Read Nzema Aye 52 Bible Online

Aye 52 - Nzema bible

Aye 52

¹ Gyɛlusalɛmma, bɛdwazo! Bɛdwazo, bɛmaa bɛ nwo ɛyɛ se, bɛva bɛ adɛladeɛ ngɛnlɛma ne mɔ bɛwula, O Gyɛlusalɛm, suakpole nwuanzanwuanza azo amra, ɔluakɛ awie biala mɔɔ anwo ɛnde na ɔnzonle Nyamenle la ɛnrɛra suakpole ne azo ɛlɛ.

²O Gyɛlusalɛmma mɔɔ bɛhye bɛ nuokɛ, bɛdwazo bɛvi ndɛtɛlɛ ne anu; bɛye bɛ kɔme nwɔnzɔnwɔnzɔ ne mɔ, O Zayɔnoma mɔɔ bɛhye bɛ nuokɛ a.

³Ɔluakɛ Ɛdɛnkɛma se, “Bɛandɔne bɛ bɛanlie debie, yemɔti bɛnrɛdua bɛ ti ezukoa biala wɔ bɛ ɛkpɔnelɛ nu.

⁴Ɔluakɛ medame Awulae Nyamenle, mese: Me menli ne hɔle Yigyibiti alumua ne kɛ bɛkakpɔsa lɔ ala, na Aseleama sisile bɛ mgbane gyɛne ne ala.

⁵ Na kɛkala medame Ɛdɛnkɛma, duzu a menwu ye ɛke a? Mɔɔ menwu ye la a le kɛ bɛhye me menli ne bɛhɔ mgbane. Bɛ arelemgbunli ne mɔ su, yɛɛ dahuu bɛgua me duma ne anwo evinli.

⁶Yemɔti me menli ne banwu me duma. Mekɛ ne anu bɛbanwu kɛ medame a melɛtendɛ la; medame ɛne.”

⁷ Ahenle ne mɔɔ lua awoka ne mɔ azo lɔ, mɔɔ lɛ nrɛlaleɛ kpalɛ ɛlɛba la ɛralɛ nu le kɛnlɛma, ɔbɔ anzonudwolɛ nolo, na ɔlɛ nrɛlaleɛ kɛnlɛma kpalɛ, ɔbɔ ngoanelielɛ nolo, na ɔka ɔkile Zayɔn kɛ, “Wɔ Nyamenle ne di belemgbunli.”

⁸Bɛdie, bɛ sinzavolɛma ɛlɛtea nu, bɛbɔ nu bɛto edwɛne anyelielɛ nu, ɔluakɛ bɛdabɛ bɛnwu ye bɛ nye amunwiɔ kɛ Ɛdɛnkɛma ɛzia ɛlɛba Zayɔn.

⁹Bɛ muala bɛbɔ nu bɛdo edwɛne, bɛdabɛ mɔɔ bɛdede Gyɛlusalɛm awuke mɔɔ ɛbɔ la anu la, ɔluakɛ Ɛdɛnkɛma ɛnwu ye menli ne anwunvɔne, yekyekye ye menli ne arɛle.

¹⁰Ɛdɛnkɛma ɛva ye tumi nwuanzanwuanza ne ɛwa maanle maanle ne mɔ anye, na ewiade amra amuala bɛanwu yɛ Nyamenle ne ngoanelielɛ ne.

¹¹ Bɛhɔ, bɛhɔ, bɛvi Babelonia bɛdwazo bɛhɔ, bɛmmafa bɛ sa bɛka debie biala mɔɔ evinli ɛha ye la. Bɛhɔ na bɛhɔnlua bɛ nwo, bɛmɛ mɔɔ bɛsoa Ɛdɛnkɛma dwora ne mɔ la.

¹²Bɛnrɛhɔ ye ndɛndɛ ndɛndɛ, yɛɛ bɛnrɛnriandi, ɔluakɛ Ɛdɛnkɛma ɔdaye ɔbali bɛ nyunlu, Yizilayɛ Nyamenle ne bali bɛ nzi.

¹³Bɛnlea, me sonvolɛ ne bakpazi, bɛbali ye eni na bɛamaa ye zo. Ɔbayɛ sonlakpole kpalɛ.

¹⁴Ɔyɛle bɛdabɛ dɔɔnwo mɔɔ bɛnwunle ye la azibɛnwo, ɔhakyile bɔkɔɔ mɔɔ ɛnee ɔnzɔho sonla a, yeanzɔho sonla bɔbɔ.

¹⁵ Zɔhane ala yɛɛ maanle maanle dɔɔnwo banwu ye na bɛabɔ mgbatike, yemɔ ɔ ti arelemgbunli baha bɛ nloa ado nu, ɔluakɛ mɔɔ bɛtɛkanle bɛtɛkilele bɛ la, bɛbanwu ye, yɛɛ mɔɔ bɛtɛtele ye ɛlɛ la, bɛbade ɔ bo.