Read Nzema Aye 54 Bible Online

Aye 54 - Nzema bible

Aye 54

¹ Ɛdɛnkɛma se, “O motanli mɔɔ anwo ralɛ a, to edwɛne; to edwɛne na maa ɛ ne ɛhɔ anwuma, wɔmɔ mɔɔ ɛtɛtele awolɛ nyane ɛlɛ a! Ɔluakɛ raalɛ ne mɔɔ bɛkpo ye la amra bazo dɔɔnwo adɛla raalɛ ne mɔɔ de agyalɛ ne abo la. Medame Ɛdɛnkɛma a mese a.

²Buke wɔ ndanlɛ sua ne anu, na tɛlɛ wɔ mgbɛnu ndanlɛ ne mɔ anu, mmagyakyi, maa ndanlɛ sua nyɛma ne mɔ ɛyɛ ndendenle, na maa adakola ne mɔ anu ɛyɛ se.

³Ɔluakɛ ɛbadɛlɛ wɔahɔ fema zo nee bɛne zo, na ɛ bo zo amra bava maanle ne amuala, na menli ayi azuamgbole mɔɔ ɛyɛ azuadu la.

⁴Mmasulo, ɔluakɛ ɛ nyunlu ɛnrɛgua aze; mmamaa wɔ ahonle tu, na awie ɛnrɛgua ɛ nyunlu aze, ɔluakɛ ɛ rɛle bavi wɔ mbɛlɛra nu anyiemgba ne, yɛɛ ɛnrɛhakye wɔ kunlanehyilɛ nyanenwunlɛ ne bieko.

⁵Ɔluakɛ ɛ hu a le wɔ Bɔvolɛ ne, ye duma a le Tumivolɛ Ɛdɛnkɛma; Yizilayɛ Nwuanzanwuanza Ko ne a le wɔ Kpɔnevolɛ ne, bɛfɛlɛ ye ewiade amuala Nyamenle.

⁶“Ɔluakɛ medame Ɛdɛnkɛma, mevɛlɛ wɔ kɛ yelɛ mɔɔ bɛkpo ye na ɔlɛdi nyane, kɛ yelɛ mɔɔ bɛkɛvoa ye ye mbɛlɛra nu la, medame wɔ Nyamenle a mese a.

⁷Ɔluakɛ mekɛ ekyi bie memkpole wɔ, noko mebava anwunvɔnezelɛ kpole kpalɛ meazia meava wɔ.

⁸Menvale ɛya kpole mendwenle me nwo mekɛ ekyi, mendole me nye ɛbɔ nu, noko mebava ɛhulolɛ mɔɔ ɛnwie ɛlɛ la meanwu wɔ anwunvɔne, medame Ɛdɛnkɛma, wɔ Kpɔnevolɛ ne a mese a.

⁹ “Ɔluakɛ ɛhye kakye me Nowa mekɛ zo, mɔɔ menganle ndane kɛ menrɛmaa nzule mɔɔ le kɛ Nowa mekɛ zo ɛdeɛ ne la ɛnrɛyi ɛnrɛva azɛlɛ ye bieko la. Yemɔti meha ndane kɛ menrɛva ɛ nwo ɛya bieko, yɛɛ menrɛhwi ɛ nyunlu bieko.

¹⁰Awoka mgbole badudu ahɔ, awoka ngyikyi bavi bɛ bo zo ne mɔ, na me ɛhulolɛ kpundii ne ɛnrɛvi ɛ nwo ɛlɛ, yɛɛ me anzonudwolɛ ngyekyeleɛ ne ɛnrɛkpa nwo ɛlɛ, medame Ɛdɛnkɛma, mɔɔ menwu wɔ anwunvɔne la a mese a.”

¹¹ Ɛdɛnkɛma se, “O wɔmɔ mɔɔ ɛlɛdi nyane, wɔ adwenle ɛha ɛbɔ nu, na awie ɛnkyekye ɛ rɛle a, nea, mebayɛ wɔ awolɛ ne mɔ memeamemea, na meava awolɛ mɔɔ sonle bolɛ la meawula wɔ adiabo ne.

¹²Mebava ezukoa bolɛ meazi wɔ tawa ne mɔ, meava awolɛ mɔɔ sɔ memeamemea la meaduodua wɔ nlenkɛ mgbole ne mɔ ɛbonle, na meava ezukoa awolɛ mɔɔ sonle bolɛ la mealie wɔ bane ne mɔ.

¹³ “Ɛdɛnkɛma bahilehile ɛ mra mrenya ne mɔ, na ɛ mra mrenya ne mɔ bakpazi kpole kpalɛ.

¹⁴Ɛbalua tenleneyɛlɛ zo wɔamaa ɛ nwo ayɛ se, awie ɛnrɛsisi wɔ, yɛɛ ɛnrɛzulo; yɛɛ ɛzulolɛ biala ɛnrɛbikye wɔ.

¹⁵Saa awie fa konle ba a, ɛnee tɛ me ɔ; awie mɔɔ kɛva ye konle kɛdoa wɔ la, ɛdawɔ ti, ɔbali akoatɔ.

¹⁶“Bɛnlea, mebɔ dwinvolɛ mɔɔ wuda emunlike bɔ akodeɛ; eza mebɔ ɛlɔnenli mɔɔ ko sɛkye ninyɛne,

¹⁷noko akodeɛ biala mɔɔ bɛyɛ bɛatia wɔ la ɛnrɛyɛ kpalɛ ɛlɛ; yɛɛ awie biala mɔɔ kɛva edwɛkɛ kɛdo ɛ nwo zo la, ɛbaha wɔado ɔ nwo zo. Ɛdɛnkɛma sonvolɛma agyadeɛ, nee bɛ ti mɔɔ medie la a le ɛhye. Medame Ɛdɛnkɛma a mese a.”