Read Nzema Aye 63 Bible Online

Aye 63 - Nzema bible

Aye 63

¹Nwane a wula tɛladeɛ anye doaanye kɛ mogya, mɔɔ vi Bɔzela mɔɔ wɔ Yidɔm la ɛlɛba, mɔɔ ye tɛladeɛ mɔɔ ɔwula la kile kɛ yeli konim na ɔtia ye mrenyazo kɛ ɔlɛ tumi la? “Medame Ɛdɛnkɛma, mɔɔ melɛ tumi medie ngoane la ɔ. Melɛbɔ me konimlilɛ ne nolo.”

²Na duzu ati a wɔ tɛladeɛ ne anye le kɔkɔlɛ doaanye, kɛ sonla mɔɔ twihwi vanye ma nu nzule wɔ nwanyeyɛlɛ ɛleka la ɛ?

³ “Me ngome a metietia maanle maanle ne mɔ anwo zo kɛ metwihwi vanye ma nu nzule wɔ nwanye melahyinli nu a. Awie biala vi menli ne anu ambamboka me. Menvale ahyi, ayelɛyelabɛnwo nee ɛya a mentietiale bɛ nwo zo a, na bɛ ngoane mogya a ɛbɔ ɛgua me nwo, ɛzɛkye me adɛladeɛ ne mɔ anu zɛhae la.

⁴Ɔluakɛ mekɛ ɛdwu mɔɔ ɔwɔ kɛ mekpɔne me menli ne a, yɛɛ ɛnee nzenralɛlilɛ wɔ me ahonle nu kpalɛ.

⁵ Meneanle, na awie biala amba kɛ ɔbaboa me, na ɔyɛle me azibɛnwo kpole. Yemɔti medame me ngome me anwosesebɛ yɛɛ manle menlile konim a, yɛɛ me ɛya ne boale me.

⁶Menvale ɛya kpole na memanle maanle maanle ne mɔ nlonle me ndeanlɛ ɛya kɔpo ne anu toonwo bɛbole, na mentietiale bɛ nwo zo, mendwinle bɛ ngoane mogya menguale azɛlɛ ne azo.”

⁷Mebaha Ɛdɛnkɛma ɛhulolɛ kpundii ne anwo edwɛkɛ; mebaye Ɛdɛnkɛma ayɛlɛ wɔ mɔɔ yeyɛ yemaa yɛ la amuala anwo, nee boɛ kpole mɔɔ yeyɛ yemaa Yizilayɛma la; ɔyɛle ɔmanle bɛ, kɛmɔ ye anwunvɔnezelɛ ne nee kɛ ye ɛhulolɛ kpundii ne kpole si de la.

⁸Ɔluakɛ ɔhanle kɛ, “Nɔhalɛ, bɛle me menli; bɛle me mra mɔɔ ɛnrɛbɛlɛbɛla me a.” Na ɔyɛle bɛ dievolɛ.

⁹Bɛ nyanelilɛ kɔsɔɔti yɛle ye nyanelilɛ, na ɔmanle ye soanvolɛ ne mɔɔ nee ye lua la liele bɛ ngoane. Ɔluale ye ɛhulolɛ nee ye anwunvɔnezelɛ zo ɔkpɔnenle bɛ. Ɔvi mɔmoane, ɔdwule bɛ na ɔviale bɛ dahuu.

¹⁰Noko bɛdele ɔ nwo atua na bɛmanle ye Sunsum Nwuanzanwuanza ne lile nyane. Yemɔti ɔhakyile ɔ nwo ɔyɛle bɛ kpɔvolɛ na ɔdaye mumua ne ɔhonle ɔtiale bɛ.

¹¹Na ɔhakyele mɔmoane, ɔhakyele ye sonvolɛ Mosisi. Na bɛhanle kɛ, “Ɔdaye a ɔle Nyamenle ne mɔɔ ɔyele ye menli ne ɔvile Ndɔ Nyevile ne anu a. Ɔdaye a ɔmanle ye Sunsum Nwuanzanwuanza ne nee bɛ luale a.

¹² Ɔdaye a ɔmanle ye konimlilɛ tumi ne nee Mosisi luale na ɔkpakyele nyevile ne anu, ɔliele duma mɔɔ ɛmbɔ aze ɛlɛ la ɔmanle ɔ nwo,

¹³na ɔlile menli ne ati ɔvale bɛ ɔpɛle buma ne a.” Ɔmanle bɛyɛle kɛ ɛsɛlɛ zo mgbɔnwɔ, bɛandu koti.

¹⁴Ɛdɛnkɛma Sunsum ne manle bɛyɛle kɛ nlankɛ mɔɔ lua bɔnza nu la, na ɔmanle bɛliele bɛ ɛnwomenle. Yemɔti ɛdawɔ Ɛdɛnkɛma a ɛlile wɔ menli ne ati na ɛliele duma kpole ɛmanle ɛ nwo a.

¹⁵Ɛdɛnkɛma, ɛwɔ anwuma lɔ, wɔ anyunlunyia ɛleka nwuanzanwuanza ne a to ɛ nye nea yɛ. Wɔ ɛhulolɛ kpole ne nee wɔ tumi ne wɔ nienwu? Wɔye wɔ ahunluyelɛyelalɛ ne nee wɔ anwunvɔnezelɛ ne wɔvi me nwo.

¹⁶Wɔmɔ a ɛle yɛ ze a. Yɛ nlenya mɔ Ebileham nee Gyekɔbo ɛnze yɛ bɔbɔ ɛdeɛ, noko wɔmɔ, O Ɛdɛnkɛma, yɛɛ ɛle yɛ ze a. Ɔvi tete wɔ duma a le yɛ Kpɔnevolɛ.

¹⁷O Ɛdɛnkɛma, duzu ati a ɛmaa yɛfo wɔ ndenle ne mɔ, yɛsolo na akee yɛnzulo wɔ a? Wɔ sonvolɛma ne mɔ ati, mbusua ekpunli ekpunli ne mɔ mɔɔ le wɔ agyadeɛ la ati, sia bɛla.

¹⁸Wɔ menli ne mɔɔ anwo te la lɛle wɔ ɛlɛka nwuanzanwuanza ne mekɛ ekyi bie; yɛ kpɔvolɛma ne ɛragologolo ye ɛgua.

¹⁹Yɛyɛ kɛ menli bie mɔɔ ɛtɛsiele yɛ ɛlɛ la. Yɛnzɔho menli mɔɔ bɛva wɔ duma bɛvɛlɛ bɛ ɛlɛ a.