Read Nzema Aye 57 Bible Online

Aye 57 - Nzema bible

Aye 57

¹Tenlenenli wu a ɔnvane awie biala anwo; bɛfa menli titile bɛkɔ mɔɔ awie ɛnde ɔ bo a. Ɔluakɛ bɛye tenlenenli bɛfi munzule nu a, ɔ nzo nu dwo ye.

²Bɛdabɛ mɔɔ bɛdi boɛ la da die bɛ ɛnwomenle wɔ bɛ ɛkpa zo.

³Bɛhwe bɛbikye, bɛmɛ nyɛne mraalɛ amra mrenya, bɛmɛ tuutuu nee agyalɛ mɛlatovoma abo zo amra.

⁴Nwane a bɛgolo ɔ nwo a? Nwane a bɛbuke bɛ nloa wanaanwo bɛkeha ɛtane ɛtane bɛtietia ye a? Asoo bɛnle mɛladonlɛma amra? Alanema nlɔnra,

⁵bɛ awozonle ɛzonlenlɛ ti bɛ nee bɛ da oku mbaka nee baka buzuu biala abo, na bɛkuhu bɛ mra wɔ mbɔnza ne mɔ anu nee bodane ahuma nu.

⁶Bɛfa awolɛ azo tonlotonlo ne mɔ mɔɔ wɔ bɔnza ne anu la bie bɛyɛ bɛ ɛdeɛ na bɛsonle ye, bɛgua nza zolɛ na bɛfa bɛ ma azubɔdeɛ bɛkɔmaa bɛ. Bɛdwenle kɛ bɛyɛ debie zɛhae a ɛnee ɔyɛ me ahunlundwolɛ ɔ?

⁷Bɛfa ɛkpa bɛkɔsie boka kpole zo yɛɛ bɛkɔ ɛkɛ bɛkɔbɔ azu na bɛfa bɛ nwo a.

⁸Bɛfa bɛ mmonle sɛkɛlɛneɛ ne mɔ bɛsie bɛ nlenkɛ nzi nee bɛ nlenkɛ fɛlɛmo ne mɔ anwo. Kɛmɔ bɛkpo me la ati, bɛbɔ bɛ nwo anyiemgba wɔ bɛ ɛkpa ne mɔ mɔɔ bɛyɛ bɛ mgbole, tɛtɛlɛ la azo, na bɛbɔ bɛ kulovolɛma ɛkpa bɛmaa bɛ nee bɛ da toonwo bɛdabɛ bɛ kunlu dwo nwolɛ.

⁹Bɛvale anatele evuanlɛ kpalɛ bɛguale bɛ nwo bɛhɔzonlenle bɛ bozonle Molɛke, bɛzoanle menli bɛmanle bɛhɔle moa moa, na bɛmanle bɛhɔle toonwo bɛhɔle Ɛbolɔ.

¹⁰Bɛ adenle ne tendenle manle bɛ nwo yɛle bɛ bɛtɛɛ, noko bɛanga kɛ, “Ɔle debie mgbane.” Bɛnyianle ɛbɛla fofolɛ mɔɔ nee bɛ anwosesebɛ ne le ko la bɛbɔle, yemɔti bɛanvɛ.

¹¹Ɛdɛnkɛma ɛlɛbiza bɛ kɛ, “Nwane a anwo yɛ ɛzulolɛ, mɔɔ bɛsulo ye, mɔɔ yemɔti bɛbɔ adalɛ, na bɛngakye me, bɛndwenle me nwo nretee zɛhae ɛ? Asoo metɛsile bɛ nwo abotane bie ala, mɔɔ yemɔti bɛnzulo me a?

¹²Nea, meka bɛ tenleneyɛlɛ ne nee bɛ nyɛleɛ ne mɔ meahile bɛ, na bɛkɛnwu kɛ ɔnrɛboa bɛ.

¹³Saa bɛsu bɛakpondɛ moalɛ a, bɛmaa bɛ mmonle ne mɔ mɔɔ bɛboɔboa bɛ nloa la ɛlie bɛ ɛ! Anwoma bapia bɛ ahɔ, ɛnwomenle kokye babɔ bɛ ahɔ. Na menli mɔɔ nriandi bafea me ɛkɛ ne la banyia azɛlɛ ne, na yeava me boka nwuanzanwuanza ne yeayɛ ye agyadeɛ.”

¹⁴Na bɛbaha kɛ, “Bɛha bɛ nwo, bɛha bɛ nwo, bɛziezie adenle ne, bɛye debie biala mɔɔ tua adenle la bɛvi me menli ne adenle nu.”

¹⁵Ɔluakɛ anwuma nee Nwuanzanwuanza Ko ne mɔɔ de ɛkɛ mekɛ mɔɔ ɛnlɛ awieleɛ, mɔɔ ye duma a le Nwuanzanwuanza la se, “Mede anwuma lɔ nee ɛleka nwuanzanwuanza, yɛɛ eza me nee mɔɔ nu ɔ nwo na ɔle bɛlɛvo la tɛnla, kɛ memaa mɔɔ ɛnlu ɔ nwo la anyia anyelazo.

¹⁶Ɔluakɛ medame a memaa ngoane a, yɛɛ me nuhua a sunsum ne vi ba a; menrɛva bɛ nwo ɛya dahuu, yɛɛ dahuu menrɛbɔ bɛ somolɛ.

¹⁷Bɛ ɛtane nee bɛ anyebolo ti yɛɛ menvale bɛ nwo ɛya a. Menvale ɛya mendeanle bɛ na mendole me nye ɛbɔ nu, noko bɛhɔle zolɛ bɛyɛle bɛ ninyɛndane ne mɔ, kɛmɔ bɛdabɛ bɛkulo la.

¹⁸“Menwu bɛ ɛbɛla mɔɔ bɛbɔ la, noko mebayɛ bɛ ayile. Mebali bɛ ti na meakyekye bɛ rɛle, na meamaa bɛdabɛ mɔɔ bɛlɛdi nyane la arɛle akyekye.

¹⁹Anzonudwolɛ, anzonudwolɛ ɛha bɛdabɛ mɔɔ bɛwɔ moa moa nee bɛdabɛ mɔɔ bɛbikye la, medame Ɛdɛnkɛma a mese a; yɛɛ mebayɛ bɛ ayile.

²⁰Na amumuyɛma le kɛ nyevile mɔɔ ɛlɛbɔ mgbaka la, ɔngola ɛleka ko gyinla, yɛɛ ye azɛlɛkye pia ewula nee ndɛtɛlɛ ba nuhua.

²¹Amumuyɛma anzo nu ɛnrɛdwo bɛ ɛlɛ,” kɛ me Nyamenle ne se la ɛne.