Read Nzema Aye 48 Bible Online

Aye 48 - Nzema bible

Aye 48

¹O Gyekɔbo abo zo amra, bɛdie ɛhye, bɛfa Yizilayɛ duma bɛfɛlɛ bɛ, yɛɛ bɛle Dwuda mogya ne bie; bɛfa Ɛdɛnkɛma duma bɛka ndane, na bɛbɔ Yizilayɛ Nyamenle ne duma, noko bɛmbɔ ye nɔhalɛ nu nee fɔɔnwo zo.

²Bɛfa suakpole nwuanzanwuanza ne duma bɛfɛlɛ bɛ nwo, na bɛfa bɛ ti bɛsɔ Yizilayɛ Nyamenle ne; ye duma a le Tumivolɛ Ɛdɛnkɛma.

³Ɛdɛnkɛma se, “Ɔvi tete, menganle mɔɔ kenle bie bazi la, ɔvi me nloa anu ɔvindele na memanle bɛdele ɔ bo, akee arɛlevilɛ nu menyɛle na memanle ɔyɛle nɔhalɛ.

⁴Kɛmɔ meze kɛ bɛnli edwɛkɛ nwo bie, na bɛ kɔme ɛyɛ kahelee kɛ bulalɛ, bɛ nwoma azo ta kɛ ayera la ati,

⁵yɛɛ dɛba dɛba ne menvale mendole gua a, menganle kolaa na bɛayɛ zɔ; anrɛɛ bɛkɛha kɛ, ‘Me bozonle ne a yɛle a, me ananze mɔɔ megua nee mɔɔ meze la yɛɛ hanle manle ɔyɛle zɔhane a.’

⁶Bɛde, akee kɛkala, bɛnlea ɛhye mɔ, na bɛlie bɛdo nu kɛ mele nɔhalɛ. Ɔvi ɛnɛ mɔɔ kɔ la bɛbade ninyɛne fofolɛ, ninyɛne mɔɔ vea mɔɔ bɛtɛnwunle bɛ la anwo edwɛkɛ.

⁷Bɛnle ɛkɛ dɛba, kɛkala a mebɔ bɛ a; bɛtɛtele nwolɛ edwɛkɛ ɛlɛ kɛ ɛnɛ, anrɛɛ bɛkɛha kɛ, ‘Yɛdayɛ yɛze bɛ dɛba.’

⁸Bɛtɛtele ye ɛlɛ, bɛnze ye ɛlɛ, ɔvi tete, bɛtɛbukele bɛ nzo. Ɔluakɛ meze kɛ bɛbayɛ ngunzi, yɛɛ ɔvi bɛ awolɛ nu, bɛfɛlɛ bɛ atuadelɛma.

⁹“Me duma ne ati, megyakyi me ɛya ne, me ayɛlɛyelɛ ti, menrɛva menrɛgua bɛ nwo zo, amaa meambɔ bɛ bo zo.

¹⁰Bɛnlea, mede bɛ nwo, noko bɛ nee dwɛtɛ fufule ɛnzɛ; meva nyanenwunlɛ mokyea medu bɛ nuhua.

¹¹Medame mumua ne me ti yɛɛ meyɛ a, ɔluakɛ ɔnle kɛ bɛgua me duma ne anwo evinli. Menrɛva me anyunlunyia menrɛmaa awie gyɛne.”

¹² Ɛdɛnkɛma se, “O Gyekɔbo abo zo amra, bɛdie me! Yizilayɛma mɔɔ medame mevɛlɛ bɛ, bɛdie me! Medame a mele Nyamenle a, medame a mele mɔlebɛbo ne nee awieleɛ ne a.

¹³Medame a menwulale azɛlɛ ye adiabo ne aze a, menvale me tumi a membɔle anwuma a; saa mefɛlɛ bɛ a, bɛfinde me nyunlu.

¹⁴“Bɛ muala bɛrayia, na bɛdie! Nwane a wɔ bɛ avinli mɔɔ ɛva ɛhye mɔ ɛdo gua a? Ɛdɛnkɛma kulo mɔɔ yekpa nu yeye ye la; ɔbali Babelɔn anwo gyima; ye tumi ne batia Babeloniama

¹⁵Medame, ɛhɛe, medame yɛɛ mevɛlɛ ye a, meva ye mera, na ɔbakpazi adenle biala anu.

¹⁶“Bɛhwe bɛbikye me na bɛdie ɛhye, ɔvi tete, metɛfeale metɛkanle edwɛkɛ. Mekɛ mɔɔ ɔkara la, ɛnee mewɔ ɛkɛ.” (Na kɛkala, Awulae Nyamenle ne ɛzoa me na yemaa me ye Sunsum ne bie.)

¹⁷Ɛdɛnkɛma, bɛ Kpɔnevolɛ, Yizilayɛ Nwuanzanwuanza Ko ne se, “Medame a mele Ɛdɛnkɛma bɛ Nyamenle ne, mɔɔ kilehile bɛ maa bɛyɛ kpalɛ, na ɔdi bɛ nyunlu ɔkilehile bɛ adenle mɔɔ ɔwɔ kɛ bɛdua nu la.

¹⁸“O anrɛɛ bɛdiele me mɛla ne mɔ! Anrɛɛ bɛ anzonudwolɛ kɛyɛ kɛ azule, na bɛ tenleneyɛlɛ ayɛ kɛ nyevile azɛlɛkye;

¹⁹anrɛɛ bɛ bo zo amra kɛzo kɛ ɛnwea, na bɛ mra azo kɛ abɛlɛ ma; bɛ duma ɛnrɛminli ɛlɛ, anzɛɛ ɛnrɛzɛkye wɔ me nyunlu ɛlɛ.”

²⁰ Bɛvi Babelɔn bɛye bɛ nwo, bɛnriandi bɛvi Babelonia. Bɛbɔ ye nolo, bɛva anyelielɛ bɛdeɛdea nu bɛha, bɛmaa ɔdwu azɛlɛ ye azo amuala; bɛha kɛ, “Ɛdɛnkɛma ɛkpɔne ye sonvolɛ Gyekɔbo abo zo amra ne!”

²¹Mekɛ mɔɔ ɔ nee bɛ lua ɛsɛlɛ ne azo la, nzuhɔne angu bɛ ɛlɛ; ɔmanle nzule vi bodane nu vindele zenle manle bɛ, ɔkpukele bolɛ ne na nzule vi nu vindele.

²² Ɛdɛnkɛma se, “Amumuyɛma ɛnrɛnyia anzonudwolɛ.”