noko bɛ nzo ɛdi la bɛrɛla.

⁹Bɛmaa maanle maanle ne mɔ ɛboɔboa bɛ nloa, na bɛmaa menli ngakyile kɔsɔɔti ɛboɔboa bɛ nloa. Nwane a wɔ bɛ avinli mɔɔ kɛhola kɛha ɛhye kɛdo gua, na ɔkɛhile yɛ ninyɛne mɔɔ ɛze ɛhɔ la a? Bɛmaa bɛva bɛ alasevolɛ bɛrɛla bɛmaa bɛrali bɛmaa bɛ, anzɛɛ bɛdie na bɛha kɛ, ‘Ɔle nɔhalɛ.’ ”

¹⁰Ɛdɛnkɛma se, “Bɛmɛ Yizilayɛma, bɛle me alasevolɛ nee me sonvolɛma mɔɔ mekpa nu meye bɛ, amaa bɛanwu ye na bɛalie me bɛali, na bɛade ɔ bo kɛ medame a mele Nyamenle a. Ɛye me a, nyamenle biala ɛnle ɛkɛ mɔɔ li me nyunlu, yɛɛ bie vi me nzi ɛnrɛra.

¹¹“Medame, medame ala a mele Ɛdɛnkɛma a, ɛye me a dievolɛ bieko ɛnle ɛkɛ.

¹²Medame a menganle mɔɔ bazi la mendole gua a, medame a menliele bɛ ngoane a, wɔ mekɛ mɔɔ ɛnee nyamenle gyɛne biala ɛnle bɛ avinli la; bɛdabɛ a bɛle me alasevolɛ a.

¹³Medame a mele Nyamenle a, yɛɛ ɔvi ɛnɛ mɔɔ kɔ la medame a mele Nyamenle a; awie ɛngola ɛnlie debie mɔɔ melɛ ye me sa nu la; yɛɛ melɛyɛ debie a awie ɛngola ɛnzi me aze.”

¹⁴Ɛdɛnkɛma, bɛ Kpɔnevolɛ ne, Yizilayɛ Nwuanzanwuanza Ko ne se, “Bɛdabɛ bɛ ti, mebazoa meamaa bɛahɔ Babelɔn anwo zo, meamaa bɛahɔbubu suakpole ne nlenkɛ mgbole ne mɔ, na meamaa Babeloniama anyelielɛ ɛdeɛdeanlɛ ne ahakyi awolɛyelɛ.

¹⁵Medame a mele Ɛdɛnkɛma, bɛ Nwuanzanwuanza Ko ne, Yizilayɛma Bɔvolɛ, bɛ Belemgbunli ne a.”

¹⁶Ɛdɛnkɛma mɔɔ pɛ adenle to nyevile nu, na ɔye adenle ɔto azule mgbole nu,

¹⁷yemɔ mɔɔ ɔka konle ehwili nee mgbɔnwɔ ɔgua, ɔbɛlɛ ɛlɔnema nee ɛlɔne nu katakyiema aze; ɔka bɛ ɔgua mɔɔ bɛngola dwazo bieko, ɔnua bɛ kɛ senle, ɔminli bɛ bo zo la se,

¹⁸“Bɛmmakakye ninyɛne dɛba ne mɔ, yɛɛ bɛmmadwenle mɔmoane ninyɛne ne mɔ anwo.

¹⁹Bɛnlea, melɛyɛ debie fofolɛ; kɛ ɔlɛba ɛ, asoo bɛnnwu ye? Mebakpakye adenle meado fienemgbole nu, na meaye azule meagua ɛsɛlɛ zo.

²⁰Nanemgbole bali me eni, ɛzonlɛ nee soholo ne mɔ kɔsɔɔti, ɔluakɛ memaa nzule finde fienemgbole nu, yɛɛ memaa azule da ɛsɛlɛ zo, amaa me menli ne mɔɔ mekpa nu meye bɛ, me menli ne mɔɔ mebɔ bɛ memaa me nwo la, anyia bie anlo na bɛaye me ayɛlɛ.”

²²Ɛdɛnkɛma se, Noko “Bɛmɛ Yizilayɛma, bɛanzonle me, me nwo ɛvonle bɛ, O Yizilayɛma!

²³Bɛtɛfale bɛ mboane bɛtɛbayɛle ɛyelalɛ azubɔdeɛ bɛtɛmanle me, yɛɛ bɛtɛfale azubɔlɛ bɛtɛdile me eni. Metɛfale azubɔlɛ metɛyɛle kpomgbolo metɛkpolole bɛ, yɛɛ metɛgyegyele bɛ wɔ ɛyɛlɛ evuanlɛ nwo.

²⁴Bɛtɛfale bɛ ezukoa bɛtɛtɔle baka evuanlɛ bɛtɛmanle me, yɛɛ bɛtɛfale bɛ nane mɔɔ ɛlɔ la bɛtɛbɔle azu bɛtɛmanle me. Na bɛmɛ, bɛ ɛtane ne mɔ ɛbo me nwo zo, bɛva bɛ amumuyɛ nyɛleɛ ne mɔ bɛgyegye me.

²⁵Medame, medame a mele Nyamenle, mɔɔ medame me ti, mefa bɛ ɛtane mekyɛ bɛ a. Menrɛhakye bɛ ɛtane ne mɔ bieko.

²⁶“Bɛhakye me adwenle; bɛrɛla bɛmaa yɛvedevede nu, bɛha bɛ tendile ne bɛhile kɛ bɛdi benle.

²⁷Bɛ ze ne mɔɔ lumua la yɛle ɛtane, yɛɛ bɛ mɛla kilehilevolɛma ne yɛle ɛtane tiale me.

²⁸Yemɔti menguale bɛ ɛleka nwuanzanwuanza ne mgbanyima anyunlu aze; menyele Yizilayɛma memanle bɛzɛkyele bɛ, na memanle bɛgolole me menli ne anwo.”