Read Nzema Aye 7 Bible Online

Aye 7 - Nzema bible

Aye 7

¹ Dwuda Belemgbunli Ehaze mekɛ zo, Selea Belemgbunli Rilizen nee Yizilayɛ Belemgbunli Pikaa vale bɛ ɛlɔnema rale Gyɛlusalɛmma anwo zo, noko bɛangola bɛ. Belemgbunli Ehaze ɔ ze a le Dwuda Belemgbunli Dwotam yɛɛ ɔ nlenya a le Belemgbunli Ɛzaya; yɛɛ Pikaa noko ɔ ze a le Relɛmalaya.

²Mɔɔ bɛhanle bɛhilele Devidi sua nu amra kɛ ɛlɔnema vi Selea ɛraboka Yifelaem anwo la, Ehaze nee ye menli ne kɔsɔɔti ahonle dule na bɛ nwo wozole bɛ kɛ ɛbɔ nu mbaka mɔɔ anwoma ɛlɛbɔ nu la.

³Na Ɛdɛnkɛma zele Ayezaya kɛ, “Kɔ na kɔyia Ehaze, ɛ nee ɛ ra nrenya Hyiyaa Gyahyɛbe bɛhɔ na ɛbahɔdo ye wɔ ɛleka mɔɔ bɛdukue sɔlɔ azule ne la adenle ne anu, ɛleka mɔɔ bɛnwo ndanlɛ ne la.

⁴Ka kile ye kɛ: Gyinla ɛ nwo, yɛ koonwu, mmasulo yɛɛ mmamaa wɔ ahonle tu. Ɔluakɛ Rilizen nee ye Selea ɛlɔnema ne yɛɛ Belemgbunli Pikaa ɛya mɔɔ ɛva la le kɛ senle nu ɛyɛne mɔɔ ɛlɛnu na ɔlɛkpu esike la.

⁵Selea nee Yizilayɛ nee Relɛmalaya ara nrenya ne ɛhɔ ɛ ti akpamo

⁶kɛ bɛba Dwudama anwo zo, bɛadu bɛ ahonle, bɛaho bɛava maanle ne, na bɛava Teebili ara nrenya ne bɛazie Dwuda belemgbunli.

⁷“ Na medame Ɛdɛnkɛma, mese ɛha ɛhile bɛ kɛ: Ɔnrɛyɛ boɛ, yɛɛ ɛhye ɛnrɛzi ɛlɛ!

⁸Ɔluakɛ Selea ati zɔ Dɛmasekɛse, yɛɛ Dɛmasekɛse ati zɔ Rilizen. Na Yizilayɛ ɛdeɛ, toonwo mɔɔ ɔkadwu ɛvolɛ abulasia nee nnu la ɛnee yetete bɔkɔɔ mɔɔ bɛnrɛvɛlɛ ye maanle bieko a.

⁹Yizilayɛ ati zɔ Samɛlea yɛɛ Samɛlea ati zɔ Belemgbunli Pikaa. “Maa Belemgbunli Ehaze ɛde ɔ bo kɛ saa ye diedi gyi kpundii ɛdeɛ a ɛnee ɔdaye ɔgyi kpundii.”

¹⁰Eza Ɛdɛnkɛma dendɛle hilele Ehaze. Ɔse, “Biza Ɛdɛnkɛma wɔ Nyamenle ne maa ɔmaa wɔ sɛkɛlɛneɛ.

¹¹Maa ɔyɛ kuma kɛ Ɛbolɔ anzɛɛ ɔyɛ tendenle ɔdwu anwuma.”

¹²Na Ehaze hanle kɛ, “Menrɛbiza, yɛɛ menrɛzɔ Ɛdɛnkɛma menrɛnlea.”

¹³Ayezaya buale ye kɛ, “Ɛnee bɛmɛ Devidi abo zo amra, bɛdie! Bɛdwenle kɛ ɔle nzɛmedɛ kɛ bɛkɛgyegye menli, mɔɔ yemɔti bɛlɛgyegye me Nyamenle ɔdaye noko a?

¹⁴ Yemɔti Awulae ɔdaye ɔbamaa wɔ sɛkɛlɛneɛ. Bɛnlea, kakula bɛlɛra banrenzɛ yeawo ralɛ nrenya, na yeado ye Yimanoɛle.

¹⁵Saa kakula zɔhane nyi mɔɔ ɔkola ɔkpo ɛtane, ɔfa kpalɛ la a, ɔbanlo ɛnlankɛ nyɛfonzule nee wolɛ.

¹⁶Ɔluakɛ menli banriandi avi azɛlɛ ne mɔɔ arelemgbunli nwiɔ ne mɔɔ ɛsulo bɛ la sie la azo kolaa na kakula ne anyi ayɛ mɔɔ ɔkola ɔkpo ɛtane ɔfa kpalɛ la.

¹⁷“Ɛdɛnkɛma bamaa mekɛ bie mɔɔ bie ɛtɛtole bɛ ɛlɛ, ɔvi mekɛ mɔɔ Yizilayɛma dele bɛ nwo vile Dwuda anwo la arado wɔ nee wɔ menli ne nee ɛ bo zo amra. Ɔkava Aselea belemgbunli ne yeara ɛ nwo zo.

¹⁸“Mekɛ ne anu Ɛdɛnkɛma babɔ nvonloma avɛlɛ nrɛzenra ne mɔ mɔɔ wɔ Yigyibiti azule ne mɔ abɔleɛ ne mɔ, yɛɛ wolɛ ne mɔ mɔɔ wɔ Aselea azɛlɛ zo la.

¹⁹Na bɛ muala bɛbara bɛaradɛnlɛdɛnla awoka ne mɔ avinli ahuma mgbole ne mɔ anu, awolɛ adokule ne mɔ anu, mbowule avinli nee adidileka ne mɔ kɔsɔɔti anu.

²⁰“Saa mekɛ ne dwu a, Ɛdɛnkɛma bava dadeɛ dɛma mɔɔ yebɔ ye ɛkpa yevi Azule Yufileti ne anzi lɔ, wɔ Aselea belemgbunli ne ɛkɛ ne la akpa bɛ ti, bɛ gyakɛ anwo enrinli nee bɛ kɛsa amuala.

²¹“Mekɛ ne anu, sonla mɔɔ sie ɛnlankɛ edonraa ko nee mboane nwiɔ la

²²banlo ɛnlankɛ nyɛfonzule, ɔboalekɛ ɔbanyia ye dɔɔnwo, yɛɛ awie biala mɔɔ baha azɛlɛ ne azo la banlo ɛnlankɛ nyɛfonzule nee wolɛ.

²³“Mekɛ zɔhane, ɛleka biala mɔɔ vanye mbaka apenle mɔɔ bɛtɔ ye dwɛtɛ fufule apenle la bafifi mbowule nee kolokolonyɛma ngome.

²⁴Menli bava ɛda nee ɛda mbaka ara ɛkɛ ne arali ɛbɔlɛ, ɔluakɛ azɛlɛ ne azo kɔsɔɔti bayɛ mbowule nee kolokolonyɛma.

²⁵Kolokolonyɛma nee mbowule ne mɔ ati, awoka ne mɔ azo mɔɔ anrɛɛ bɛfa koanlɛ a bɛdɔ la, bɛnrɛhɔ zolɛ bieko, bɛbayɛ ɛleka mɔɔ bɛgyakyi nlankɛ nee mboane bɛmaa bɛkɔdidi a.”