Read Nzema Aye 65 Bible Online

Aye 65 - Nzema bible

Aye 65

¹ Ɛdɛnkɛma zele kɛ, “Memboɔboale me nwo kɛ memaa menli mɔɔ ambiza me bo zo la akpondɛ me. Menyɛle kɛ memaa menli mɔɔ amkpondɛ me la anwu me. Menzele maanle ne mɔɔ anzonle me la kɛ, ‘Mewɔ ɛke, mewɔ ɛke!’

² Mendɛlɛle me sa nu alehyenlɛ muala kɛ medie menli ne mɔɔ ɛde atua, na bɛdoa bɛdabɛ bɛ ngome bɛ ngyehyɛlɛ bɛdua adenle mɔɔ ɛnle kpalɛ la anu la.

³Bɛle menli mɔɔ dahuu ka me ɛya kpole, bɛbɔ azu wɔ bɛ tola ne mɔ anu na bɛkpu ɛyɛlɛ wɔ belekese zo.

⁴Bɛtɛnla sɛka zo, yɛɛ aleɛ dwo a bɛfea bɛ nwo bɛdi kpolike nane, yɛɛ bɛ subue nu le bɛkyi ninyɛne ngome.

⁵Bɛka bɛkile bɛ gɔnwo mɔ kɛ, ‘Bɛhwe bɛ nwo, bɛmmabikye yɛ, ɔluakɛ bɛdu yɛ bɛmaa; ɔnle kɛ bɛ nwo ka yɛ.’ Ɛhye mɔ le kɛ esike wɔ me bonyi nu; bɛle kɛ senle mɔɔ sɔ alehyenlɛ biala la.

⁶“Bɛnlea, bɛhɛlɛ bɛdo me nyunlu ɛke: Menrɛyɛ koonwu, mebadua bɛ nwolɛ kakɛ; ɛhɛe, mebamaa bɛ munzule abɔ bɛ ti.

⁷Bɛ nee bɛ ze mɔ bɛ amumuyɛ ne babu azia bɛ kɛ bɛkpunle ɛyɛlɛ wɔ awoka mgbole ne mɔ azo, na bɛguale me nwo evinli wɔ awoka ngyikyi ne mɔ azo la. Mebadua bɛ bɛ nyɛleɛ dɛba ne mɔ anwo kakɛ. Medame Ɛdɛnkɛma a mese a.”

⁸Ɛdɛnkɛma se, “Kɛmɔ bɛnyia nwanye wɔ vanye ma nu, na bɛka kɛ, ‘Bɛmmasɛkye ye na debie kpalɛ wɔ nu’ la, zɔhane ala yɛɛ me sonvolɛma ati menrɛzɛkye bɛ muala a.

⁹Mebava Gyekɔbo abo zo amra ne meara na meamaa Dwudama bie mɔ aradɛnla me awoka ne mɔ azo. Menli ne mɔɔ mekpa nu meye bɛ, menli ne mɔɔ sonle me la badɛnla awoka ne mɔ azo.

¹⁰ Hyɛlɔn fienemgbole ne bayɛ adidileka amaa me menli ne mɔɔ ɛkpondɛ me bo zo la mboane nee nlankɛ, yɛɛ Ekɔ Bɔnza[10] bayɛ ɛleka mɔɔ bɛ nlankɛ balie bɛ ɛnwomenle a.

¹¹“Na bɛdabɛ mɔɔ bɛkpo medame Ɛdɛnkɛma, na bɛ rɛle fi me boka nwuanzanwuanza ne, na bɛsie ɛkponle bɛsonle Saleɛ nee Ɛbolɔ Nrɛlaleɛ awozonle Gaade nee Mɛnae la,

¹²mebaye bɛ meamaa bɛawu dadeɛ nloa, bɛbahu bɛ muala, ɔboalekɛ menvɛlɛle bɛ la bɛambua me, mendendɛle mengilele bɛ, na bɛandie. Bɛyɛle mɔɔ le ɛtane wɔ me nye zo la na bɛkpale nu bɛyɛle mɔɔ me nye ɛnlie nwolɛ la.

