Read Nzema Aye 6 Bible Online

Aye 6 - Nzema bible

Aye 6

¹ Ɛvolɛ ne mɔɔ Belemgbunli Ɛzaya wule la ala anu, menwunle kɛ Awulae de belemgbunli ebia nu, hyeleenyi wɔ anwuma, na ye tɛladeɛ ne anloa ɛyi Ɛzonlenlɛ Sua ne.

²Tease abɔdeɛma mɔɔ lɛ ndɛbalɛ la ɛbɔ ɛyia ɔ ti zo anwuma. Ko biala lɛ ndɛbalɛ nsia: ɔfa nwiɔ ɔkeda ɔ nyunlu, ɔfa nwiɔ ɔkeda ɔ gyakɛ anwo, yɛɛ ɔfa nwiɔ ɔtu.

³ Na ko vɛlɛle ko na ɔhanle kɛ: “Nwuanzanwuanza, nwuanzanwuanza! Tumivolɛ Ɛdɛnkɛma le nwuanzanwuanza! Ye anyunlunyia ɛyi ewiade amuala tɛkɛɛ!”

⁴ Na mɔɔ hanle edwɛkɛ ne la ane ne manle Ɛzonlenlɛ Sua ne adiabo ne kpusule, na esike rayile sua ne.

⁵Na menganle kɛ, “Medame, mebɔ munzule! Meminli, ɔluakɛ mele sonla mɔɔ meka ɛtane, yɛɛ mede menli mɔɔ ka ɛtane la avinli. Noko akee menwu Belemgbunli ne, Tumivolɛ Ɛdɛnkɛma!”

⁶Akee tease abɔdeɛ ne mɔ anu ko dule rale me nwo ɛkɛ, ɔlɛ samɛnlankɛ mɔɔ ɛdɔlɔ woonwu wɔ fefadeɛ ti la ɔ sa anu. Ɔvale samɛnlankɛ ne wɔ azukponle ne senle ne anu.

⁷Ɔvale ɔhanle me nloa na ɔzele me kɛ, “Nea, meva ɛhye meha ɛ nloa; bɛye wɔ fɔlɛlilɛ biala bɛhɔ, yɛɛ bɛva wɔ ɛtane bɛhyɛ wɔ.”

⁸Na mendele kɛ Awulae ɛlɛbiza kɛ, “Nwane a menzoa ye a, nwane a kɛhɔ kɛmaa yɛ a?” Na membuale kɛ, “Mewɔ ɛke! Soa me.”

⁹ Na ɔzele me kɛ, “Kɔ, na kɔze menli ɛhye mɔ kɛ, ‘Bɛbadie, bɛadie, na bɛnrɛde ɔ bo; bɛbanlea, bɛanlea, na bɛnrɛnwu ɛhwee!

¹⁰Maa menli ɛhye mɔ ɛsolo, bɛ nzo ɛdi, na bɛ nye ɛzi, anrɛɛ bɛkɛva bɛ nye bɛkɛnwu debie, bɛkɛva bɛ nzo bɛkɛde edwɛkɛ na bɛkɛde edwɛkɛ bo, na bɛahakyi bɛ nyɛleɛ na bɛayɛ bɛ ayile.’ ”

¹¹Na membizale kɛ, “O Awulae, kenlenzu?” Ɔbuale kɛ, “Kɔkpula kɛ azuamgbole ne mɔ kɛbɔ, mɔɔ awie ɛnde zolɛ na azua mɔɔ bɛda nu la kɛyɛ azuadu mɔɔ awie ɛnde biala anu, na azɛlɛ ne kɛdɔ mgbane la.

¹²Medame Ɛdɛnkɛma, mebamaa bɛahye menli ne bɛ nee bɛ ahɔ moa moa na meamaa azɛlɛ ne azo ɛleka dɔɔnwo ayɛ nyanyoo.

¹³Saa menli bulu na nuhua ko ka bɔbɔ a, bɛbayela ye kɛ oku baka mɔɔ bɛpɛ ye bɛdo na bɛyela ye dosinli ne la.” (Ma ne mɔɔ anwo te la a le dosinli ne.)