Read Nzema Aye 9 Bible Online

Aye 9 - Nzema bible

Aye 9

¹ Adenle biala ɛnrɛla ɛkɛ mɔɔ bɛdua nu bɛnriandi amaneɛnwunlɛ mekɛ ɛhye a. Kɛ Zɛbulɛn nee Nafetalae mbusua ekpunli ne mɔ azɛlɛ ne nwunle amaneɛ anyiemgba nu wɔ mekɛ mɔɔ ɛraze ɛhɔ la ɛne. Noko nzinlii ɔbamaa bɛali bɛ eni, ɔvi Mɛdetɛlenia Nyevile ne anloa yeahɔdwu Dwɔdan ne anzi lɔ, toonwo yeahɔdwu Galeli, suakpole ne mɔɔ nyɛvolɛ de zolɛ la.

² Menli ne mɔɔ luale awozinli nu la ɛnwu wienyi kpole bie; bɛdabɛ mɔɔ bɛdɛnlanle awozinli kabii azɛlɛ zo la, wienyi ɛda bɛ nwo zo.

³Wɔmaa maanlema anwo ɛzo, wɔmaa bɛ anyelielɛ ɛyɛ kpole; bɛdi fɛlɛko wɔ ɛ nyunlu kɛ menli mɔɔ ɛbu bɛyɔba na bɛ nye ɛlie, kɛ menli mɔɔ ɛnyia afedeɛ na bɛlɛkyɛ la.

⁴Ɔluakɛ wɔzokoɛ maanle ne adesoa, wɔbubu ye gyɛnvayile nu; wɔbubu ye sisiravolɛ ne kpɔma nu, kɛmɔ ɛvale ɛyɛle Medeanema la.

⁵Akee ɛlɔnema mɔɔ ɛlɛba la mgbɔlaboa nee bɛ adɛladeɛ mɔɔ ɛyɛ mogya ngome la, bayɛ kɛ ɛyɛne wɔ senle nu.

⁶Ɔluakɛ bɛwo kakula bie bɛmaa yɛ, bɛmaa yɛ ralɛ nrenya; yemɔ yɛɛ maanlebulɛ ne badɔ ɔ sa zo a, bɛbavɛlɛ ye “Nwanwane, Folɛtuvolɛ, Nyamenle Bedevinli, Damɛnlangoate Selɛ, Anzonudwolɛ Belemgbunli.”

⁷ Ye maanlebulɛ ne bahɔ zo melɛ mɔɔ ɛnlɛ awieleɛ; ye maanlema anzo nu badwo bɛ dahuu. Ɔbali ye ebia ne kɛ yeli Belemgbunli Devidi agya, yeava nɔhalɛlilɛ nee pɛlepɛlelilɛ yeabu ye maanle ne, ɔvi ɛnɛ mɔɔ kɔ nee mekɛ mɔɔ ɛnlɛ awieleɛ. Tumivolɛ Ɛdɛnkɛma ɛbɔ kpɔkɛ kɛ ɔbayɛ ɛhye.

⁸Awulae ɛdendɛ ɛtia Gyekɔbo abo zo amra, na ɔbaha Yizilayɛma kɔsɔɔti.

⁹Menli ne amuala, bɛdabɛ mɔɔ bɛwɔ Yifelaem nee Samɛlea la amuala banwu kɛ Awulae a ɛyɛ a. Bɛmɛ, bɛtendɛ mgbole na bɛmemaa bɛ nwo zo bɛka kɛ,

¹⁰“Belekese ne mɔ yɛɛ ɛdudu ɛgua a, na yɛbava awolɛ mɔɔ bɛze la yeazi yɛ azua ne mɔ. Bɛdudu sekamɔ baka mgbunla ne mɔ, na yɛbava sida mbaka yɛaziezie bɛ bo zo ne mɔ.”

¹¹Yemɔti Ɛdɛnkɛma ɛmaa kpɔvolɛma ne ɛdwazo kɛ bɛrɛla bɛ nwo zo.

¹²Seleama mɔɔ vi aduduleɛ bara yɛɛ Filisitiama mɔɔ vi adɔleɛ bara la ɛbuke bɛ nloa anu wanaanwo kɛ bɛbahye Yizilayɛma bɛali. Ɛhye mɔ amuala anzi, Ɛdɛnkɛma ɛya ne ɛnrɛdwo; ɔbadenrɛ ɔ sa yeadea bɛ.

¹³Yizilayɛma annu bɛ nwo kɛ Tumivolɛ Ɛdɛnkɛma ɛdea bɛ a, yɛɛ bɛamkpondɛ ɔ bo zo.

¹⁴Yemɔti Ɛdɛnkɛma pɛle Yizilayɛma ati nee bɛ dua, mrɛlakɛ nee ndɔ kenle kokye ala.

¹⁵Sonla mɔɔ le kpanyinli nee mɔɔ bɛdi ye eni la a le Yizilayɛma ati ne, yɛɛ Nyamenle kpɔmanvolɛ ne mɔɔ kilehile adalɛ ngilehilelɛ la a le dualɛ ne.

¹⁶Bɛdabɛ mɔɔ bɛli menli ɛhye mɔ anyunlu bɛkile bɛ adenle la minli bɛ, yɛɛ bɛdabɛ mɔɔ bɛli mgbanyinli nee Nyamenle kpɔmanvolɛma ɛhye mɔ anzi la noma bɔkɔɔ.

¹⁷Zɔhane ati Awulae anye ɛnlie bɛ mgbavolɛ ne mɔ anwo, yɛɛ ɔnlɛ anwunvɔnezelɛ ɔmmaa bɛ ahunlanvolɛ mraalɛ nee bɛdabɛ mɔɔ bɛnlɛ bɛ ze mɔ la. Ɔluakɛ awie biala ɛnze Nyamenle na ɔbɔ munzule ɛbɛla, yɛɛ awie biala ka ɛtane. Ɔlua ɛhye mɔ ati Ɛdɛnkɛma ɛya ne ɛnrɛdwo, ɔbahɔ zolɛ yeadenrɛ ɔ sa yeadea bɛ.

¹⁸Ɔluakɛ menli ne amumuyɛ ne yela kɛ senle, ɔyela mbowunzaka nee kolokolonyɛma; ɔmaa kpɔkɛmile sɔ, ye esike dwazo bolonwonwo kɔ anwuma.

¹⁹Tumivolɛ Ɛdɛnkɛma ɛya mɔɔ ɛva la ɛzɔ ɛyela azɛlɛ ne, na menli ne ɛyɛ kɛ ɛyɛne mɔɔ wɔ senle nu la; adiema bɔbɔ ɛnze ɔ diema anwunvɔne.

²⁰Bɛto bɛ sa fema bɛfa, noko ɛhɔne ku bɛ, yɛɛ bɛdidi bɛkɔ bɛne zo, noko bɛ ko ɛnyi, awie ko biala di ɔ gɔnwo nwonane.

²¹Manasɛma teta Yifelaemma yɛɛ Yifelaemma teta Manasɛma na bɛ mu nwiɔ bɛabɔ nu bɛateta Dwudama. Ɛhye mɔ amuala anzi, Ɛdɛnkɛma ɛya ne ɛnrɛdwo; ɔbahɔ zolɛ yeadenrɛ ɔ sa yeadea bɛ.