Read Nzema Aye 45 Bible Online

Aye 45 - Nzema bible

Aye 45

¹Ɛdɛnkɛma ɛkpa nu ɛye Saelɛse, yemaa ye tumi kpole kɛ ɔli maanle maanle nwo zo konim, na ɔlie arelemgbunli tumi ɔvi bɛ sa nu; ɔbukebuke nlenkɛ mɔɔ wɔ ɔ nyunlu la, amaa bɛando nlenkɛ mgbole ne mɔ anu, na ɔzele ye kɛ:

²“Mebalumua ɛ nyunlu, meahɔha awoka ne mɔ aze meamaa wɔ. Mebabubu bɛ kɔbele nlenkɛ mgbole ne mɔ, na meapepɛ bɛ nlenkɛ mgbole nzi mbulalɛ ne mɔ anu.

³Mebava anwonyia mɔɔ vea awozinli nu la meamaa wɔ, meava anwoneɛ biala mɔɔ vea la meamaa wɔ, amaa wɔanwu kɛ medame Ɛdɛnkɛma, Yizilayɛ Nyamenle ne, mefa wɔ duma mefɛlɛ wɔ.

⁴Me sonvolɛ Gyekɔbo ati, nee Yizilayɛma mɔɔ mekpa nu meye bɛ la ati, mefa wɔ duma mefɛlɛ wɔ, yɛɛ ɛnze me bɔbɔ ɛdeɛ, noko me duma la ɛ nwo zo.

⁵“Medame a mele Ɛdɛnkɛma a, bieko ɛnle ɛkɛ, ɛye me a Nyamenle bieko ɛnle ɛkɛ; memaa wɔ anwosesebɛ, noko ɛnze me,

⁶amaa ɔvi aduduleɛ kɔdwu adɔleɛ, menli kɔsɔɔti anwu kɛ ɛye me a, bieko ɛnle ɛkɛ. Medame a mele Ɛdɛnkɛma a, bieko ɛnle ɛkɛ.

⁷Medame a mebɔ wienyi nee awozinli a, medame a memaa sonla kpazi na memaa munzule to ye a, medame a mele Ɛdɛnkɛma mɔɔ yɛ ninyɛne ɛhye mɔ kɔsɔɔti a.

⁸O anwomanyunlu, tɔ tenleneyɛlɛ kɛ ezule fi anwuma gua azɛlɛ ye azo, maa azɛlɛ ye ɛmeme, amaa zolɛ afifi ngoanelielɛ, na tenleneyɛlɛ noko afifi zolɛ; Medame Ɛdɛnkɛma a memaa ɛhye si a.”

⁹ Ɛdɛnkɛma se, “Munzule ɛha sonla ne mɔɔ nee ye Bɔvolɛ dwudwu la, ɔle kɛ buakɛ wɔ mɔɔ nwonle ye la asa anu. Asoo ndɛtɛlɛ bahola aha ahile mɔɔ ɛlɛfa ye anwo debie la kɛ, ‘Duzu a ɛlɛnwo la?’ anzɛɛ ‘Wɔ dwora ne ɛnlɛ ɔ sa?’

¹⁰Munzule ɛha sonla ne mɔɔ kɛha kɛhile ɔ ze kɛ, ‘Duzu a ɛlɛwo bɛ la?’ anzɛɛ ɔ nli mɔɔ ako ɛha ye la kɛ, ‘Duzu a ɛlɛmaa wɔade awolɛ nyane la?’ ”

¹¹Ɛdɛnkɛma, Yizilayɛ Nwuanzanwuanza Ko ne, Yizilayɛ Bɔvolɛ ne se, “Ɛbiza me kpuyia mɔɔ fane me menli ne anwo la, anzɛɛ ɛkile me mɔɔ ɔwɔ kɛ mesi meyɛ me gyima la ɔ?

¹²Medame a membɔle ewiade a, yɛɛ membɔle sonla mendole nu; menvale me tumi a membɔle anwuma a, yɛɛ medame a membɔle anwumaneamra a.

¹³Memaa mɔɔ Saelɛse ɛyɛ la ɛyɛ tenlene, yɛɛ mebamaa ye ndenle ne mɔ ayɛ fɔɔnwo; ɔbakyekye me suakpole ne, na yeamaa bɛagyakyi me menli ne mɔɔ bɛhye bɛ bɛhɔ nlɔnu la, ɔnrɛlie bɛ ti ɛkpɔnedeɛ anzɛɛ ahyɛlɛdeɛ, medame Tumivolɛ Ɛdɛnkɛma a mese a.”

