Read Nzema Aye 51 Bible Online

Aye 51 - Nzema bible

Aye 51

¹Ɛdɛnkɛma se, “Bɛdabɛ mɔɔ bɛkpondɛ ngoane, bɛdabɛ mɔɔ bɛkpondɛ Ɛdɛnkɛma moalɛ la, bɛdie! Bɛnlea bodane ne mɔɔ bɛkpukele bɛyele bɛ nu, awolɛdulɛ kuma ne mɔɔ bɛdule bɛ nu la.

²Bɛnlea bɛ nlenya Ebileham, nee bɛ nla Sɛla mɔɔ zole bɛ; ɔluakɛ mɔɔ ɛnee Ebileham ɛtɛwole ralɛ la, yɛɛ menvɛlɛle ye a. Na menyilale ye memanle ɔ bo zo amra yɛle dɔɔnwo.

³“Ɛdɛnkɛma bakyekye Gyɛlusalɛmma arɛle, ɔbakyekye bɛdabɛ mɔɔ bɛde azuadu nu la arɛle; ɔbamaa Gyɛlusalɛm fienemgbole ahakyi kɛ Yidɛn tola, yeamaa ɛsɛlɛ ne ayɛ kɛ Ɛdɛnkɛma tola nu. Fɛlɛko nee anyelielɛ bara ɛkɛ, na bɛado ayɛlɛyelɛ edwɛne bɛayɛ me mo.

⁴“Bɛdie me, me menli, me maanlema, bɛyɛ ɛnzonlɛ bɛdie me, ɔluakɛ mebali mɛla, na me pɛlepɛlelilɛ bayɛ kɛnlaneɛ amaa maanle maanle ne mɔ.

⁵Me ngoanelielɛ ne ɛbikye kpalɛ, me ngoanelielɛ ne ɛdwu bɛ nwo zo dɛbadɛba, na medame mumua ne mebazie maanle maanle ne mɔ. Maanle maanle mɔɔ wɔ moa la ɛlɛkendɛ me, bɛ nye la kɛ menwɔlie bɛ.

⁶Bɛdo bɛ nye anwuma bɛnlea, na bɛdo bɛ nye bɛnlea azɛlɛ ye, ɔluakɛ anwuma baminliminli kɛ esike; azɛlɛ ye batete kɛ ɛdanlɛ, na bɛdabɛ mɔɔ bɛde zolɛ la bawu kɛ ngokowule. Me ngoanelielɛ ne wɔ ɛkɛ dahuu, na me konimlilɛ ɛnrɛwie ɛlɛ.

⁷“Bɛmɛ tenlenema, bɛdie me, bɛmɛ mɔɔ bɛdi me mɛla zo, bɛmmasulo menli ngehanleɛ, yɛɛ bɛmmamaa bɛ ahonle tu bɛ ɛnwunlonwunlanlɛ nwo.

⁸Ɔluakɛ ɛlɛtɛba bali bɛ kɛ bɛdi ɛdanlɛ, yɛɛ sone bali bɛ kɛ bɛdi boane enrinli la; na me konimlilɛ ne badɛnla ɛkɛ ne dahuu, me ngoanelielɛ ne badwu awolɛndoazo kɔsɔɔti anwo zo.”

⁹Dwazo, O Ɛdɛnkɛma, fa wɔ anwosesebɛ nee wɔ tumi ne dwazo boa yɛ. Dwazo, kɛmɔ mɔmoane ɛyɛle na ɛboale awolɛndoazo mɔɔ ɛze ɛhɔ la. Asoo tɛ wɔmɔ a ɛpepɛle nyevizonle Releehabe anu azinli azinli, na ɛwɔle nane anwo ɛzulolɛ ne mɔɔ le kɛ ɛlɛnrɛne la atwɛ la?

¹⁰Asoo tɛ wɔmɔ a ɛmanle nyevile ne sesanle, ye buma ne nzule muala wele, na ɛmanle nyevile buma ne yɛle ademgbole, ɛmanle wɔ menli ne mɔɔ wɔkpɔne bɛ la luale nu la?

¹¹Menli mɔɔ Ɛdɛnkɛma ɛkpɔne bɛ la bazia ara, bɛbava edwɛndolɛ bɛara Gyɛlusalɛm. Bɛ nye balie dahuu; bɛbali fɛlɛko na bɛ nye alie, na bɛnrɛnwu nyane, yɛɛ alɔbɔlɛ ɛnrɛhu bɛ bieko.

