Read Nzema Aye 5 Bible Online

Aye 5 - Nzema bible

Aye 5

¹ Bɛmaa mendo edwɛne memaa me kulovolɛ, ye vanye egyinli ne anwo ɛhulolɛ edwɛne. Ɛnee me kulovolɛ ne lɛ ye vanye egyinli wɔ boka bie mɔɔ kye aleɛ la azo.

²Ɔvundunle azɛlɛ ne ɔyeyele zolɛ awolɛ ne mɔ, na ɔluale ye vanye ma kpalɛ; ɔzile tawa wɔ egyinli ne avinli, na ɔvunle kuma mɔɔ ɔbahwihwi vanye ma ne nu la. Akee ɔhendɛle kɛ ye vanye egyinli ne kɛzo ma kpalɛ, na vanye ma ne bolole la ɛnee biala yɛ ɛnwonle.

³Yemɔti me kulovolɛ ne se, “O bɛmɛ Gyɛlusalɛmma nee bɛmɛ Dwudama, mebodo bɛ, bɛbua me nee me vanye egyinli ye edwɛkɛ ne bɛmaa me.

⁴Duzu debie a anrɛɛ ɔwɔ kɛ meyɛ wɔ me vanye egyinli ne anu mɔɔ meanyɛ a? Ɛnee me nye la kɛ ɔkɛzo vanye ma kpalɛ, na duzu ati a ɔzole ma ɛnwonle a?

⁵“Akee meka meahile bɛ, mɔɔ meyɛ me vanye egyinli ne la ɛne. Mebubu ɛhane ne mɔɔ mehye ye nwolɛ la meamaa nane ali vanye ne. Bane biala mɔɔ melie ye nwolɛ la, mebubu ye meamaa bɛaratietia ma ne mɔ azo.

⁶Meto ye ɛkɛ ne mgbane, bɛnrɛbɔ nuhua ndile, yɛɛ bɛnrɛpepɛ vanye mbaka ne mɔ azo. Ndile nee mbowule bafifi ava ye. Eza menrɛmaa ezule ɛnrɛdɔ ɛnrɛgua zolɛ.”

⁷Ɔluakɛ Tumivolɛ Ɛdɛnkɛma vanye egyinli ne, yemɔ a le Yizilayɛ abo zo amra ne; menli mɔɔ wɔ Dwuda la amuala, bɛmɛ a bɛle ye ma ngɛnlɛma ne mɔɔ ɔluale la. Ɛdɛnkɛma nleanle kɛ ɔkɛnwu pɛlepɛlelilɛ bɛ nu, na ɔnwunle mogyahanlɛ; ɔnleanle kɛ ɔkɛnwu tenleneyɛlɛ, na nea, ɔnwunle ɛsisilɛ nee ɛzunlɛ.

⁸Munzule ɛha bɛdabɛ mɔɔ bɛfa azua bɛbɔ azua zo, bɛfa ɛya avule bɛbɔ avule zo, bɛmaa yera kɛ akee ɛleka ɛnle ɛkɛ mɔɔ sonla tɛnla a ɔyɛ boɛ a, na bɛgyakyi wɔ kɛ ɛ ngomekye ɛdɛnla azɛlɛ tɛtɛlɛ ne azo.

⁹Tumivolɛ Ɛdɛnkɛma ɛha ndane ɛmaa mede kɛ, “Nɔhalɛ, azua dɔɔnwo bayɛ azuadu; azua mgbole ngɛnlɛma ne mɔ, awie ɛnrɛdɛnla nuhua.

¹⁰Ɔluakɛ vanye egyinli ala mɔɔ ye kpole kɛyɛ polu bulu nee nwiɔ nee foa ko la bazo ma mɔɔ ɛtwihwi nuhua nwanye a ɔkɛyɛ litili mɔtwɛ ala; yɛɛ saa bɛdua abɛlɛ ma litili ɛya ko abulatwɛ a bɛbanyia abɛlɛ ma litili bulu nee mɔtwɛ ala.”

¹¹Munzule ɛha bɛdabɛ mɔɔ bɛdwazo aleɛbahye bɛno nza ɛsesebɛ, nee bɛdabɛ mɔɔ nɔsolɛ nu bɛsi epe bɛno nwanye toonwo bɛtinda la.

¹²Getaa mgbole nee ngyikyi, fulutu nee akɛya yɛɛ bɛbɔ na bɛno nwanye wɔ bɛ ɛvoyialilɛ bo a; bɛmbu Ɛdɛnkɛma gyima mɔɔ yeli la bie, yɛɛ bɛnnwu ɔ sa anloa gyima mɔɔ yeyɛ la.

¹³Yemɔti kɛmɔ me menli ne ɛnlɛ adwenle la, bɛkye bɛ bɛkɔ nlɔnu; ɛhɔne ku bɛ menli titile ne mɔ toonwo bɛtɔ, yɛɛ nzuhɔne maa bɛdabɛ ɛwolaa ne mɔɔ bɛha la kete.

