Read Nzema Aye 55 Bible Online

Aye 55 - Nzema bible

Aye 55

¹ Ɛdɛnkɛma se, “Awie biala mɔɔ nzuhɔne ɛlɛku ye la ɛrɛla ɛranlo nzule; yɛɛ mɔɔ ɛnlɛ ezukoa la ɛrɛla ɛradɔ aleɛ ɛli. Bɛrɛla, bɛradɔ nwanye nee meleke, bɛnlɛ bolɛ yɛɛ bɛnva ezukoa bɛndɔ.

²Duzu ati a bɛsɛkye bɛ ezukoa wɔ mɔɔ ɛnle aleɛ la anwo, na bɛsɛkye bɛ anwosesebɛ wɔ mɔɔ ɛmmaa ahunlundwolɛ la anwo ɛ? Bɛdie me kpalɛ, bɛli mɔɔ le kpalɛ la, na bɛmaa bɛ nye ɛlie aleɛ sosɔɔ nwo na bɛyɛ mbelane.

³ “Bɛrɛla, bɛyɛ ɛnzonlɛ bɛdie me; bɛdie, amaa bɛanyia ngoane, na me nee bɛ bakyekye ngyekyeleɛ mɔɔ ɛntulu ɛlɛ, na bɛanyia me ɛhulolɛ kpundii ne mɔɔ menvale mengulole Belemgbunli Devidi la.

⁴Bɛnlea, menyɛle ye maanle maanle ne mɔ dasevolɛ, maanle maanle ne mɔ safohyenlema kpanyinli mɔɔ li bɛ ti.

⁵Akee ɛbavɛlɛ maanle maanle mɔɔ ɛnze bɛ la, yɛɛ maanle maanle mɔɔ ɛnze wɔ la banriandi ara ɛ nwo, wɔ medame Ɛdɛnkɛma wɔ Nyamenle ne, Yizilayɛ Nwuanzanwuanza Ko ne ati, ɔluakɛ medame Nyamenle, mewula wɔ anyunlunyia.”

⁶Bɛkpondɛ Ɛdɛnkɛma na bɛkɛnwu ye, bɛbodo bɛzɛlɛ ye na ɔbikye;

⁷bɛmaa amumuyɛnli ne ɛgyakyi ɛtaneyɛlɛ, na mɔɔ ɛndwenle kpalɛ nwo la ɛgyakyi; bɛmaa ɔzia ɔrɛla Ɛdɛnkɛma ɛkɛ, amaa Ɛdɛnkɛma aze ye anwunvɔne, bɛmaa ɔzia ɔrɛla yɛ Nyamenle ne ɛkɛ, na Nyamenle bava ye ɛtane ahyɛ ye.

⁸Ɔluakɛ Ɛdɛnkɛma se, “Tɛ me adwenle a le bɛ adwenle, yɛɛ tɛ me ndenle a le bɛ ndenle.

⁹Ɔluakɛ, kɛmɔ anwumaneamra wɔ anwuma tɛla azɛlɛ ye la, zɔhane ala yɛɛ me ndenle le mgbole na me adwenle le kpole tɛla bɛ ɛdeɛ ne mɔ a.

¹⁰ “Kɛmɔ ezule nee ezukɔtweaba vi anwuma tɔ, na bɛnzia bɛngɔ, na bɛdoɔloa azɛlɛ ye, bɛmaa ndile nyenle, na aleɛ yɛ kpalɛ, bɛmaa mɔɔ dua la nyia ma, na sonla nyia bie di la,

¹¹zɔhane ala yɛɛ edwɛkɛ mɔɔ vi me nloa anu kɛvinde la ɛnrɛzia ɛnrɛra me nwo ɛke mgbane a. Ɔbayɛ mɔɔ medwenle nwo kɛ ɔrayɛ la, na yeakpazi mɔɔ menzoanle ye nwolɛ la ɛyɛlɛ nu.

¹²“Ɔluakɛ ɛbavi Babelɔn anyelielɛ nu, bɛbali ɛ nyunlu bɛ nee wɔ ahɔ anzonudwolɛ nu, awoka mgbole nee ngyikyi ne mɔ amuala babɔ nu ado edwɛne, na ɛbɔ nu mbaka kɔsɔɔti babɔ bɛ sa nu.

¹³Sepelɛse mbaka bafifi ɛleka mɔɔ mbowule wɔ la, mbaka mgbole bafifi ɛleka mɔɔ mbowunyɛma wɔ la; Ɛhye bayɛ ngakyedeɛ yeamaa medame Ɛdɛnkɛma, sɛkɛlɛneɛ mɔɔ bɛmpɛ bɛndo ɛlɛ.”