Read Nzema Aye 47 Bible Online

Aye 47 - Nzema bible

Aye 47

¹ Ɛdɛnkɛma se, “Babelɔn, dwu aze badɛnla ndɛtɛlɛ nu. Kalediama suakpole mɔɔ ɛnli kotɔ, ɛvi wɔ belemgbunli ebia ne azo dwu aze, ɔluakɛ ɛ nwo ɛngyia bieko.

²Fa ɛdibolɛ ne na ti ɛdɔkɛ ne, ye ɛ ti zo aguzo ne; kpa gua maa ɛ gyakɛ anwo ɛla ɛkɛ, na wudwu azule ne mɔ.

³Ɛ nwo bala zo, menli banwu kɛ wɔbɔ anyiemgba. Mebali nzenralɛ, yɛɛ menrɛvavi awie biala.”

⁴Yɛ Kpɔnevolɛ ne, ye duma a le Tumivolɛ Ɛdɛnkɛma. Yemɔ a ɔle Yizilayɛ Nwuanzanwuanza Ko ne a.

⁵Ɛdɛnkɛma se, “Babelɔn, tɛnla koonwu maa awozinli ɛva wɔ, ɔluakɛ ɛnɛ bɛnrɛvɛlɛ wɔ maanle maanle belemgbunli raalɛ.

⁶Menvale me menli ne anwo ɛya, menguale me agyadeɛ nwo evinli; menyele bɛ menwulale ɛ sa nu, wɔannwu bɛ anwunvɔne, na ɛmanle mrelera yɛle gyima ɛsesebɛ.

⁷Ɛzele me kɛ, ‘Medi belemgbunli meahyɛ.’ Yemɔti wɔandwenle mɔɔ ɛlɛyɛ la anwo anzɛɛ kɛ bɛ awieleɛ bazi awie la.

⁸ “Wɔmɔ mɔɔ ɛkulo anyelielɛ, wɔmɔ mɔɔ ɛdwenle kɛ ɛde, ɛ nwo tɔ wɔ, na ɛka ye ɛ ti anu kɛ, ‘Medame ɛne, awie ɛndɛla me; menrɛdɛnla kɛ kunlanvolɛ anzɛɛ menrɛli abawuo’ la, tie ɛhye:

⁹Ninyɛne nwiɔ ɛhye bazi ɛ nwo zo, bɛbazi ɛ nwo zo arɛlevilɛ nu, kenle kokye; wɔ ninsinlima baye ngonyia, bɛbahye sili, na ɔnrɛyɛ boɛ; bɛ ayɛne tumi kpole ne amuala anzi ɛbali kunlane, wɔaminli ɛ mra ne mɔ amuala.

¹⁰“Ɛdwenle kɛ wɔ amumuyɛ ne maa ɛ nwo tɔ wɔ, wɔ edwɛkɛ a le kɛ, ‘Awie ɛnnwu me’; wɔ nrɛlɛbɛ ne nee wɔ adwenle ne ɛmaa wɔminli. Eza wɔha ye ɛ ti anu kɛ, ‘Medame ɛne, awie biala nee me ɛnzɛ.’

¹¹Noko munzule bado wɔ mɔɔ ɛnrɛhola ɔ nloa gyinla a; edwɛkɛ kpole bado wɔ mɔɔ ɛnrɛhola nwolɛ mgbɔdalɛ di a; ɛbabɔ atondo arɛlevilɛ nu mɔɔ ɛ nye ɛnla a.

¹²Gyinla kpundii wɔ wɔ ngonyiayelɛ nee wɔ nyidane ɛdudulɛ ne mɔ, mɔɔ sumunli wɔ mgbavolɛ nu wɔyɛ la anu; wɔannea a ɔbamaa wɔakpazi, wɔannea a ɛ nwo baha ɛzulolɛ.

¹³Menli dɔɔnwo mɔɔ tu wɔ folɛ la anwo ɛvonle wɔ, maa bɛgyinla bɛlie wɔ ngoane ɛ, bɛmɛ mɔɔ bɛkola bɛkyɛ anwumaneamra anu, bɛnea bɛsukoa nwɔlɔra ne mɔ, bɛmɛ mɔɔ siane fofolɛ biala bɛkola bɛka mɔɔ bazi ɛ nwo zo la bɛkile wɔ la.

¹⁴“Bɛnlea, bɛle kɛ abɛlɛ gyakɛ, senle yela bɛ wee; bɛngola bɛnlie bɛ nwo bɛnvi senle ne asa anu. Ɛhye ɛnle samɛnlankɛ ɔmbɔ bɛ nwo wuluwulu, ɔnle senle bɛndɛnla nwo bɛnde!

¹⁵Bɛdabɛ mɔɔ ɛ nee bɛ ɛvɛ, na bɛ nee wɔ ɛli gua vi wɔ mgbavolɛ nu la, kɛ bɛ muala bɛle la ɛne; ko biala ɔdaye ɔlua ye ɛlualɛ, awie biala ɛnle ɛkɛ mɔɔ kɛlie wɔ a.”