Read Nzema Aye 62 Bible Online

Aye 62 - Nzema bible

Aye 62

¹Gyɛlusalɛm ati menrɛyɛ koonwu, Gyɛlusalɛm ati menrɛlie me ɛnwomenle, Kɔdwu kɛ ye benlelilɛ kɛda wienyi, Na ye ngoanelielɛ kɛzɔ kɛ tɛkɛ.

²Maanle maanle ne mɔ banwu wɔ benlelilɛ ne, Arelemgbunli banwu wɔ anyunlunyia ne; Bɛbava duma fofolɛ bɛavɛlɛ wɔ, Duma fofolɛ mɔɔ Ɛdɛnkɛma ɔdaye ɔbado wɔ la.

³Ɛbayɛ belemgbunli kyɛlɛ kɛnlɛma wɔ Ɛdɛnkɛma asa anu, Belemgbunli kyɛlɛ wɔ Nyamenle asa anu.

⁴Bɛnrɛvɛlɛ wɔ “Bɛkpo wɔ ” bieko, Yɛɛ bɛnrɛha kɛ wɔ azɛlɛ ne “Ɛdɔ mgbane” bieko; Na bɛbavɛlɛ wɔ “Me anyelielɛ wɔ wɔ nuhua,” Na bɛavɛlɛ wɔ azɛlɛ ne “Awuvolɛ.” Ɔluakɛ Ɛdɛnkɛma anye die ɛ nwo, Yɛɛ wɔ azɛlɛ ne bayɛ awuvolɛ.

⁵Kɛ kakula nrenya si gya belamunli raalɛ la, Zɔhane ala yɛɛ ɛ mra mrenya ne mɔ bagya wɔ a. Na kɛ atɔfolɛ nrenya anye si die ye atɔfolɛ raalɛ nwo la, Zɔhane ala yɛɛ wɔ Nyamenle ne anye balie ɛ nwo a.

⁶O Gyɛlusalɛm, meva sinzavolɛma Mezie wɔ bane ne mɔ azo; Alehyenlɛ nee aledwolɛ muala, Bɛnrɛmua bɛ nloa, bɛnrɛyɛ koonwu. Bɛmɛ mɔɔ bɛkakye Ɛdɛnkɛma la, Bɛmmadie bɛ ɛnwomenle wɔ ye ɛwɔkɛbɔlɛ ne anwo,

⁷Yɛɛ bɛmmamaa ɔdie ye ɛnwomenle Kɔkpula kɛ ɔkɛkyekye Gyɛlusalɛm fofolɛ Na ɔkɛyɛ suakpole mɔɔ ewiade amuala kanvo ye la.

⁸Ɛdɛnkɛma ɛva ye tumi kpole ne, Nee ye anwosesebɛ ne ɛha ndane kɛ, “Menrɛva bɛ aleɛ ma Menrɛmaa bɛ kpɔvolɛma ɛnrɛli bieko. Nyɛvolɛ ɛnrɛnlo bɛ nwanye Mɔɔ bɛdabɛ bɛvɛ dedee bɛyɛ la ɛlɛ.

⁹Bɛdabɛ mɔɔ bɛdua na bɛbu la Yɛɛ bɛbali na bɛaye Ɛdɛnkɛma ayɛlɛ a, Bɛdabɛ mɔɔ bɛbua vanye ma bɛyɛ nwanye la Yɛɛ bɛbanlo ye wɔ me Ɛzonlenlɛ Sua ne alie nwo ɛkɛ a.”

¹⁰Bɛwolo, bɛwolo nlenkɛ mgbole ne mɔ anu bɛvinde, Bɛziezie adenle ne bɛmaa menli ne; Bɛdu ademgbole, bɛyeye zolɛ awolɛ ne mɔ, Bɛva sɛkɛlɛneɛ bɛzie ɛkɛ bɛmaa maanle maanle ɛnwu ye.

¹¹Bɛdie, Ɛdɛnkɛma ɛbɔ nolo ɛmaa ewiade amuala ɛde kɛ, “Bɛha bɛhile Gyɛlusalɛmma kɛ, Bɛnlea, bɛ ngoanelielɛ ɛlɛba, Bɛnlea, ɔlɛ ye ahyɛlɛdeɛ ɔ sa nu, Ɔ nee ye menli mɔɔ yelie bɛ la ɛlɛba.”

¹²Bɛbavɛlɛ bɛ “Menli Nwuanzanwuanza,” “Menli mɔɔ Ɛdɛnkɛma Ɛkpɔne Bɛ;” Na bɛbavɛlɛ bɛ, “ Nyamenle ɛkpondɛ bɛ ɛnwu bɛ;” “Suakpole Mɔɔ Nyamenle Amkpo Ye Ɛlɛ.”