¹²Ɛdɛnkɛma se, “Medame a mele Nyamenle mɔɔ kyekye bɛ rɛle a. Duzu ati a bɛsulo sonla mɔɔ ɛngyɛ na yeawu, mɔɔ ye ngoane le kɛ ndile la ɛ?

¹³Kɛmɔ bɛ kpɔvolɛ ne ɛwie ɛya fa, na yeva yezie ɔ nyunlu kɛ ɔsɛkye bɛ la ati, dahuu bɛwɔ ɛzulolɛ nu. na bɛ rɛle ɛvi Ɛdɛnkɛma, bɛ Bɔvolɛ ne mɔɔ bɔle anwuma, na ɔwulale azɛlɛ ye adiabo ne mɔ aze la, Na kpɔvolɛ ne ɛyavalɛ ne dwu nienwu?

¹⁴Ɔnrɛhyɛ biala na mɔɔ bɛholo ɔ kɔme zo la anwo adɔ ye; ɔnrɛwu yɛɛ ɔnrɛnwu Ewule Kuma ne, yɛɛ ɔ nloa anu aleɛ ɛnrɛbɔ ye.

¹⁵“Medame a mele Ɛdɛnkɛma bɛ Nyamenle ne, mɔɔ maa nyevile azɛlɛkye kulu. Me duma a le Tumivolɛ Ɛdɛnkɛma.

¹⁶Meva me edwɛkɛ mewula ɛ nloa, yɛɛ meva wɔ mevea me ndɛba abo. Medame a membɔle anwuma, na menwulale azɛlɛ ye adiabo aze, na menzele Gyɛlusalɛmma kɛ, ‘Bɛle me menli’ a.”

¹⁷ O Gyɛlusalɛmma, bɛdwazo, bɛheha bɛ nwo, bɛheha bɛ nwo! Bɛmɛ, bɛnlo Ɛdɛnkɛma ndeanlɛ kɔpo ne anu, ye ɛya kɔpo ne ɛra bɛ nwo zo ɛlɛ; bɛmɛ, bɛnlonle ye ɛya kɔpo ne anu bɛmanle ɔdɔle mgbane, na ɔmanle bɛyɛle sesɛsesɛ.

¹⁸Mralɛ mrenya bebelebe ne mɔɔ bɛwo bɛ la, bɛnnyia nuhua ko bɔbɔ ɛnli bɛ ti. Mralɛ mrenya bebelebe ne mɔɔ bɛtete bɛ la, bɛnnyia nuhua ko ɛnzɔ bɛ avinli.

¹⁹Edwɛkɛ mgbole nwiɔ ɛhye mɔ ɛsisi bɛ nwo zo: Konle ɛzɛkye bɛ maanle ne, ɛhɔne nee ewule ɛhu menli ne; awie ɛnyɛ bɛ gyakɔ ɛnkyekye bɛ rɛle.

²⁰Bɛ mra mrenya anye zo ɛbulu, bɛgua ye takagyaa wɔ guabile ne mɔ azo kɛ kɛtɛboɛ mɔɔ ɛdo ɛhane, Ɛdɛnkɛma ɛya ne wɔ bɛ nwo zo kpole, bɛ Nyamenle ne ɛdea bɛ.

²¹Yemɔti bɛmɛ mɔɔ bɛlɛdi nyane a, bɛmɛ mɔɔ bɛanno nwanye na bɛbo a, bɛdie ɛhye:

²²Ɛdɛnkɛma, bɛ Awulae, bɛ Nyamenle ne mɔɔ die ye menli ne ati la se, “Bɛnlea, melie kɔpo ne mɔɔ maa bɛyɛ sesɛsesɛ, me ɛya kɔpo ne mɔɔ maa bɛte nyane la mevi bɛ sa nu, bɛnrɛnlo nuhua bieko;

²³Mebava meawula menli mɔɔ ɛlɛsisi bɛ, mɔɔ ɛha ɛhile bɛmɛ Yizilayɛma kɛ, ‘Bɛbutu bɛmaa yɛtietia bɛ nwo zo,’ na bɛva bɛ nzi bɛyɛ ndɛtɛlɛ bɛtietia zo la, na bɛ nzi ɛyɛ guabile mɔɔ bɛdua zolɛ la asa anu.”