Read Nzema Sɛlɛ 1 Bible Online

Sɛlɛ 1 - Nzema bible

Sɛlɛ 1

¹Ɛdɛnkɛma dendɛle ye Ndanlɛ Sua ne anu vɛlɛle Mosisi na ɔzele ye kɛ,

²“Tendɛ kile Yizilayɛma, na ka kile bɛ kɛ: Saa bɛ nuhua bie fa ye azubɔdeɛ ara Ɛdɛnkɛma anyunlu a, ɔva ye ɛnlankɛ ne anzɛɛ boane ne anzɛɛ abɔnkye azubɔdeɛ ne ɔvi ɔdaye ye tunli ne anu.

³Saa ɔfa ɛnlankɛ yeabɔ ɛyelalɛ azu a, ɔwɔ kɛ ɔfa nyinli mɔɔ anwo ɛnlɛ dɛne la. Ɔwɔ kɛ ɔfa ɔbagyinla Ɛdɛnkɛma Ndanlɛ Sua ne anuhɔlɛ ne, amaa Ɛdɛnkɛma alie ɔdaye mumua ne ado nu.

⁴Ɔwɔ kɛ ɔfa ɔ sa ɔto ɛyelalɛ azubɔdeɛ ne ati zo, na bɛkɛlie bɛkɛdo nu kɛ ɔle ahenle ne ati mgbɔdalɛ.

⁵Akee ahenle ne ɛhu ɛnlankɛ ne wɔ Ɛdɛnkɛma anyunlu ɛkɛ na Aalɔn amra sɛlɛvolɛma ne ɛva mogya ne ɛmaa Ɛdɛnkɛma, na bɛdo bɛgua azukponle ne mɔɔ gyi Ɛdɛnkɛma Ndanlɛ Sua ne anlenkɛ ne anloa la anwo amuala.

⁶Akee ahenle mɔɔ lɛ azubɔdeɛ ne la ɛye nane ne nwoma na ɔbia ye.

⁷Aalɔn amra sɛlɛvolɛma ne ɛwuda senle wɔ azukponle ne azo na bɛziezie ɛyɛne ne mɔ mɔɔ wɔ senle ne anu la.

⁸Bɛva nane azinli ne mɔ, tile ne nee ɛnlome ne bɛgua ɛyɛne ne mɔɔ wɔ senle ne anu la azo wɔ azukponle ne azo.

⁹Akee ahenle ne ɛva nzule ɛnrinzi nane ne akunlu ninyɛne ne nee ye ndwɛlɛ ne mɔ anwo. Na sɛlɛvolɛ ne ɛyela ɔ muala wɔ azukponle ne azo kɛ ɔle ɛyelalɛ azubɔlɛ. Azubɔlɛ zɛhae mɔɔ bɛfa senle bɛbɔ la evuanlɛ sɔ Ɛdɛnkɛma anye.

¹⁰“Saa sonla ne ahyɛlɛdeɛ ne le ɛyelalɛ azubɔdeɛ mɔɔ vi ɔdaye ye mboane anzɛɛ mbɔnkye nu a, ɔwɔ kɛ ɔfa nyinli mɔɔ anwo ɛnlɛ dɛne la.

¹¹Ɔwɔ kɛ ɔku ye wɔ azukponle ne sɔlɔ wɔ Ɛdɛnkɛma anyunlu, na Aalɔn amra sɛlɛvolɛma ne to ye mogya ne gua azukponle ne anwo amuala yia.

¹²Ɔwɔ kɛ ɔpepɛ ye azinli azinli ɔboka ɔ ti ne nee ye ɛnlome ne, na sɛlɛvolɛ ne siezie bɛ pɛpɛ wɔ ɛyɛne ne mɔɔ wɔ senle ne anu la azo wɔ azukponle ne azo.

¹³Akee ɔva nzule ɔnrinzi nane ne akunlu ne nee ye ndwɛlɛ ne mɔ anwo. Sɛlɛvolɛ ne ɛva bɛ muala na ɔyela bɛ wɔ azukponle ne azo. Ɛhye le ɛyelalɛ azubɔdeɛ mɔɔ bɛfa senle a bɛbɔ a, na ye evuanlɛ sɔ Ɛdɛnkɛma anye.

¹⁴“Saa ahenle ne azubɔdeɛ ne mɔɔ ɔfa yeamaa Ɛdɛnkɛma la le nloma ɛyelalɛ azubɔdeɛ a, ɛnee ɔwɔ kɛ ye azubɔdeɛ ne yɛ abubule anzɛɛ mɔlɔnoma mralɛ.

¹⁵Sɛlɛvolɛ ne bava ara azukponle ne anwo, ahwi ɔ ti anu mogya ne, na yeayela anloma ne wɔ azukponle ne azo. Ɔwɔ kɛ ɔmaa ye mogya ne twi gua azukponle ne foa ko.

¹⁶Akee sɛlɛvolɛ ne fa anloma ne toku ne nee ɔ kunlu ninyɛne ne amuala, na ɔto ɔgua azukponle ne foa ko wɔ ye aduduleɛ ɛleka mɔɔ bɛgua nzonle ne la.

¹⁷Ɔwɔ kɛ sɛlɛvolɛ ne sɔ anloma ne andɛba ne mɔ na ɔsua anloma ne anu nwiɔ, ɔngyia kɛ ɔkɛhyɛ nu nwiɔ sɛsɛ. Akee ɔyela ye wɔ azukponle ne azo wɔ ɛyɛne ne mɔɔ wɔ senle ne anu la azo. Ɔle ɛyelalɛ azubɔdeɛ mɔɔ bɛfa senle a bɛbɔ a, na ye evuanlɛ sɔ Ɛdɛnkɛma anye.