Read Nzema Aye 44 Bible Online

Aye 44 - Nzema bible

Aye 44

¹Ɛdɛnkɛma se, “Yizilayɛma, me sonvolɛma, bɛdie, Gyekɔbo abo zo amra mɔɔ mekpa nu meye bɛ a!

²Medame Ɛdɛnkɛma mɔɔ membɔle bɛ, mengyehyɛle bɛ bɛ nli mɔ akunlu la mese: Mebaboa bɛ; bɛmmasulo, me sonvolɛ Gyekɔbo abo zo amra; bɛmɛ a bɛle menli mɔɔ mekpa nu meye bɛ a.

³“Mebamaa ezule adɔ azɛlɛ resee zo, na azudenle aze azɛlɛ mɔɔ nzule ɛnle zo la azo. Mebawola me Sunsum ne meagua bɛ bo zo amra anwo zo, na meayila bɛ mra.

⁴Bɛbamaa bɛ nwo zo kɛ ndile mɔɔ fifi nzule nu la; bɛbayɛ kɛ mbaka mɔɔ fifi azule nloa la.

⁵“Ɛhye baha kɛ, ‘Mele Ɛdɛnkɛma ɛdeɛ;’ ko bava Gyekɔbo duma ado ɔ nwo zo, yɛɛ ko noko bahɛlɛ, ‘Ɛdɛnkɛma ɛdeɛ ɔ’ yeagua ɔ sa anwo, na yeava Yizilayɛ duma yeazɔ ye duma ne azo.”

⁶ Ɛdɛnkɛma, Yizilayɛ Belemgbunli nee Kpɔnevolɛ, Tumivolɛ Ɛdɛnkɛma se, “Medame a mele mɔlebɛbo ne, yɛɛ medame a mele awieleɛ ne; ɛye me a nyamenle bieko ɛnle ɛkɛ.

⁷Nwane a le kɛ medame a? Bɛmaa ɔha ɔdo gua, bɛmaa ɔha ɔdo gua na ɔva ɔzi me nyunlu. Nwane a mɔmoane ɔholale ɔhanle mɔɔ bazi la a? Bɛmaa ɔha mɔɔ kenlebie bazi la ɔhile yɛ.

⁸Bɛmmasulo yɛɛ bɛmmamaa ɛzulolɛ ka bɛ; meha mehile bɛ dɛba yɛɛ meva medo gua. Bɛmɛ a bɛle me alasevolɛ a! Asoo ɛye me a nyamenle bieko wɔ ɛkɛ ɔ? Pepɛdievolɛ biala ɛnle ɛkɛ kɛ medame; menze bie memboka me nwo.”

⁹Bɛdabɛ mɔɔ bɛyɛ mmonle la ɛnle ɛhwee, yɛɛ ninyɛne mɔɔ bɛyɛ la azo ɛnlɛ nvasoɛ ɛmmaa bɛ; bɛ alasevolɛ ne mɔ ɛnze, yɛɛ bɛnnwu kɛ bɛ nyunlu bagua aze.

¹⁰Bɛdabɛ mɔɔ bɛgua ananze bɛyɛ mmonle la ɛnnyia nvasoɛ biala wɔ zolɛ.

¹¹Bɛnlea, bɛdabɛ mɔɔ bɛsonle ye la amuala anyunlu bagua aze, yɛɛ dwinvolɛma mɔɔ yɛ la le menli ala; maa bɛ muala bɛboɔboa bɛ nloa bɛragyinla ɛke, na ɛkɛnwu kɛ bɛ ahonle badu, bɛ nyunlu agua aze.

¹²Mbulalɛ dwinvolɛ ne wula bulalɛ senle nu na ɔyɛ nwolɛ gyima, ɔfa ɔ sa ɛnlomboɛ ne ɔsɔ hamenle nu ɔbolo ye ɔsiezie ye. Ye ɛyɛlɛ nu, nzuhɔne ku dwinvolɛ ne, ɛhɔne ku ye maa ɔ nwo bɛlɛ ye.

¹³Saa kapenta noko a, ɔfa ye ɛzuzudeɛ ne ɔto nwolɛ, ɔfa ye pɛnsele ne ɔkɛlɛhɛlɛ taboa ne azo, na akee ɔfa bulalɛ ɔtwɛlɛhwɛlɛ nwolɛ, ɔsiezie ye ɔmaa ɔyɛ kɛ sonla, na ɔyɛ ɔmaa ɔsɔho sonla, na bɛfa bɛsie sua nu.

¹⁴Sonla pɛ sida baka to; anzɛɛ yɛ baka ɛsesebɛ bie anyenle, ɔgyakyi ye ɔmaa ɔnyi ɔyɛ baka kpole ɛsesebɛ wɔ kpɔkɛ ne anu. Ɔdua sida baka na ɔgyakyi ye ɔmaa ezule tɔ gua zolɛ, ɔyɛ baka ɛsesebɛ.

