Read Nzema Aye 8 Bible Online

Aye 8 - Nzema bible

Aye 8

¹Akee Ɛdɛnkɛma zele me kɛ, “Fa bolɛ ɛdɛbaa kpole mɔɔ bɛkɛlɛ zo la, na kɛlɛ zolɛ mɔɔ awie biala kola kenga la[1] kɛ, ‘Meehɛ Hyɛlale Hahyebaze.’[2]

²Na menyianle dasevolɛma kpalɛ nwiɔ lile me daselɛ. Bɛmɛ a le Sɛlɛvolɛ Yulaya nee Gyɛbɛlɛkaya ara nrenya Zɛkalaya.”

³Mekɛ guale nu la menwunle me ye (Nyamenle kpɔmanvolɛ raalɛ) ne, na ɔnrenzɛle na ɔwole ralɛ nrenya. Na Ɛdɛnkɛma zele me kɛ, “To ye Meehɛ Hyalale Hahyebaze,

⁴ɔluakɛ mɔɔ kakula ne kahola ɔ nloa buke aha ‘Egya’ anzɛɛ ‘Ɔmɔ’ la, ɛnee Aselea belemgbunli ne ɛzoa Dɛmasekɛsema nee Samɛleama anwo ninyɛne kɔsɔɔti ɛhɔ.”

⁵Ɛdɛnkɛma dendɛle hilele me bieko.

⁶Ɔse, “Kɛmɔ menli ɛhye mɔ ɛkpo nzule ne mɔɔ wɔ Azule Hyaelowa mɔɔ se bɛtɛɛ, na bɛsulo Belemgbunli Rilizen nee Relɛmalaya ara nrenya Belemgbunli Pikaa la,

⁷yemɔti bɛnlea, medame, melɛmaa nzule ne mɔɔ wɔ Azule kpole anwo ɛzulolɛ ne mɔɔ lɛ nzule dɔɔnwo la, Aselea belemgbunli ne nee ye ɛlɔnema amuala ara bɛ nwo zo. Ɔbayi yeabulu ye pemgbɛne ne mɔ azo, yeabu aze,

⁸na yearava Dwuda maanle ne, yeabu aze toonwo yeali bɛ kɔme nu. Ɔbadɛlɛ yeava maanle ne amuala.” O Nyamenle nee yɛ de!

⁹Bɛmɛ maanle maanle kɔsɔɔti, munzule ɛha bɛ, bɛli nyane; bɛmɛ maanle maanle mɔɔ bɛwɔ moa moa la, bɛdie! Bɛva sulosulo bɛbɛza! Ɛhɛe, bɛva sulosulo bɛbɛza.

¹⁰Bɛyia nu bɛva adwenle, noko ɔnrɛyɛ boɛ; bɛbɔ nu bɛbɔ kpɔkɛ, noko ɔnrɛyɛ boɛ, ɔluakɛ Nyamenle nee yɛ de.

¹¹Ɛdɛnkɛma vale ye tumi kpole ne dendɛle hilele me na ɔbɔle me kɔkɔ kɛ memmafa menli ɛhye mɔ agyakɛ.

¹² Ɔse, “Mmafa ɛ nwo ɛdielie bɛ nwule nyɛleɛ ne mɔ anu, mmasulo debie mɔɔ bɛmɛ bɛsulo ye la, yɛɛ mmamaa wɔ ahonle tu.

¹³Kakye kɛ Tumivolɛ Ɛdɛnkɛma ala a le nwuanzanwuanza a. Yemɔ yɛɛ sulo ye na maa ɔdu wɔ ahonle a.

¹⁴ Na yemɔ yɛɛ ɔbayɛ ɛleka nwuanzanwuanza a. Ɔbayɛ bolɛ mɔɔ menli bava ɔ nwo ɛya, ɔbayɛ azekpolɛ bodane yeamaa Yizilayɛma nee Dwudama, yɛɛ ɔbayɛ ɛhane yeamaa Gyɛlusalɛmma.

¹⁵Menli dɔɔnwo bafofo zolɛ na bɛadu bɛagua; bɛbado ɛhane na bɛahye bɛ bɛahɔ.”

¹⁶Bɛmɛ me ɛdoavolɛma, bɛva edwɛkɛ ne mɔɔ Nyamenle ɛha ɛhile me la bɛzie boɛ.

¹⁷ Ɛdɛnkɛma ɛva ɔ nye ɛvea Yizilayɛma, na mame mekendɛ ye, yɛɛ melɛ anyelazo wɔ ye nu.

¹⁸ Bɛnlea, medame yɛɛ me mra mrenya mɔɔ Ɛdɛnkɛma ɛva ɛmaa me la ɛyɛ sɛkɛlɛneɛ nee nwanwane nrɛlaleɛ mɔɔ Tumivolɛ Ɛdɛnkɛma, mɔɔ de ye ebia nu wɔ Boka Zayɔn la ɛva ɛmaa Yizilayɛma a.

¹⁹Saa menli ka kile bɛ kɛ, “Bɛhɔbiza bɛ nwo wɔ menli mɔɔ tendɛ nwomenle nloa azo anzɛɛ nyɛnema mɔɔ su peapea na bɛtendɛ bɛ nzo abo la ɛkɛ a,” ɛnee bɛkpondɛ bɛaha kɛ ɔnle kɛ menli biza edwɛkɛ wɔ bɛ Nyamenle ne ɛkɛ ɔ? Asoo ɔle kpalɛ kɛ bɛkɛbiza anyewɔzoamra ati wɔ mɔwuamra ɛkɛ ɔ?

²⁰Bɛdie mɔɔ Ɛdɛnkɛma ɛlɛka la na bɛli ye ngilehilelɛ zo! Nɔhalɛ, edwɛkɛ ɛhye mɔɔ bɛka la aleɛ ɛnrɛhye zo.

²¹Menli ne bava ɛhɔne aluolua azɛlɛ ne azo, bɛ rɛle abɔ bɛ nwo. Saa ɛhɔne ɛlɛku bɛ a bɛbava ɛya na bɛawa bɛ belemgbunli ne nee bɛ Nyamenle ne amonle. Bɛbanlea anwomanyunlu,

²²bɛanlea aze, na mɔɔ bɛbanwu ye la a le arɛlebɔlɛ, awozinli, yɛɛ abodelɛ; na bɛbavuandi bɛ bɛagua awozinli kabii nu.