Read Nzema Aye 49 Bible Online

Aye 49 - Nzema bible

Aye 49

¹ Maanle maanle mɔɔ wɔ moa moa, bɛdie me, bɛmɛ mɔɔ bɛde moa moa maanle nu, bɛdie. Mela ɛkolɛ nu la yɛɛ Ɛdɛnkɛma vɛlɛle me a, mɔɔ mela ɔmɔ akunlu la yɛɛ ɔdonle me duma a.

² Ɔmanle me nloa edwɛkɛ yɛle nla kɛ konle dadeɛ, ɔvale me ɔveale ye tumi bo; ɔmanle menyɛle kɛ ɛda baka, ɔvale me ɔveale ye boa nu.

³Na ɔzele me kɛ, “Ɛle me sonvolɛ, Yizilayɛ, wɔmɔ ɛ ti, menli baye me ayɛlɛ.”

⁴Na menganle kɛ, “Medame, mevɛ mgbane, mezɛkye me anwosesebɛ mgbane, mɔɔ nvasoɛ biala ɛnle zolɛ a.” Noko me anwosesebɛ wɔ Ɛdɛnkɛma ɛkɛ, yɛɛ me ahatualɛ wɔ me Nyamenle ne ɛkɛ.

⁵Na kɛkala, Ɛdɛnkɛma mɔɔ bɔle me wɔ ɔmɔ akunlu kɛ menyɛ ye sonvolɛ, menva Yizilayɛma menzia membɛlɛ ye, ɔluakɛ mezɔ Ɛdɛnkɛma anye, yɛɛ me Nyamenle ne mɔɔ le me anwosesebɛ la se:

⁶ “Ɔnyɛ se kɛ ɛkɛyɛ me sonvolɛ, na ɛkɛva Yizilayɛma mɔɔ ɛha la ɛkɛzie bɛ gyinlabelɛ dɛba ne. Mebamaa wɔayɛ maanle maanle ne mɔ kɛnlaneɛ, amaa me ngoanelielɛ ne adwu ewiade ɛleka biala.”

⁷Ɛdɛnkɛma, Yizilayɛ Kpɔnevolɛ ne, Yizilayɛ Nwuanzanwuanza Ko ne ɛlɛka ahile sonla ne mɔɔ le arelemgbunli sonvolɛ, mɔɔ maanle maanle ne mɔ ɛkpo ye, na bɛkyi ye kpole kpalɛ la kɛ, “Arelemgbunli banwu wɔ na bɛadwazo; arelemgbunli amra mrenya badu agua ɛ nyunlu, ɔboalekɛ Ɛdɛnkɛma, Yizilayɛ Nwuanzanwuanza Ko ne, mɔɔ ɛkpa nu ɛye wɔ la di nɔhalɛ.”

⁸ Ɛdɛnkɛma se, “Mekɛ dwule mɔɔ ɔwɔ kɛ menwu bɛ anwunvɔne la, membuale bɛ, mekɛ ne mɔɔ ɔwɔ kɛ medie bɛ ngoane la, memboale bɛ; mezinza bɛ, na mebɔ bɛ nwo bane, melua bɛ nwo zo me nee menli ne ɛyɛ ngyehyɛlɛ, kɛ bɛbadɛnla azɛlɛ ne azo, na bɛahyɛ azɛlɛ ne mɔɔ ɛdɔ mgbane la;

⁹mebaha meahile pilizama kɛ, ‘Bɛraze bɛhɔ’ mebaze menli mɔɔ de awozinli nu la kɛ, ‘Bɛrɛla wienyi nu.’ Bɛbadidi adehane ne mɔ, yɛɛ awoka ne mɔ azo bayɛ bɛ adidileka.

¹⁰ Ɛhɔne anzɛɛ nzuhɔne ɛnrɛhu bɛ, sɛnzɛne anzɛɛ anwoma wuluwulu ɛnrɛbɔ bɛ, ɔluakɛ ahenle mɔɔ nwu bɛ anwunvɔne la bali bɛ ti, yɛɛ ɔbava bɛ yeahɔ nzubula nwo.

¹¹“Mebakpakye adenle meado awoka ne mɔ anu, na meadu ademgbole meamaa bɛ.

¹²Bɛnlea, ɛhye mɔ vi moa bara, bɛvi sɔlɔ nee adɔleɛ afoa nu, yɛɛ bɛvi Asewan[9] azɛlɛ zo bɛbara.”

¹³Anwuma amra, bɛva anyelielɛ bɛdo edwɛne, O azɛlɛ ye azo amra, bɛli wulupe; O awoka, bɛdo edwɛne! Ɔluakɛ Ɛdɛnkɛma ɛkyekye ye menli ne arɛle, na ɔbanwu ye menli ne mɔɔ ɛlɛdi nyane la anwunvɔne.