¹⁵Akee ɔfa bie ɔyɛ ɛyɛne ɔwuda ɔmaa ɔbɔ ɔ nwo wuluwulu, ɔfa bie ɔwuda senle ɔto kpanwo ɔdi, na eza yeava bie yeayɛ ye nyamenle yeazonle ye. Ɔfa baka ne ɔyɛ ananze na yeabɔ ɔ ti aze yeamaa ye.

¹⁶Sonla pɛ baka ne bie wuda senle, ɔfa ɔtondo fɛlɛ anzɛɛ nane ɔdi ɔ ko yi, na ɔnyia anwosesebɛ a yeaha kɛ, “Ɛhɛe, me nwo ɛyɛ wuluwulu, senle le debie kpalɛ.”

¹⁷Na baka ne mɔɔ kɛha la yeava yeaze ananze, yeayɛ amonle, yeava yeayɛ ye nyamenle; ɔtu ɔtɔ ɔ nyunlu ɔsonle ye na yeazɛlɛ ye yeaha kɛ, “Die me ngoane, ɔluakɛ ɛle me nyamenle!”

¹⁸Menli zɛhae mɔ ɛnnwu mɔɔ bɛyɛ la, yɛɛ bɛnde ɔ bo, ɔluakɛ bɛ nye ɛzi, yemɔti bɛnnwu ɛhwee, yɛɛ bɛdo bɛ adwenle nu, yemɔti bɛnde debie biala abo.

¹⁹Biala ɛndwenle, yɛɛ bɛnlɛ adwenle anzɛɛ bɛnnwu nrɛlɛbɛ bɛnga kɛ, “Baka ye foa ko a meyela ye senle nu, meva medo kpanwo, medondo fɛlɛ anzɛɛ nane meli la; na duzu ati a akee menwɔva sinli ne mɔɔ ɛha la menwɔyɛ bɛkyi debie ɛ? Asoo membɔ me ti aze memaa baka sinli?”

²⁰Ɔle kpalɛ kɛ ɔkɛli nzonle bɔbɔ; adwenle ɛtane ɛminli ye, yemɔti ɔngola ɔnlie ɔ nwo anzɛɛ ɔnga kɛ amonle ne mɔɔ ɔlɛ la ɛnle nyamenle fee.

²¹O Gyekɔbo abo zo amra, bɛhakye ninyɛne ɛhye mɔ; Yizilayɛma, bɛle me sonvolɛma. Medame a membɔle bɛ a, bɛle me sonvolɛma. Me rɛle ɛnrɛvi bɛ ɛlɛ.

²²Mepia bɛ mɛladonlɛ ne mɔ amuala kɛ amungu mehɔ, yɛɛ mepia bɛ ɛtane ne mɔ kɛ ɛbɔlɛ megua; bɛzia bɛrɛla, ɔluakɛ mekpɔne bɛ.

²³O anwumaneamra, bɛdo edwɛne, ɔluakɛ Ɛdɛnkɛma a ɛyɛ a; O azɛlɛ buma ne mɔ, bɛdea nu; O awoka, bɛdo edwɛne, O kpɔkɛ, nee nuhua mbaka kɔsɔɔti, bɛdo edwɛne! Ɔluakɛ Ɛdɛnkɛma ɛkpɔne Gyekɔbo abo zo amra, na bɛbawula ye anyunlunyia wɔ Yizilayɛ.

²⁴Ɛdɛnkɛma, bɛ Kpɔnevolɛ ne mɔɔ bɔle bɛ guale bɛ wɔ bɛ nli mɔ akunlu la se, “Medame a mele Ɛdɛnkɛma, mɔɔ bɔle ninyɛne kɔsɔɔti la, me ngome a membɔle anwuma a. Mɔɔ mebɔ azɛlɛ ye la, nwane a gyi me foa a?

²⁵ Medame a mesɛkye adalɛma mɔɔ bɔ menli munzule la sɛkɛlɛneɛ ne mɔ, memaa menli mɔɔ tendɛ nwomenle nloa zo la yɛ ahoasea, memaa nrɛlɛbɛvolɛma nrɛlɛbɛ ka bɛ ti anu, na memaa bɛ adwenlenubukelɛ yɛ mgbane.

²⁶Medame a memaa me sonvolɛma edwɛkɛ di munli, na meyɛ mɔɔ me soanvolɛma kɛha la. Meka ye Gyɛlusalɛm anwo kɛ, ‘Menli baradɛnla zolɛ,’ na meka mekile Dwuda azuamgbole kɛ, ‘Bɛbakyekye bɛ fofolɛ, na mebakyekye bɛ azuamgbole mɔɔ ɛzɛkye la.’

²⁷Medame a meka mekile buma kɛ ‘We resee, mebamaa wɔ azule ne mɔ asesa.’

²⁸ Medame a meka mekile Saelɛse kɛ, ‘Ɔle me mboaneneavolɛ, yɛɛ ɔbayɛ debie biala mɔɔ mekpondɛ la;’ meka mekile Gyɛlusalɛm kɛ, ‘Bɛbakyekye ye bieko,’ na meka wɔ Ɛzonlenlɛ Sua ne anwo kɛ, ‘Bɛbawula wɔ adiabo ne aze.’ ”