Read Nzema Aye 60 Bible Online

Aye 60 - Nzema bible

Aye 60

¹Bɛdwazo, bɛda, ɔluakɛ bɛ wienyi ne ɛra, Ɛdɛnkɛma anyunlunyia ne ɛlɛta.

²Bɛnlea, awozinli bava azɛlɛ ye, Awozinli kabii baheda maanle maanle ne mɔ azo, Noko Ɛdɛnkɛma wienyi ne bada bɛ nwo zo, Na bɛbanwu kɛ ye anyunlunyia ne wɔ bɛ nwo zo.

³Maanle maanle bara bɛ wienyi ne anu, Arelemgbunli bara bɛ ɛdwazolɛ ne wienyi ne anu.

⁴Bɛmaa bɛ nye zo na bɛnlea, Bɛ muala bɛboɔboa bɛ nloa kɛ bɛsia bɛara; Bɛ mra mrenya ne mɔ vi moa moa bara, Yɛɛ bɛbadedɛ bɛ mra mraalɛ ne mɔ bɛ sa zo bɛara.

⁵Akee bɛbanwu bɛ na bɛali fɛlɛko, Bɛ ahonle nu bayɛ wuluwulu na bɛ nye alie, Ɔluakɛ nyevile nzi ninyɛne kɔsɔɔti bayɛ bɛ ɛdeɛ, Maanle maanle ne mɔ anwonyia bayɛ bɛ ɛdeɛ.

⁶Bɛ maanle nu bayɛ afunlumu dɔɔnwo, Afunlumu ndonrandonra mɔɔ vi Medean nee Yifa; Dɔɔnwo noko vi Hyiba bara. Bɛbava ezukoa nvutuke nee ɛyɛlɛ evuanlɛ bɛara, Na bɛbabɔ Ɛdɛnkɛma ayɛlɛyelɛ ne nolo.

⁷Bɛbava nyɛmoa bɛvi Kidaa bɛara, Bɛ nee Nɛbayo mboane nyinli kɔsɔɔti bara; Mebalie bɛ kɔsɔɔti me azukponle ne azo, Na mebawula me Ɛzonlenlɛ Sua ne anyunlunyia.

⁸Nwane mɔ a le ɛhye mɔ mɔɔ tu kɛ amungu, Na bɛtu kɛ abubule bɛkɔwolo bɛ nvɛnzɛlɛ nu la?

⁹Ɔluakɛ moa moa maanle maanle bahendɛ me, Tahyehye meli ne mɔ a balumua Ava bɛ mra mrenya ne mɔ avi moa moa ara a; Bɛbava dwɛtɛ fufule nee ezukoa nvutuke bɛara. Bɛbava bɛarɛlɛ Ɛdɛnkɛma bɛ Nyamenle ne, Bɛbava bɛarɛlɛ Yizilayɛ Nwuanzanwuanza Ko ne, Ɔboalekɛ yemaa bɛ nyunlu ɛra anyia.

¹⁰Ɛdɛnkɛma ɛlɛka ahile Gyɛlusalɛm kɛ, “Nyɛvolɛ a balie bɛ bane ne mɔ amaa bɛ a, Yɛɛ bɛ arelemgbunli bazonle bɛ. Ɔluakɛ menvale ɛya mendeanle bɛ, Na kɛkala menwu bɛ anwunvɔne.

¹¹ Bɛ nlenkɛ mgbole ne mɔ badeda nwolɛ dahuu, Bɛnrɛtoto nu aledwolɛ nee alehyenlɛ, Amaa menli vi maanle zo ava bɛ anwonyia arɛlɛ bɛ; Bɛ arelemgbunli bali bɛ nyunlu bɛado ɛlɔnwɔne bɛara.

¹²Ɔluakɛ maanle maanle mɔɔ ɛnrɛzonle bɛ la Abo zo babɔ na bɛ maanle ne adɔ mgbane.

¹³“Lɛbanɔn anyunlunyia ne bara wɔ ɛkɛ ne, Sepelɛse nee paanye mbaka nee mbaka ɛsesebɛ, Yɛɛ bɛbava bɛaziezie me Ɛzonlenlɛ Sua ne anu a; Mebamaa ɛleka mɔɔ metɛnla la ayɛ kɛnlɛma.

¹⁴ Menli mɔɔ sisile bɛ la amra mrenya ne mɔ Barabɔ bɛ ti aze amaa bɛ; Menli mɔɔ kpole bɛ la kɔsɔɔti Baradu agua bɛ gyakɛ anu. Bɛbavɛlɛ sua ne ‘Ɛdɛnkɛma Suakpole,’ ‘Zayɔn, Yizilayɛ Nwuanzanwuanza Ko ne Suakpole.’

¹⁵“Kɛmɔ bɛkpole wɔ na bɛkpɔle wɔ, Mɔɔ ɛnee awie ɛnva wɔ adenle zo la, Mebamaa wɔayɛ suakpole kɛnlɛma nee tɛtɛlɛ, Ɛleka mɔɔ anyelielɛ wɔ dahuu.

¹⁶Bɛbanlo maanle maanle meleke; Arelemgbunli a bali bɛ adane a, Na bɛbanwu kɛ medame, Ɛdɛnkɛma, medame a mele bɛ Dievolɛ, bɛ Kpɔnevolɛ, Yizilayɛ Katakyie Ko ne a.

¹⁷“Kɛ menwɔva kɔbele la, mebava ezukoa nvutuke, Kɛ menwɔva bulalɛ la, mebava dwɛtɛ fufule, Kɛ menwɔva mbaka la, mebava kɔbele, Yɛɛ kɛ menwɔva awolɛ la, mebava mbulalɛ mearɛlɛ bɛ. Mebamaa bɛ mgbanyinli mɔɔ nea bɛ nwo zo la anzonudwolɛ, Na bɛ gyima zo neavolɛma ayɛ tenlenema.

¹⁸Bɛnrɛde konle nganeɛ wɔ bɛ azɛlɛ ne azo bieko, Awie ɛnrɛzɛkye bɛ maanle ne bieko; Bɛbavɛlɛ bɛ bane ne mɔ Ngoanelielɛ, Na bɛavɛlɛ bɛ nlenkɛ ne mɔ Ayɛlɛyelɛ.

¹⁹ “Sɛnzɛne ne ɛnrɛmaa bɛ wienyi bieko wɔ alehyenlɛ nu, Yɛɛ siane ne ɛnrɛmaa bɛ wienyi bieko aledwolɛ nu. Ɛdɛnkɛma ɔdaye mumua ne ɔbayɛ bɛ wienyi mɔɔ ɛnnu ɛlɛ, Na bɛ Nyamenle ne bayɛ bɛ anyunlunyia.

²⁰Bɛ sɛnzɛne ne ɛnrɛdɔ ɛlɛ, Yɛɛ siane ne ɛnrɛwu ɛlɛ, Ɔluakɛ Ɛdɛnkɛma bayɛ bɛ wienyi mɔɔ ɛnnu ɛlɛ, Na bɛ nyanelilɛ muala abo bapɛ.

²¹Menli ne amuala bayɛ tenlenema; Bɛbava azɛlɛ ne bɛayɛ bɛ ɛdeɛ dahuu. Medame a menzole bɛ a, bɛle me sa anloa gyima, Amaa bɛawula me anyunlunyia.

²²Bɛ nuhua ekyi biala bayɛ abusua ekpulike, Na abusua ekyi biala bayɛ maanle mumua. Medame a mele Ɛdɛnkɛma a; Ye mekɛ dwu a mebamaa yeayɛ zɔ ndɛndɛ.”