Read Nzema Aye 53 Bible Online

Aye 53 - Nzema bible

Aye 53

¹ Nwane a ɛlie mɔɔ yɛde la ɛli a? Nwane a bɛye Ɛdɛnkɛma tumi ne bɛhile ye a?

²Ɔluakɛ ɔfifile kɛ baka ekyi bie mɔɔ zɔle ndinli wɔ azɛlɛ resee zo; ɔnle kɛnlɛma anzɛɛ ɔnzɔho debie na yɛanlea, yɛɛ ɔnzɔ ɛnyelɛ na yɛ nye abolo ye.

³Menli kpole ye yɛɛ bɛambu ye; ɔnwunle amaneɛ na ɔdele nyane; ɔyɛle sonla mɔɔ menli nwu ye a bɛye bɛ nye bɛto ɛbɔ nu, bɛkpole ye yɛɛ yɛambu ye bie.

⁴ Nɔhalɛ, yezoa yɛ amaneɛnwunlɛ kɔsɔɔti, yɛɛ yezoa yɛ nyanenwunlɛ kɔsɔɔti; noko yɛ adwenle a le kɛ, ye amaneɛnwunlɛ ne le Nyamenle ndeanlɛ.

⁵ Noko yɛ mɛladonlɛ ne mɔ ati bɛbodɛbodale ye, bɛbodɛbodale ye wɔ yɛ ɛtane ne mɔ ati; bɛvale yɛ nwo ndeanlɛ bɛguale ɔ nwo zo, ye empele mɔɔ bɛbilale ye la ɛyɛ yɛ ayile.

⁶ Yɛ muala yɛminli kɛ mboane la; yɛ nuhua biala ɔdaye yeva ye adenle ɛdeɛ zo; Ɛdɛnkɛma ɛva yɛ ɛtane ne mɔ amuala ɛgua ɔ nwo zo.

⁷ Bɛsisile ye, na bɛhilele ye nyane, noko yeambuke ɔ nloa; ɔle kɛ boane ralɛ mɔɔ bɛ nee ye ɛlɛkɔ ahunleɛ, yɛɛ ɔle kɛ boane mɔɔ bɛhye ye bɛlɛpepɛ ɔ nwo enrinli la. Ɔdɔle mumule, yeambuke ɔ nloa.

⁸Nzisilɛ nu, bɛbuale ye ewule fɔlɛ na bɛ nee ye hɔle; awolɛndoazo zɔhane amra, biala andwenle nwo kɛ bɛlɛye ye bɛavi anyewɔzoma azɛlɛ zo, bɛhunle ye wɔ me menli ne mɛladonlɛ ti.

⁹ Bɛbɔle ye nla bɛbokale amumuyɛma anwo, bɛziele ye wɔ sukoavolɛma avinli. Yeanyɛ ɛtane biala, yɛɛ yeambɔ adalɛ ɛlɛ.

¹⁰Ɛdɛnkɛma se, “Noko ɔle me ɛhulolɛ kɛ bɛkɛbodɛboda ye, na ɔkɛnwu amaneɛ dɔɔnwo; na ɔkɛva ɔ nwo ɔkɛbɔ azu ɔkɛmaa ɛtane. Ɔbanyi yeahyɛ na yeanwu ɔ bo zo amra, na ɔlua ɔ nwo zo Ɛdɛnkɛma ɛhulolɛ ne ali munli.

¹¹Ɔbanwu ye amaneɛnwunlɛ ne abo aleɛ na ɔ nye alie, na ɔlua me sonvolɛ tenlene ko ne anwo zo, bɛbava menli dɔɔnwo kɛ bɛle tenlenema; na ɔbazoa bɛ ɛtane ne mɔ anwo ndeanlɛ.

¹² Yemɔti mebamaa ye ɛleka wɔ mgbolema avinli, na ɔ nee anwosesebɛma ahyɛ ninyɛne mɔɔ bɛnyianle bɛ wɔ konle nu la, ɔboalekɛ ɔvale ɔ nwo ɔmanle kɛ bɛhu ye, na bɛdianle ye bɛbokale mɛladonlɛma anwo. Ɔvale menli dɔɔnwo ɛtane ɔdole ɔ nwo zo, na ɔkpale mɛladonlɛma ati kyɛlɛ.”