Read Nzema Sɛlɛ 16 Bible Online

Sɛlɛ 16 - Nzema bible

Sɛlɛ 16

¹Aalɔn amra mrenya nwiɔ ne ewule ne anzi, Ɛdɛnkɛma dendɛle hilele Mosisi. Aalɔn amra mrenya nwiɔ ne wule, ɔboalekɛ bɛhwenle bɛbikyele Ɛdɛnkɛma somaa.

² Ɛdɛnkɛma zele Mosisi kɛ, “Ka kile ɛ diema nrenya Aalɔn kɛ ɔmmaba Ɛleka Nwuanzanwuanza ne mɔɔ wɔ mgbɛnu ɛdanlɛ ne akunlu Anwunvɔnezelɛ Ebia ne mɔɔ dua Ngyekyeleɛ Ɛlɛka ne azo la anwo dahuu. Saa ɔyɛ ye zɔhane a, ɔbawu, ɔluakɛ mebaye me nwo meahile wɔ amungu ne mɔɔ wɔ Anwunvɔnezelɛ Ebia ne azo la anu.

³Kɛ ɔwɔ kɛ Aalɔn si ba Nwuanzanwuanza Ɛleka ne la ɛne: Mekɛ biala mɔɔ ɔba la, ɔva ɛnlankɛ nyinli ko ɔyɛ ɛtane azubɔdeɛ yɛɛ boane nyinli ko ɔyɛ ɛyelalɛ azubɔdeɛ ɔrabɔ azu.

⁴“Ɔwɔ kɛ ɔbia, na ɔwula ye sɛlɛvolɛ adɛladeɛ ne mɔ: Lenen tɛladeɛ bubu nwuanzanwuanza ne, lenen akyeso ne, yɛɛ lenen abɔtile ne.

⁵“Akee Yizilayɛ maanlema ne bava mbɔnkye nyinli nwiɔ bɛamaa yeava yeayɛ ɛtane azubɔdeɛ yɛɛ boane nyinli ko bɛamaa yeava yeayɛ ɛyelalɛ azubɔdeɛ.

⁶Aalɔn bava ɛnlankɛ nyinli ne abɔ ɔdaye ye ɛtane nwo azu, na yeayɛ mgbɔdalɛ nzɛlɛlɛ yeamaa ɔ nwo nee ye sua nu amra.

⁷Akee ɔbava mbɔnkye nwiɔ ne yeahɔ Ɛdɛnkɛma anyunlu wɔ Ɛdɛnkɛma Ndanlɛ Sua ne anuhɔlɛ ne.

⁸Ɔbagua mbɔnkye nwiɔ ne ati nzeleba, yeaye ko yeamaa Ɛdɛnkɛma na ko ne noko ahɔ Azazɛle[3] ɛkɛ ne.

⁹Aalɔn bava abɔnkye ne mɔɔ hɔle Ɛdɛnkɛma ɛkɛ ne la amaa Ɛdɛnkɛma na yeava yeabɔ ɛtane azu.

¹⁰Ko ne mɔɔ hɔle Azazɛle ɛkɛ ne la, bɛbava ye anyewɔzo bɛamaa Ɛdɛnkɛma na yeayɛ mgbɔdalɛ nzɛlɛlɛ yeagua zolɛ, amaa bɛava bɛahɔ fienemgbole ne anu bɛahɔgyakyi ye bɛamaa Azazɛle.

¹¹“Saa Aalɔn fa ɛnlankɛ nyinli ɛtane azubɔdeɛ ne bɔ azu maa ɔ nwo, na ɔyɛ mgbɔdalɛ nzɛlɛlɛ ɔmaa ɔ nwo nee ye sua nu amra ɔwie a, ɔbahu ɛnlankɛ nyinli ne yeabɔ ɛtane azu yeamaa ɔ nwo.

¹²Akee ɔbava kyɛnze mɔɔ bɛfa bɛkpu ɛyɛlɛ la yeavula samɛnlankɛ wɔ Ɛdɛnkɛma azukponle ne azo, na eza yeavula ɛyɛlɛ evuanlɛ mɔɔ bɛnlu ye ekyii la ɔ sa nwiɔ yeara mgbɛnu ɛdanlɛ ne akunlu wɔ Nwuanzanwuanza nu Nwuanzaanwu Ɛleka ne.