¹⁴Ɛdɛnkɛma se, “Yigyibiti nee Sudan anwonyia ne amuala bapɛ ali bɛmɛ Yizilayɛma bɛ ɛkɛ, yɛɛ Sibama, menli kakanyinlima ne, barazonle bɛmɛ Yizilayɛma, bɛbagua bɛ anga bɛara, na bɛarahoto bɛ. Bɛbabodo bɛazɛlɛ bɛ bɛaha kɛ, ‘Nyamenle nee bɛmɛ Yizilayɛma angome a lua a, nyamenle bieko ɛnle ɛkɛ kɛ ɔ ngome ala.

¹⁵O Yizilayɛ Nyamenle, Ngoanedievolɛ ne, Nɔhalɛ, ɛle Nyamenle mɔɔ ɛfea ɛ nwo a.

¹⁶Bɛ muala bɛ nyunlu ɛgua aze, bɛbɔ anyiemgba, bɛdabɛ mɔɔ bɛnwo mmonle la, bɛbɔ anyiemgba.

¹⁷Ɛdɛnkɛma ɛlie Yizilayɛma ngoane, yemaa bɛ ngoanelielɛ mɔɔ ɛnlɛ awieleɛ, bɛ nyunlu ɛnrɛgua aze anzɛɛ bɛnrɛbɔ anyiemgba ɛlɛ.’ ”

¹⁸Ɛdɛnkɛma mɔɔ bɔle anwuma la, yemɔ a ɔle Nyamenle a! Yemɔ mɔɔ ɔhyehyɛle na ɔbɔle azɛlɛ ye la, ɔbɔle ɔmanle ɔlile munli, yeambɔ ye sesakaa biala yeanzie ɛkɛ; ɔbɔle ewiade, amaa sonla adɛnla nu. Ɔse, “Medame a mele Ɛdɛnkɛma a, bieko ɛnle ɛkɛ.

¹⁹Meanga ye fealera nu, wɔ awozinli azɛlɛ bie azo; meanga meangile Gyekɔbo abo zo amra kɛ, ‘Bɛva basabasayɛlɛ bɛkpondɛ me bo zo.’ Medame Ɛdɛnkɛma, meka nɔhalɛ ne, meka mɔɔ le nɔhalɛ la meto gua.”

²⁰Ɛdɛnkɛma se, “Bɛdabɛ mɔɔ bɛango bɛandɔ, mɔɔ bɛwɔ maanle maanle ne mɔ anu la, bɛboɔboa bɛ nloa na bɛrɛla, bɛ muala bɛhwe bɛbikye. Bɛdabɛ mɔɔ bɛsoa mbaka mmonle bɛkpɔsa, na dahuu bɛsonle nyamenle mɔɔ ɛngola ɛnlie ngoane la ɛnlɛ adwenle!

²¹Bɛha bɛ tendile ne bɛdo gua; bɛ muala bɛva adwenle! Nwane a dɛbadɛba ne hanle ɛhye a? Nwane a vale dole gua wɔ mɔmoane a? Medame Ɛdɛnkɛma a menganle a, yɛɛ ɛye me a nyamenle bieko ɛnle ɛkɛ. Mele Nyamenle tenlene yɛɛ medie ngoane, ɛye me a bieko ɛnle ɛkɛ.

²²“Bɛzia bɛ nzi bɛrɛla na bɛnyia ngoane, bɛdabɛ mɔɔ bɛwɔ ewiade amuala la! Ɔluakɛ medame a mele Nyamenle a, bieko ɛnle ɛkɛ.

²³ Meha medame me ngome me nwo mebɔ ɛwɔkɛ, me nloa ɛvula edwɛkɛ mɔɔ le tenlene, menrɛhwe menrɛzia: Awie biala bahoto me, awie biala babɔ ɛwɔkɛ wɔ me nyunlu.

²⁴“Bɛbaha wɔ me nwo kɛ, Ɛdɛnkɛma anu yɛɛ yɛnwu tenleneyɛlɛ nee tumi a. Bɛdabɛ mɔɔ bɛva ɔ nwo ɛya la bara ye ɛkɛ na bɛ nyunlu agua aze.

²⁵Ɛdɛnkɛma ati Yizilayɛma abo zo amra bali konim na bɛ nyunlu ara anyia dahuu.