Read Nzema Aye 46 Bible Online

Aye 46 - Nzema bible

Aye 46

¹“Babelɔn awozonle Bɛle nee Nibo ɛwie ala ɛne, nane nee nlankɛ a soa bɛ mmonle ne mɔ a; ninyɛne ɛhye mɔ mɔɔ bɛsoa bɛkpɔsa la le adesoa maa nane ne mɔ mɔɔ ɛwie fɛ la.

²Bɛbɔ nu bɛkoto, bɛbɔ bɛ ti aze, bɛngola bɛnlie bɛ nwo, bɛhye bɛdabɛ mumua ne nuokɛ!

³“O Gyekɔbo abo zo amra, bɛdie me, O Yizilayɛma mɔɔ ɛha la, bɛdie me! Ɔvi bɛ awolɛ nu menlea bɛ boɛ toonwo a yeradwu ɛnɛ a.

⁴Kɛkala bɔbɔ mɔɔ bɛwie nyi la, medame ala yɛɛ mebazɔ bɛ toonwo bɛabɔ egyɛne a. Medame a mebɔ bɛ a, mebanlea bɛ nwo zo kpalɛ; mebaboa bɛ na mealie bɛ ngoane.

⁵“Nwane a bɛkɛva ye bɛkɛdo me nwo, mɔɔ le kɛ medame na ɔ nee me sɛ a?

⁶Menli ye ezukoa nvutuke wɔ bɛ ahodoku nu; bɛsuzu bɛ dwɛtɛ fufule ne mɔ; bɛbɔ ezukoa dwinvolɛ ɛkpa; ɔfa bɛ ezukoa ne ɔyɛ nyamenle, na bɛtu bɛgua ɔ nyunlu bɛsonle ye!

⁷Bɛkpogya ye zo bɛto bɛ kɔme zo, bɛsoa ye bɛkɔsie ye ɛleka ko, ɛnee ɔgyi ɛkɛ, ɔngola ɔndu ɔ bo ɔnvi ɛleka mɔɔ ɔgyi la. Saa awie su fɛlɛ ye a ɔmbua ye anzɛɛ ɔnlie ye ɔnvi ye amaneɛnwunlɛ nu.

⁸“Bɛmɛ mɛlatovoma, bɛhakye ɛhye, bɛdwenle nwolɛ na bɛhakye.

⁹Bɛhakye alumua ninyɛne mɔɔ zile dɛba ne la; ɔluakɛ medame a mele Nyamenle a, bieko ɛnle ɛkɛ. Medame a mele Nyamenle a, bieko ɛnle ɛkɛ mɔɔ le kɛ medame.

¹⁰Medame a mɔlebɛbo ne menganle awieleɛ edwɛkɛ ne na mɔmoane menganle mɔɔ basisi la anwo bie menzele kɛ, ‘Mɔɔ meha la bagyinla ɛkɛ, yɛɛ mebayɛ mɔɔ mehyehyɛ la.’

¹¹Mevɛlɛ awie vi aduduleɛ maanle bie anu moa moa, ɔbara kɛ anloma mɔɔ kyehye nyɛmoa di la. Meha, na mebamaa yeayɛ zɔ; mehyehyɛ medo ɛkɛ, yɛɛ mebayɛ.

¹²“Bɛmɛ mɔɔ bɛsolo na bɛ ngoanelielɛ wɔ moa a, bɛdie me!

¹³Memaa bɛ ngoanelielɛ kenle ne ɛbikye, ɔnle moa fee, yɛɛ ɔnrɛhyɛ na me ngoanelielɛ ne ara. Mebalie Gyɛlusalɛm na meava anyunlunyia meamaa Yizilayɛ.”