Read Nzema Aye 58 Bible Online

Aye 58 - Nzema bible

Aye 58

¹Ɛdɛnkɛma zele me kɛ, “Tea nu, tea nu kpalɛ, maa ɛ ne ɛlielie kɛ aweɛne tendenle ne; ka me menli ne, Gyekɔbo abo zo amra ne mɛladonlɛ nee bɛ ɛtane ne mɔ kile bɛ.

²Dahuu bɛkpondɛ me na bɛkulo kɛ bɛnwu me ndenle ne mɔ, kɛ asɛɛ bɛle maanle mɔɔ bɔ tenlene ɛbɛla na bɛtɛkpole medame, bɛ Nyamenle ne mɛla ne mɔ la. Bɛsɛlɛ me kɛ membua ndɛne tenlene nu, bɛkulo kɛ bɛtwe bɛbikye me.

³“Bɛbiza kɛ, ‘Duzu ati a yɛhye ɛhɔne na ɛnnwu ye ɛ? Duzu ati a yɛbɛlɛ yɛ nwo aze na ɛndwenle nwolɛ fee ɛ?’ “Na mese: Bɛnlea, bɛdabɛ bɛ gyima nee anyelielɛ ti yɛɛ bɛkye ɛhɔne a, yɛɛ bɛsisi bɛ gyimayɛvoma.

⁴Bɛnlea, bɛkye ɛhɔne, bɛdi butule na bɛko, na bɛwulowula awie mɔ kutuku atisesebɛ nu. Ɛnɛ mekɛ ye, ɛhɔnehyelɛ mɔɔ le kɛ bɛ ɛdeɛ ye la ɛnrɛmaa bɛnrɛde bɛ ne wɔ anwuma.

⁵Asoo ɛhɔnehyelɛ mɔɔ medi ye edwɛkɛ la, yemɔ a le ɛhye, kɛ bɛkɛzie kenle, bɛkɛbɛlɛ bɛ nwo aze, bɛkɛsisi bɛ ti aze kɛ ɛhonle, na bɛkɛdɛlɛdɛlɛ nzonle nee ɛrele nu bɛkɛla zolɛ la ɔ? Bɛfɛlɛ ɛhye ɛhɔnehyelɛ, yɛɛ bɛnea a ɔle kenle mɔɔ kɛzɔ medame Ɛdɛnkɛma me nye ɔ?

⁶“Asoo ɛhɔnehyelɛ ne mɔɔ medi ye edwɛkɛ la, tɛ yemɔ a le ɛhye, kɛ bɛkɛgyakyi amumuyɛyɛlɛ, bɛkɛye kpomgbolo menli kɔme, bɛkɛgyakyi ndunlumililɛ, na bɛkɛgyakyi menli mɔɔ bɛlɛsisi bɛ la bɛkɛmaa bɛkɛva bɛ nwo dwɔɔ?

⁷ Ɛhɔnehyelɛ a le kɛ bɛkɛmaa mɔɔ ɛhɔne ɛlɛku ye la bɛ aleɛ mɔɔ bɛdi la bie, na bɛkɛva ehyianli anwo anwunvɔne ne mɔɔ ɛnlɛ ɛleka ɛnla la bɛkɛra sua nu. Saa bɛnwu awie mɔɔ ɛngeda bie la a bɛmaa ye ɛdanlɛ ɔheda na bɛmmafa bɛ nwo bɛfea bɛ nwo amra.

⁸“Saa bɛyɛ ɛhye a bɛ wienyi ne bada kɛ nwonlomɔ ewia, na bɛ nwo aza ndɛndɛ; bɛ tenleneyɛlɛ ne bala ali, na medame Ɛdɛnkɛma me anyunlunyia ne azinza bɛ.

⁹Akee bɛbavɛlɛ, na mebalie bɛ zo; bɛbazu bɛavɛlɛ me, na mebaha kɛ: Medame ɛne. “Saa bɛgyakyi nzisililɛ, butulelilɛ yɛɛ edwɛkɛ mgbane mgbane ɛhehanlɛ,

¹⁰saa bɛmaa mɔɔ ɛhɔne ɛlɛku ye la aleɛ, na bɛboa mɔɔ nyane ɛha ye la bɛmaa ɔgyakyi nyanelilɛ a, bɛ wienyi ne bada awozinli nu na awozinli mɔɔ ɛbɔ ɛyia bɛ la ade ayɛ kɛ ewiazo.

¹¹Na akee medame Ɛdɛnkɛma, mebazinza bɛ dahuu na meamaa bɛ ninyɛne kpalɛ meamaa bɛ kunlu adwo, na bɛ mbowule nu ayɛ se. Bɛbayɛ kɛ tola mɔɔ nzule dɔɔnwo wɔ nu, kɛ nzubula mɔɔ nuhua nzule ɛnsesa ɛlɛ la.

¹²Bɛ mɔmoane azua mɔɔ ɛbubu dɛbadɛba la, bɛbasisi bɛ muala, yɛɛ bɛbadwazo mɔɔ mekɛ dɔɔnwo bɛwulale bɛ adiabo ne mɔ aze na bɛanzi la. Bɛbavɛlɛ bɛ kɛ bɛmɛ a bɛyɛle bane ne mɔ mɔɔ bubule la boɛ na bɛsisile azua mɔɔ gologolole guale la a.”

¹³Ɛdɛnkɛma se, “Saa bɛsia bɛ nzi bɛsie Ɛnwomenlelielɛ Kenle ne, bɛgyakyi bɛdabɛ bɛ ngome bɛ kpalɛyɛlɛ nwo gyimayɛlɛ wɔ me kenle nwuanzanwuanza ne, bɛmaa bɛ nye die Ɛnwomenlelielɛ Kenle ne ɛzielɛ nwo, na bɛbu medame Ɛdɛnkɛma me kenle nwuanzanwuanza ne bie, saa bɛdi kenle ne eni na bɛanyɛ mɔɔ bɛdabɛ bɛkulo la, anzɛɛ bɛamkpondɛ bɛ ngome bɛ anyelielɛ, bɛandendɛ ɛdendɛlɛ mgbane mgbane a,

¹⁴yemɔ bɛ nye balie medame Ɛdɛnkɛma me nwo, na mebamaa bɛali bɛ eni wɔ ewiade ye ɛleka biala. Mebava bɛ ze Gyekɔbo agyadeɛ ne mɔɔ menvale membɔle ye ɛwɔkɛ la meamaa bɛ. Medame Ɛdɛnkɛma a mese a.”