Read Nzema Aye 56 Bible Online

Aye 56 - Nzema bible

Aye 56

¹Ɛdɛnkɛma se, “Bɛli pɛlepɛle na bɛbɔ tenlene ɛbɛla, na ɔnrɛhyɛ biala na me ngoanelielɛ ne ara, na mealie bɛ ngoane.

²Nyilalɛ ɛha sonla ne mɔɔ yɛ ɛhye la, nee sonla ra ne mɔɔ kɛzɔ nu ɛsesebɛ la. Nyilalɛ ɛha sonla ne mɔɔ sie Ɛnwomenlelielɛ Kenle ne na ɔngua nwolɛ evinli, na ɔtwe ɔ nwo ɔfi amumuyɛyɛlɛ nwo la.”

³Ɛyɛvolɛ biala mɔɔ ɛradɛnla Ɛdɛnkɛma menli ne avinli la mmaka kɛ, “Ɛdɛnkɛma baye me avi ye menli ne avinli.” Nrenya mɔɔ bɛza ye noko la mmaka kɛ, “Bɛnlea, meyɛ baka wulera.”

⁴Ɔluakɛ Ɛdɛnkɛma se, “Mrenya mɔɔ bɛza bɛ, mɔɔ sie me Ɛnwomenlelielɛ Kenle ne, yɛ ninyɛne mɔɔ sɔ me nye na bɛsɔ me ngyekyeleɛ ne anu ɛsesebɛ la,

⁵mebamaa bɛ duma ayɛ ngakyedeɛ mɔɔ tɛla mralɛ mraalɛ nee mralɛ mrenya wɔ me sua nu; mebamaa bɛ duma adɛnla ɛkɛ ne dahuu mɔɔ ɔnrɛkpa me sua nu ɛlɛ a.

⁶“Nyɛvolɛ mɔɔ kɛva bɛ nwo kɛbeta Ɛdɛnkɛma kɛ bɛsonle ye, bɛkulo Ɛdɛnkɛma duma na bɛayɛ ye sonvolɛma, awie biala mɔɔ sie Ɛnwomenlelielɛ Kenle ne, na ɔngua nwolɛ evinli, na ɔsɔ me ngyekyeleɛ ne anu ɛsesebɛ la,

⁷ bɛmɛ yɛɛ mebava bɛ meahɔ me boka nwuanzanwuanza ne azo, na meamaa bɛ nye alie wɔ me nzɛlɛlɛ sua ne anu a; mebalie bɛ ɛyelalɛ azubɔdeɛ nee bɛ azubɔlɛ ne mɔ wɔ me azukponle ne azo. Ɔluakɛ bɛbavɛlɛ me sua ne, menli kɔsɔɔti nzɛlɛlɛ sua.”

⁸Awulae Nyamenle ne mɔɔ boɔboa Yizilayɛma mɔɔ awie ɛmbu bɛ bie la anloa la se, “Mebaboɔboa menli gyɛne noko anloa meaboka bɛdabɛ mɔɔ meboɔboa bɛ nloa dɛba la anwo.”

⁹Bɛmɛ nanemgbole mɔɔ wɔ kpɔkɛ nu, nanemgbole mɔɔ wɔ kpɔkɛmile nu, bɛrali menli nane.

¹⁰Ɔse, “Me sinzavolɛma ne anye ɛzi, bɛ biala ɛnlɛ adwenle; bɛle ahwea mumule, bɛngola kpo bɔbɔ; mɔɔ bɛze ye yɛ la a le nafelɛ mgbole nee ɛlalɛ mgbole ɛhanlɛ.

¹¹Ahwea ne mɔ le adidikpoku kpole kpalɛ; bɛdi a bɛ ko ɛnyi ɛlɛ. Mboaneneavolɛma ne mɔ noko ɛnlɛ ndelebɛbo; biala ɛva ɔdaye ye adenle ɛdeɛ zo. Biala dwenle ɔ ngome ye kpalɛyɛlɛ nwo.

¹²Bɛse, ‘Ayi mɔ, bɛrɛla bɛmaa yɛhɔkpondɛ nwanye bie yɛnlo. Bɛmaa yɛhɔnlo nza ɛsesebɛ yɛbo; ɛhyema noko bayɛ kɛ ɛnɛ la, ɔbayɛ ɛzulolɛ kpole kpalɛ.’ ”