Read Nzema Aye 66 Bible Online

Aye 66 - Nzema bible

Aye 66

¹ Ɛdɛnkɛma se, “Anwuma le me belemgbunli ebia, yɛɛ azɛlɛ ye le me gyakɛ abo ebia. Duzu sua a bɛkɛzi bɛkɛmaa me a, yɛɛ nienwu a medie me ɛnwomenle a?

²Medame a meva me sa mebɔ ninyɛne kɔsɔɔti a, yemɔti debie biala le me ɛdeɛ, medame Ɛdɛnkɛma a mese a. Noko sonla mɔɔ me nye balie ɔ nwo la a le sonla ne mɔɔ le bɛlɛvo, ɔnu ɔ nwo, ɔsulo me na ɔdi me edwɛkɛ zo la.

³“Sonla ne mɔɔ ku ɛnlankɛ la le kɛ sonla ne mɔɔ ku sonla la; mɔɔ fa boane bɔ azu la le kɛ mɔɔ bu twea kɔme ku ye la; mɔɔ fa abɛlɛ ma yɛ azubɔdeɛ la le kɛ sonla mɔɔ fa kpolike mogya yɛ azubɔdeɛ la; mɔɔ fa ɛyɛlɛ evuanlɛ yɛ ngakyelɛ azubɔdeɛ la le kɛ sonla mɔɔ sɔ amonle la. Ɛhye mɔ ɛva bɛ ndenle ɛdeɛ zo, yɛɛ bɛ nye die bɛ bɛkyi ninyɛne ne mɔ anwo.

⁴Mebamaa bɛanwu amaneɛ, yɛɛ mebamaa amaneɛnwunlɛ ne mɔɔ bɛsulo ye la ara bɛ nwo zo, ɔboalekɛ menvɛlɛle la, awie anlie zolɛ, mendendɛle la, bɛandie; bɛyɛle mɔɔ le ɛtane wɔ me nye zo la, na bɛvale mɔɔ me nye ɛnlie nwolɛ la.”

⁵Bɛmɛ mɔɔ bɛsulo Ɛdɛnkɛma na bɛdi ye edwɛkɛ zo la, bɛdie mɔɔ ɔlɛka la. Ɔse, “Bɛ mediema ne mɔ mɔɔ kyi bɛ, na medame ti bɛmbu bɛ bie la ɛha kɛ, ‘Bɛmaa Ɛdɛnkɛma ɛhile ye anyunlunyia ne na ɔlie bɛ, amaa yɛanwu bɛ anyelielɛ ne.’ Na bɛmɛ bɔbɔ yɛɛ bɛ nyunlu bagua aze a.

⁶Bɛdie alɛra kpole ne mɔɔ wɔ suakpole ne azo lɔ la! Ɛnelɛ ne vi Ɛzonlenlɛ Sua ne anu! Ɛdɛnkɛma ane ɔ, na ɔlɛtea ye kpɔvolɛma ne!

⁷ “Me suakpole nwuanzanwuanza ne le kɛ raalɛ mɔɔ ako anga ye na yeawo anzɛɛ yeande awolɛ nyane wɔ ye ralɛ nrenya ɛwolɛ nu la.

⁸Nwane a ɛde edwɛkɛ zɛhae bie ɛlɛ a? Nwane a ɛnwu ninyɛne zɛhae mɔ bie ɛlɛ a? Asoo bɛkyekye maanle kenle kokye? Asoo bɛfa mekɛ ekyi bie bɛziezie maanle. Ɔluakɛ mɔɔ Zayɔn ako hanle ye ala la yɛɛ ɔwole ɔ mra mrenya ne mɔ a.

⁹Na medame Ɛdɛnkɛma, mebiza kɛ: Memaa ɔva ɛkolɛ na memmamaa ɔwo ɔ? Asoo medame, mɔɔ memaa bɛwo la, mendua ye awodeɛ ne adenle ɔ?”

¹⁰Bɛ nee Gyɛlusalɛmma amuala bɛ nye ɛlie. Bɛdabɛ mɔɔ bɛkulo Gyɛlusalɛm la, nee bɛdabɛ mɔɔ bɛsu ye la, bɛli fɛlɛko wɔ ɔ ti,

¹¹amaa bɛanlo ɔ nyɛfo ne bie bɛ ko ayi, amaa bɛava anyelielɛ bɛahwihwi ye anyunlunyia nyɛfonzule ne mɔɔ ɛbu la bie bɛanlo.

¹²Ɛdɛnkɛma se, “Bɛnlea, mebamaa bɛakpazi na maanle maanle ne mɔ anwonyia abu bɛ nwo zo kɛ azule mɔɔ bu aze la. Mebanloa bɛ nyɛfonlɛ, mebavia bɛ me nzi, na meadedɛ bɛ me gyakɛ azo meaha bɛ nwɔhoa.