¹⁴Zɔhane ati ɛbolɔ ɛbuke ɔ nloa wanaanwo ɛlɛme Gyɛlusalɛm menli titile nee menli ne nee bɛ ɛdeɛdeanlɛ ne amuala.

¹⁵Sonla ti ɛzi aze, menli nyunlu ɛgua aze, yɛɛ bɛdabɛ mɔɔ bɛmemaa bɛ nwo zo la anye ɛnwoso.

¹⁶Na Tumivolɛ Ɛdɛnkɛma pɛlepɛlelilɛ ɛhɔ anwuma, Nwuanzanwuanza Nyamenle ne kile maa bɛnwu kɛ ɔle nwuanzanwuanza wɔ tenleneyɛlɛ nu.

¹⁷Akee mboane mralɛ ne mɔ baluolua azua bubulera ne mɔ anu adidi.

¹⁸Munzule ɛha bɛdabɛ mɔɔ bɛfa adalɛ bɛtwehwe dwɛwɔlɛ bɛmaa bɛ nwo, na bɛtwe ɛtane kɛ asɛɛ bɛtwe ehwili nyɛma la.

¹⁹Dahuu bɛ edwɛkɛ a le kɛ, “Bɛmaa ɔha ɔ nwo ɔyɛ ye waa, ɔyɛ ye gyima ne ndɛndɛ ɔmaa yɛnlea. Bɛmaa Yizilayɛ Nwuanzanwuanza Ko ne ɛrɛla, ɛrayɛ mɔɔ yehyehyɛ la ɔmaa yɛnlea!”

²⁰Munzule ɛha menli mɔɔ nwu ɛtane a bɛse ɔle kpalɛ na bɛnwu kpalɛ a bɛse ɔle ɛtane la. Bɛfa wienyi bɛyɛ awozinli na bɛava awozinli bɛayɛ wienyi, ɛnwonle yɛ bɛ menlemenle, yɛɛ menlemenle yɛ bɛ ɛnwonle.

²¹Munzule ɛha bɛdabɛ mɔɔ bɛdwenle kɛ bɛze nrɛlɛbɛ na bɛnea a bɛze ndɛne la.

²²Munzule ɛha bɛdabɛ mɔɔ bɛlie duma kɛ bɛkola nza no na bɛkola bɛfa nza ngakyile bɛfonla nu bɛno la.

²³Bɛdie ndoloboa na bɛgyakyi menli mɔɔ di fɔlɛ la, na bɛmaa menli mɔɔ ɛnze nwolɛ bie la anwo kyele bɛ.

²⁴Yemɔti kɛ senle si yela ewula na ndile welera si sɔ senle nu la, zɔhane ala yɛɛ bɛ ndinli bakpɔlɔ na bɛ ndotolo akpolo azande kɛ munlutu a, ɔluakɛ bɛkpo Tumivolɛ Ɛdɛnkɛma mɛla ne na bɛhyi Yizilayɛ Nwuanzanwuanza Ko ne anloa edwɛkɛ.

²⁵Zɔhane ati Ɛdɛnkɛma ɛya ne dwazole ye menli ne anwo zo, ɔdenrɛle ɔ sa ɔzɛkyele bɛ, na awoka ne mɔ kpusule. Bɛ avunli yɛle kɛ ewula wɔ gua ne mɔ azo. Ɛhye mɔ amuala anzi, Ɛdɛnkɛma ɛya ne ɛtɛdwole, na ɔ sa ne mɔɔ yedenrɛ nu la tɛbɔ ɛkɛ.

²⁶Ɛdɛnkɛma bamaa maanle bie mɔɔ wɔ moa moa la sɛkɛlɛneɛ, na yeabɔ nvonloma yeavɛlɛ ye, na nea, ɔbara ndɛndɛ ne ala.

²⁷Ɛlɔnema ne mɔ biala ɛnrɛvɛ, biala ɛnrɛdu koti, biala ɛnrɛbɔ ngɔsɔkɛ na yealafe, bɛ akyeso ɛnrɛzianyi yɛɛ bɛ mgbɔlaboa nyɛma ɛnrɛde.

²⁸Bɛ ɛda mbaka ne mɔ yɛ nla, bɛkpo bɛ ɛda ne mɔ, bɛ mgbɔnwɔ ne mɔ agyakɛ babonle ne mɔ le kɛ ɛtwɛlɛboɔ, yɛɛ bɛ konle ehwili ne mɔ anwo ndɛne le kɛ ahumuakyima.

²⁹Bɛ ne alɛra le kɛ awenade mɔɔ ɛlɛtea la, na bɛtea kɛ awenade ngakula la. Bɛkulu bɛ bo na bɛtɔ mɔɔ bɛkye ye la anwo zo, bɛkye ye na bɛtwe ye bɛkɔ, yɛɛ awie ɛngola ɛnlie ye.

³⁰Mekɛ ne anu, bɛbahulu kɛ nyevile. Na saa awie to ɔ nye nea maanle ne a, ɔbanwu kɛ awozinli nee nyane ɛva ye, na amungu ɛheda zo.