¹³Ɛkɛ ne, ɔbava ɛyɛlɛ ne yeagua senle ne anu wɔ Ɛdɛnkɛma anyunlu, amaa ɛyɛlɛ ne esike ne aheda Anwunvɔnezelɛ Ebia ne mɔɔ dua Ngyekyeleɛ Ɛlɛka ne azo la azo, amaa yeannwu ye na yeawu.

¹⁴Akee ɔbava ɔ sa ɛrɛlɛsɛka yeabɔ ɛnlankɛ ne mogya ne anu yeakponde Anwunvɔnezelɛ Ebia ne anyunlu ɛkɛ ne fane nsuu.

¹⁵“Akee Aalɔn bahu ɛtane azubɔdeɛ abɔnkye ne yeabɔ azu wɔ Yizilayɛma ati, na yeava ye mogya ne yeahɔ mgbɛnu ɛdanlɛ ne akunlu na yeakponde ye wɔ Anwunvɔnezelɛ Ebia ne azo nee ɔ nyunlu ɛkɛ, kɛmɔ ɔyɛle ɛnlankɛ nyinli ne mogya ne la.

¹⁶Zɛhae yɛɛ ɔbayɛ yeayɛ mgbɔdalɛ nzɛlɛlɛ yeade Nwuanzanwuanza Nu Nwuanzaanwu Ɛleka ne nee Ɛdɛnkɛma Ndanlɛ Sua ne anwo a, kɛmɔ ɔgyi Yizilayɛma avinli na bɛva bɛ ɛtane ne mɔ nee bɛ mɛladonlɛ bɛgua bɛ nwo evinli bɛha ye la.

¹⁷Saa ɔkawolo Nwuanzanwuanza Nu Nwuanzaanwu Ɛleka ne yeahɔyɛ mgbɔdalɛ nzɛlɛlɛ ne a, ɔnle kɛ awie biala kɔ Ɛdɛnkɛma Ndanlɛ Sua ne anu kɔkpula kɛ ɔkɛwie mgbɔdalɛ nzɛlɛlɛ ne yɛ ɔkɛmaa ɔ nwo, ye sua nu amra nee Yizilayɛma kɔsɔɔti la.

¹⁸Ɔwie a, akee ɔbavinde yeahɔ azukponle ne mɔɔ gyi Ɛdɛnkɛma anyunlu ɛkɛ ne la anwo, yeahɔyɛ mgbɔdalɛ nzɛlɛlɛ yeamaa azukponle ne, na yeava ɛnlankɛ ne nee abɔnkye ne mogya ne mɔ bie yeapepe ɔ bati kpokpɔkoo ne mɔ azo yeayia.

¹⁹Ɔwɔ kɛ ɔfa ɔ sa ɛrɛlɛsɛka ɔbɔ mogya ne anu ɔkponde azukponle ne fane nsuu ɔnua ye, na ɔte nwolɛ ɔfi Yizilayɛma evinli ne anwo.

²⁰“Saa Aalɔn wie Nwuanzanwuanza Nu Nwuanzaanwu Ɛleka ne, Ɛdɛnkɛma Ndanlɛ Sua ne nee azukponle ne mɔ ati mgbɔdalɛ nzɛlɛlɛ ne yɛ a, akee ɔbava abɔnkye ne mɔɔ bɛtɛkunle ye la yeamaa Ɛdɛnkɛma.

²¹Ɔbava ɔ sa nwiɔ yeagua abɔnkye ne ati zo, na yeaha Yizilayɛma amumuyɛ ne mɔ mɔɔ bɛyɛ, bɛ mɛladonlɛ nee ɛtane mɔɔ bɛyɛ la amuala yeagua abɔnkye ne ati zo, na yeagyakyi ye yeamaa awie mɔɔ bɛboa bɛye ye la ava ye ahɔ fienemgbole ne anu lɔ.

²²Abɔnkye ne bazoa bɛ ɛtane ne nee bɛ amumuyɛ ne mɔ kɔsɔɔti ahɔ ɛleka solokoko wɔ fienemgbole ne anu, ɛleka mɔɔ awie biala ɛnle la.