¹³Kɛ ninli si kyekye ɔ ra arɛle la, zɔhane ala yɛɛ mebakyekye bɛ rɛle a. Mebakyekye bɛ rɛle wɔ Gyɛlusalɛm.

¹⁴Bɛbanwu ye, na bɛali fɛlɛko. Bɛ mbowule nu bamia na bɛade kpɔkɛ; na menli kɔsɔɔti banwu kɛ medame Ɛdɛnkɛma, me sa wɔ me menli ne ɛkpazilɛ nu, na me ɛya ne wɔ me kpɔvolɛma anwo zo.”

¹⁵Ɔluakɛ bɛnlea, Ɛdɛnkɛma balua senle nu a ara a, yɛɛ ye konle ehwili ne mɔ bara kɛ ahumu, bɛbava ɛya kpole bɛava senle bɛadea menli mɔɔ di fɔlɛ la.

¹⁶Ɔluakɛ Ɛdɛnkɛma bava senle a abua ndɛne a, na yeava ye dadeɛ ne yeado menli kɔsɔɔti anwo zo. Na bɛdabɛ mɔɔ Ɛdɛnkɛma bahu bɛ la zonle kpalɛ.

¹⁷Ɛdɛnkɛma se, “Bɛdabɛ mɔɔ bɛnua bɛ nwo, bɛte bɛ nwo bɛdi menli avinli bɛkɔ amonle nu bɛkɔdi kpolike nane, ahila nee bɛkyi ninyɛne ne mɔ la amuala bagulu nu awu, medame Ɛdɛnkɛma a mese a.

¹⁸Ɔluakɛ meze bɛ gyima nee bɛ adwenle ne mɔ. Na melɛba mearaboɔboa maanle maanle nee aneɛ aneɛ ne mɔ anloa, na bɛbara bɛaranwu me anyunlunyia ne,

¹⁹na mebayɛ bɛ nzonlɛ. “Bɛdabɛ mɔɔ bɛkɛvi nuhua la, mebava bɛ meahɔ maanle maanle nu moa moa: Sepeen, Lebea anzɛɛ Pɛɛle, yɛɛ Ledea, mɔɔ bɛlɛ menli mɔɔ ze ɛda to kpalɛ kpalɛ la, akee Tubale yɛɛ Gyeevan (Gilisi) nee maanle maanle mɔɔ wɔ moa moa, mɔɔ ɛtɛtele me nganeɛ ɛlɛ anzɛɛ ɛtɛnwunle me anyunlunyia ne ɛlɛ la. Na bɛbaha me anyunlunyia nwo edwɛkɛ bɛahile maanle maanle ne mɔ.

²⁰Menli ɛhye mɔ bava bɛ mediema ne mɔ mɔɔ wɔ maanle maanle ne mɔ anu la wɔ mgbɔnwɔ zo, konle ehwili nee bonrane nu, wɔ mgbɔnwɔndua nee afunlumu zo bɛarɛlɛ me wɔ me boka nwuanzanwuanza ne azo, Gyɛlusalɛm, kɛ azubɔdeɛ; medame Ɛdɛnkɛma a mese a. Bɛbava bɛ bɛara, kɛmɔ Yizilayɛma fa bɛ ma azubɔdeɛ wɔ debie anu bɔkɔbɔkɔ nu ba Ɛdɛnkɛma Ɛzonlenlɛ Sua ne anu la.

²¹Mebaye bie mɔ meayɛ bɛ Sɛlɛvolɛma nee Livaema, medame Ɛdɛnkɛma a mese a.

²² “Ɔluakɛ medame Ɛdɛnkɛma, mese, kɛmɔ anwuma fofolɛ ne nee azɛlɛ fofolɛ ne mɔɔ mebabɔ la badɛnla ɛkɛ ne dahuu la, zɔhane ala yɛɛ bɛ bo zo amra nee bɛ duma baha ɛkɛ dahuu a.

²³Siane Fofolɛ Ɛvoyia biala nee Ɛnwomenlelielɛ Kenle biala, menli kɔsɔɔti barazonle me, medame Ɛdɛnkɛma a mese a.

²⁴ Na bɛbavinde bɛaranlea menli mɔɔ ɛde me nwo atua la avunli. Bɛ nwo azone ne mɔ ɛnrɛwu ɛlɛ, senle mɔɔ ɛlɛyela bɛ la ɛnrɛnlu ɛlɛ, na bɛbayɛ kyibadeɛ bɛamaa menli kɔsɔɔti.”