¹⁴Noko Gyɛlusalɛmma se, “Ɛdɛnkɛma ɛkpo yɛ, yɛ Awulae arɛle ɛvi yɛ.”

¹⁵Yemɔti Ɛdɛnkɛma se, “Asoo ɛrɛladane arɛle bavi ɔ ra mɔɔ no nyɛfonlɛ, asoo ɔnrɛnwu ɔ ra nrenya mɔɔ yewo ye la anwunvɔne? Ɔyɛ a bɛ rɛle kɛvi bɔbɔ ɛdeɛ, noko mame, me rɛle ɛnrɛvi bɛ.

¹⁶Bɛnlea, mehɛlɛ bɛ aluma wɔ me sa akunlu; me nye wɔ bɛ suakpole ne bane ne mɔ anwo.

¹⁷“Bɛ suazilɛma ɛbo suabɔlɛma ne anwo zo, menli mɔɔ razɛkyele bɛ la bahɔ.

¹⁸Bɛva bɛ nye bɛbɔ bɛ nwo mgbɔlɔka bɛnlea, bɛboɔboa bɛ nloa, bɛlɛba bɛ nwo ɛkɛ. Medame Ɛdɛnkɛma mese: Suzuamgba ala mɔɔ medame a mele tease Nyamenle la, bɛ nye balie bɛ menli ne anwo kɛ anwoneɛ, na bɛava bɛaziezie bɛ nwo kɛ atɔfolɛ.

¹⁹“Nɔhalɛ, bɛ azɛlɛ ne mɔɔ bɛzɛkyele ye, bɛ maanle ne mɔɔ bɛdole ye mgbane la bayɛ ekyi amaa bɛdabɛ mɔɔ bɛbadɛnla nu la; na bɛdabɛ mɔɔ bɛzɛkyele bɛmɛ la badu ahɔ moa moa.

²⁰Bɛ anwubɛnyunlu mekɛ nu ngakula mɔɔ bɛwole bɛ la baha amaa bɛade bie kɛ: ‘Azɛlɛ ne le ekyi maa yɛ; bɛdɛlɛ nu bɛmaa yɛnyia ɛleka yɛdɛnla.’

²¹Akee bɛbaha ye bɛ ti akunlu kɛ, ‘Nwane a wole ngakula ɛhye mɔ manle yɛ a? Yɛ mra ne mɔ wule, yɛpɛle awolɛ, bɛhyele yɛ nuokɛ bɛhɔle nlɔnu; na nwane a wole menli ɛhye mɔ a? Bɛnlea, ɔhale me ngomekye ala; nienwu a akee ɛhye mɔ vi ɛra a.’ ”

²²Awulae Nyamenle ne se, “Bɛnlea, mebamaa me sa zo meahile maanle maanle. mebanwɔha ye meado bɛ sɛkɛlɛneɛ, na bɛbava bɛ mra mrenya ne mɔ bɛarɛlɛ bɛ, bɛbazoa bɛ mra mraalɛ ne mɔ bɛ bati bɛara.

²³Arelemgbunli bayɛ bɛ dɔmagyama, na arelemgbunli mraalɛ ayɛ bɛ baviavolɛma. Bɛbazi bɛ ti aze, bɛabu ndwɛlɛ wɔ bɛ nyunlu, na bɛatafe bɛ gyakɛ anwo munlutu. Na akee bɛbanwu kɛ medame a mele Ɛdɛnkɛma a; bɛdabɛ mɔɔ bɛkendɛ me moalɛ la anyunlu ɛnrɛgua aze.”

²⁴Asoo katakyie sɔ awie nu a bɛkola ye die? Asoo atisesebɛnli kye awie nuokɛ a bɛkola ye die?

²⁵Nɔhalɛ, kɛ Ɛdɛnkɛma se la ɛne, “Sonla mɔɔ katakyie ɛhye ye nuokɛ la, bɛbalie ye, yɛɛ bɛbalie mɔɔ atisesebɛnli ne ɛhye ye la. Ɔluakɛ me nee menli mɔɔ nee bɛ ko la baho, yɛɛ mebalie bɛ mra ne mɔ ngoane.

²⁶Mebamaa menli mɔɔ ɛlɛsisi bɛ la ali bɛdabɛ bɛ ngome bɛ nwonane, na bɛanlo bɛdabɛ bɛ ngome bɛ mogya bɛabo kɛ bɛnlo nwanye. Akee menli kɔsɔɔti banwu kɛ medame a mele Ɛdɛnkɛma, bɛ Dievolɛ ne, bɛ Kpɔnevolɛ ne, Yizilayɛ Katakyie Ko ne a.”