Read Nzema Aye 50 Bible Online

Aye 50 - Nzema bible

Aye 50

¹Ɛdɛnkɛma se, “Bɛ nli kɛlata ne mɔɔ mengɛlɛle membɔle ye ewole, menvoanle ye la wɔ nienwu? Anzɛɛ nwane a metua ye kakɛ, mɔɔ ɔlua zo medɔne bɛ memaa ye a? Bɛnlea, ɔlua bɛdabɛ bɛ ɛtane nee bɛ mɛladonlɛ ti yɛɛ bɛdɔne bɛ na bɛvoa bɛ nli a.

²“Kɛmɔti ɛ, membale la ɛnee awie ɛnle ɛkɛ ɔ? Menvɛlɛle la, ɛnee awie ɛnle ɛkɛ mɔɔ die zo ɔ? Asoo me sa ɛyɛ ezinraa mɔɔ yemɔti mengola memkpɔne bɛ a? Anzɛɛ menlɛ tumi mɔɔ mefa medie bɛ ngoane ɔ? Bɛnlea, metendɛ a nyevile sesa; memaa azule ne mɔ kakyi ɛsɛlɛ, fɛlɛ mɔɔ wɔ nu la ɛnnyia nzule, nzuhɔne maa bɛwu na bɛbɔ.

³Memaa awozinli fa anwumaneamra, na memaa bɛkeda ɛrele.”

⁴Awulae Nyamenle ɛmaa me ɛnloanlɛ, amaa meahilehile, na meanwu edwɛkɛ kpalɛ mɔɔ meka a ɔkɛmaa mɔɔ anwo ɛbɛlɛ ye la anwosesebɛ a. Nwonlomɔ biala ɔtunwue me, ɔbuke me nzo, amaa meade mɔɔ ɔkilehile me la.

⁵Awulae Nyamenle ɛbuke me nzo, yɛɛ meande ɔ nwo atua, meangakyi me nzi meanzi ye.

⁶ Mengakyile me nzi memanle menli mɔɔ bo me la, menvale me kɛsa memanle bɛdabɛ mɔɔ bɛdudule me kɛsa la; mɔɔ bɛtoto me nyunlu nyɛlɛ, bɛgua me nyunlu aze la, meanva me nyunlu meanvea.

⁷Ɔluakɛ Awulae Nyamenle ne boa me, yemɔti me rɛle ɛtɛbɔle. Zɔhane ati meyɛ me nyunlu kɛ ɛtwɛlɛboɔ; meze kɛ me nyunlu ɛnrɛgua aze;

⁸ mɔɔ di me edwɛkɛ maa me la bikye me. Nwane a kɛhola me a? Ɔdwazo ɔrɛla ɔmaa yɛbɔ ye zo. Nwane a le me kpɔvolɛ a? Ɔdwazo ɔrɛla ɛke.

⁹Bɛnlea, Awulae Nyamenle ne boa me; nwane a kɛbua me fɔlɛ a? Bɛnlea, bɛ muala bɛbatete kɛ ɛdanlɛ, ɛlɛtɛba bali bɛ atete bɛ.

¹⁰Nwane a wɔ bɛ avinli mɔɔ sulo Nyamenle, na ɔyɛ tieyɛ ɔmaa ye sonvolɛ ne, mɔɔ lua awozinli nu na ɔnlɛ kɛnlaneɛ, noko ɔ rɛle wɔ Ɛdɛnkɛma anu, na ɔfa ɔ nwo ɔmaa ye Nyamenle ne la?

¹¹Bɛdabɛ mɔɔ bɛwuda menli nzi senle, na bɛsɔ menli nwo tɛkɛ la, bɛnlea! Bɛlua bɛ senle ne mɔɔ bɛwuda, nee bɛ tɛkɛ ne mɔ wienyi ne anwo bɛhɔ! Debie mɔɔ bɛbanyia ye bɛavi me ɛkɛ ne la ɛne: nyane ala a baha bɛ a.