²³“Akee Aalɔn bara Ɛdɛnkɛma Ndanlɛ Sua ne anu, yearaye ye lenen adɛladeɛ ne mɔ mɔɔ ɔbahɔ Nwuanzanwuanza Nu Nwuanzaanwu Ɛleka ne la ɔwulale la yeagua, na akee ɔvi ɛkɛ ne yeavinde;

²⁴na yeava nzule yeabia wɔ ɛleka mɔɔ te la, yeava ɔdaye ye adɛladeɛ ne mɔ yeawula, yeavinde na yearabɔ ye ɛyelalɛ azu ɛdeɛ ne. Ɔwie a eza ɔbɔ ɛyelalɛ azu wɔ menli ne ati na akee ɔyɛ mgbɔdalɛ nzɛlɛlɛ ɔmaa ɔ nwo, na ɔyɛ bie ɔmaa menli ne amuala.

²⁵Ɔyela ɛtane azubɔdeɛ ne akunlu ɛnlome ne wɔ azukponle ne azo.

²⁶Ahenle mɔɔ hɔgyakyile abɔnkye ne manle ɔhɔle Azazɛle ɛkɛ ne la bakpo ye adɛladeɛ ne mɔ na yeabia kolaa na yeara azokoɛleɛ ne.

²⁷ Akee bɛbazoa ɛnlankɛ ne nee abɔnkye ne mɔɔ bɛvale bɛyɛle ɛtane azubɔdeɛ ne mɔ, mɔɔ bɛ mogya a bɛvale bɛhɔle Nwuanzanwuanza Nu Nwuanzaanwu Ɛleka ne bɛhɔyɛle mgbɔdalɛ nzɛlɛlɛ ne la bɛahɔ azokoɛleɛ ne kandiba, na bɛayela bɛ nane, nwoma nee bɛ kunlu ninyɛne ne mɔ amuala.

²⁸Ahenle mɔɔ kɛyela bɛ la, ɔwɔ kɛ ɔkpo ye adɛladeɛ ne mɔ na ɔbia kolaa na yeara azokoɛleɛ ne.

²⁹ “Akee ɔbayɛ mɛla mɔɔ wɔ ɛkɛ ne dahuu ɔmaa bɛ a; siane nsuu ne kenle bulu ne azo, ɔwɔ kɛ bɛkye ɛhɔne mɔɔ bɛdabɛ o, nyɛvolɛ mɔɔ nee bɛ de la o, biala ɛnyɛ gyima a.

³⁰Ɔluakɛ kenle ɛhye anu yɛɛ bɛyɛ bɛ ti mgbɔdalɛ nzɛlɛlɛ, bɛanlua bɛ, bɛade bɛ nwo bɛavi bɛ ɛtane ne mɔ anwo, na bɛ nwo ayɛ bɔkɔbɔkɔ wɔ Ɛdɛnkɛma anyunlu a.

³¹Ɔle Ɛnwomenlelielɛ Kenle mɔɔ hyia maa bɛ a, na ɔwɔ kɛ bɛkye ɛhɔne kenle zɔhane. Ɛhye le mɛla mɔɔ wɔ ɛkɛ ne dahuu a.

³²Sɛlɛvolɛ Kpanyinli ne mɔɔ bɛkɛwula ye, bɛkɛdu ye bɛkɛmaa Ɛdɛnkɛma na ɔkɛgyinla ɔ ze agyakɛ anu la a bayɛ mgbɔdalɛ nzɛlɛlɛ ne a. Ɔbawula lenen adɛladeɛ nwuanzanwuanza ne mɔ a yeayɛ nzɛlɛlɛ ne a.

³³Ɔbayɛ mgbɔdalɛ nzɛlɛlɛ yeamaa Ɛleka Nwuanzanwuanza ne, ɔbayɛ bie yeamaa Ɛdɛnkɛma Ndanlɛ Sua ne nee azukponle ne, na yeayɛ bie yeamaa sɛlɛvolɛma ne nee menli ne amuala.

³⁴Ɛhye bayɛ mɛla mɔɔ bɛntulu ye ɛlɛ la amaa bɛ, amaa bɛava kenle ko wɔ ɛvolɛ biala anu bɛayɛ mgbɔdalɛ nzɛlɛlɛ bɛamaa Yizilayɛma amuala, wɔ bɛ ɛtane ne mɔ ati.” Na Mosisi yɛle mɔɔ Ɛdɛnkɛma zele ye la amuala.