Read Nzema Aye 61 Bible Online

Aye 61 - Nzema bible

Aye 61

¹ Awulae Nyamenle ne Sunsum ne wɔ me nwo zo, Ɔboalekɛ Ɛdɛnkɛma ɛkpa nu ɛye me Kɛ menva amaneɛ fɛlɛko membambɔ menli mɔɔ ɛlɛnwu amaneɛ la; Yezoa me kɛ membankyekye menli mɔɔ arɛle ɛbɔ la arɛle, Membɔ nolo kɛ bɛgyakyi bɛdabɛ mɔɔ bɛhye bɛ nuokɛ la, Na menye menli mɔɔ gua efiade la.

² Yezoa me kɛ membɔ nolo kɛ Ɛdɛnkɛma anwunvɔnezelɛ mekɛ ne, Nee mekɛ ne mɔɔ yɛ Nyamenle ne fa ali nzenralɛ la ɛdwu; Na menkyekye menli mɔɔ di nyane la arɛle.

³Yezoa me kɛ membankyekye Zayɔnoma arɛle Kɛ bɛgyakyi nyanelilɛ na bɛli fɛlɛko. Bɛgyakyi bɛ ti zo nzonle ɛbɔlɛ, Na bɛbɔ ndotolo kɔtɔlɔba abɔtile. Bɛdo ayɛlɛyelɛ edwɛne na bɛgyakyi nyanelilɛ; Amaa bɛavɛlɛ bɛ tenleneyɛlɛ mbaka ɛsesebɛ, Mɔɔ Ɛdɛnkɛma ɛlua, amaa bɛawula ye anyunlunyia.

⁴Bɛbakyekye azuamgbole mɔɔ bɛzɛkye bɛ la, Bɛbasisi azua mɔɔ bɛgologolo bɛ la fofolɛ; Azuamgbole mɔɔ bɛzɛkyele bɛ mɔmoane mɔmoane la, Bɛbakyekye bɛ muala fofolɛ.

⁵Nyɛvolɛ bagyinla ayɛne bɛ nyɛmoa, Nyɛvolɛ bazo bɛ ɛya ade bɛ vanye egyinli nu ma,

⁶Na bɛmɛ, bɛbavɛlɛ bɛ Ɛdɛnkɛma sɛlɛvolɛma, Menli bavɛlɛ bɛ Nyamenle sonvolɛma. Maanle maanle bava bɛ anwonyia arɛlɛ bɛ, Na bɛali fɛlɛko kɛ anwonyia ne mɔ le bɛ ɛdeɛ.

⁷Bɛ anyiemgba nee bɛ nyunlu aze ɛgualɛ ɛwie; Bɛbanyia mɔɔ bɛminli la mɔnwo na bɛali fɛlɛko; Yemɔti bɛbanyia bɛ azɛlɛ ne mɔnwo bɛayɛ bɛ ɛdeɛ; Na bɛali fɛlɛko mɔɔ ɛnlɛ awieleɛ.

⁸Ɛdɛnkɛma se, “Medame Ɛdɛnkɛma, mekulo pɛlepɛlelilɛ, Mekyi awule nee nwolɛ ɛyelalɛ azubɔdeɛ; Mebamaa me menli ne nɔhalɛ ahatualɛ, Me nee bɛ bakyekye ngyekyeleɛ mɔɔ ɛmbɔ aze la.

⁹Bɛ bo zo amra bali bɛ ti wɔ maanle maanle avinli, Bɛ mra balie duma wɔ maanle maanle avinli. Awie biala mɔɔ kɛnwu bɛ la balie bɛ ado nu, Kɛ bɛle menli mɔɔ Ɛdɛnkɛma ɛyila bɛ a.”

¹⁰ Ɛdɛnkɛma ati me nye balie kpole, Me ɛkɛla bali fɛlɛko wɔ me Nyamenle ne ati, Ɔluakɛ yeva ngoanelielɛ ɛdanlɛ yeheda me, Yeva pɛlepɛleyɛlɛ tɛladeɛ yewula me, Yeziezie me kɛ atɔfolɛ nrenya fa ndotolo kɔtɔlɔba siezie ɔ nwo, Anzɛɛ kɛ atɔfolɛ raalɛ fa anwoneɛ siezie ɔ nwo la.

¹¹Ɔluakɛ kɛ azɛlɛ ye azo si fifi ndile, Na tola nu ninyɛne si fifi la, Zɔhane ala yɛɛ Awulae Nyamenle Bamaa tenleneyɛlɛ nee ayɛlɛyelɛ afifi Maanle maanle ne mɔ amuala anu a.