¹³Yemɔti medame Awulae Nyamenle mese: Bɛnlea, me sonvolɛma ne bali debie, na bɛmɛ, ɛhɔne bahu bɛ; bɛnlea, me sonvolɛma ne banlo nzule, na bɛmɛ, nzuhɔne bahu bɛ; bɛnlea, me sonvolɛma ne anye balie, na bɛmɛ, bɛ nyunlu bagua aze;

¹⁴bɛnlea, me sonvolɛma ne bava fɛlɛkolilɛ ado edwɛne bɛ ahonle nu, na bɛmɛ, bɛbazu bɛali nyane bɛ ahonle nu na bɛaye awolɛ wɔ bɛ nwo mɔɔ yelɛyela bɛ la anwo.

¹⁵Me menli ne mɔɔ mekpa nu meye bɛ la bava bɛ duma awa amonle, yɛɛ Awulae Nyamenle ne bahu bɛ; na me sonvolɛma ne ɛdeɛ, mebava duma fofolɛ meavɛlɛ bɛ.

¹⁶Awie biala mɔɔ wɔ maanle ne anu la bava medame Nɔhalɛ Nyamenle ne ayila ɔ nwo, yɛɛ awie biala mɔɔ wɔ maanle ne anu mɔɔ ka ndane la bava medame, Nɔhalɛ Nyamenle me duma a aha ndane ne a, ɔboalekɛ bɛ alumua ngyegyelɛ ne ɛvi me ti anu, yɛɛ bɛ nzonlɛ ɛye me nye zo.”

¹⁷ Ɛdɛnkɛma se, “Bɛnlea, mebɔ anwuma fofolɛ nee azɛlɛ fofolɛ; ninyɛne dɛba ne mɔ abo zo baminli mɔɔ awie ɛnrɛhakye bɛ bieko a.

¹⁸Bɛmaa bɛ nye ɛlie na bɛli fɛlɛko dahuu wɔ mɔɔ mebɔ la anwo, ɔluakɛ mebɔ Gyɛlusalɛm kɛ ɔle anyelielɛ suakpole, yɛɛ mebɔ menli mɔɔ wɔ zolɛ la kɛ bɛ nye ɛlie.

¹⁹ Me nye balie Gyɛlusalɛm anwo, na meali fɛlɛko wɔ me menli ne ati. Bɛnrɛde ɛzunlɛ bieko wɔ ɛkɛ, yɛɛ bɛnrɛde nyanenwunlɛ ɛnelɛ wɔ ɛkɛ.

²⁰Adɔma mɔɔ bɛwo ye a ɔngyɛ ɛnee yewu la, bie ɛnrɛzi suakpole ne azo, yɛɛ kpanyinli mɔɔ ɛtɛwiele ye mekɛ muala di la ɛnrɛwu. Ɔluakɛ kakula bali ɛvolɛ ɛya na yeawu, yɛɛ ɛtanenli bali ɛvolɛ ɛya, na munzule ngome.

²¹Bɛbasisi azua bɛadɛnla nu, bɛbayɛ vanye egyinli na bɛali nuhua ma ne bie.

²²Bɛnrɛsisi azua na awie mɔ gyɛne adɛnlɛdɛnla nu; bɛnrɛlua na awie mɔ gyɛne ali. Kɛ baka si kyɛ na yeawu la, zɔhane ala yɛɛ me menli ne bahyɛ a, na me menli ne mɔɔ mekpa nu meye bɛ la badidi bɛ sa anloa gyima nwo bɛ nye alie ahyɛ.

²³Bɛnrɛvɛ ɛvɛlɛ mgbane, anzɛɛ bɛnrɛwo mralɛ bɛnrɛmaa munzule ɛnrɛzi bɛ nwo zo, ɔluakɛ bɛbayɛ Ɛdɛnkɛma menli ne mɔɔ yeyila bɛ la amra. Bɛ bo zo amra noko banyia nyilalɛ ne bie.

²⁴Bɛnrɛvɛlɛ bɔbɔ na mealie bɛ zo; mebade bɛ edwɛkɛ wɔ mekɛ mɔɔ bɛ nloa wɔ zo bɛlɛsɛlɛ la.

²⁵ Bedi nee boane ralɛ babɔ nu adidi, awenade bali ndile kɛ ɛnlankɛ la, yɛɛ ɛwɔlɛ bali ndɛtɛlɛ. Bɛnrɛboda awie yɛɛ bɛnrɛzɛkye debie wɔ me boka nwuanzanwuanza ne azo, medame Ɛdɛnkɛma a mese a.”