Read Nzema Sɛlɛ 24 Bible Online

Sɛlɛ 24 - Nzema bible

Sɛlɛ 24

¹Ɛdɛnkɛma zele Mosisi kɛ,

²“Maa Yizilayɛma ɛva nwole anye bɔkɔbɔkɔ mɔɔ bɛhwihwi bɛvi ɔlivi ma nu la bɛrɛla bɛmaa ɛva ɛgua ahɛnlaneɛ ne mɔ anu, amaa bɛagyinla zolɛ dahuu.

³Aalɔn banlea ayɛ ahɛnlaneɛ ne mɔ boɛ na yeasosɔ bɛ nɔsolɛ biala, amaa bɛagyinla zolɛ toonwo alehyenlɛ. Ɔbazɔ yeazie mgbɛnu ne anzi, wɔ Ngyekyeleɛ Ɛlɛka ne mɔɔ gyi Nwuanzanwuanza Nu Nwuanzaanwu Ɛleka ne la anyunlu. Ɛhye le mɛla dahuu maa awolɛndoazo muala.

⁴Aalɔn banlea ahɛnlaneɛ ne mɔ mɔɔ gyigyi ezukoa nvutuke tagyee kɛnlaneɛ baka ne azo la boɛ, na yeamaa bɛazɔ bɛagyinla zolɛ dahuu wɔ Ɛdɛnkɛma anyunlu ɛkɛ ne.

⁵ “Fa esamo kilo bulu nee nwiɔ fɔtɔ to kpanwo ahunguma bulu nee nwiɔ.

⁶Gua bɛ ɛhonlone nwiɔ, nsia nsia, wɔ ezukoa nvutuke tagyee ɛkponle ne azo.

⁷Fa ɛyɛlɛ evuanlɛ gua ɛhonlone ko biala anwo fa kile kɛ ɔle aleɛ mɔɔ bɛva bɛbɔ azu bɛmaa Ɛdɛnkɛma a.

⁸Ɛnwomenlelielɛ Kenle biala, Aalɔn banlea ava kpanwo agyinla Yizilayɛma agyakɛ anu asolo bɛ ɛhonlone nwiɔ wɔ Ɛdɛnkɛma anyunlu. Ɛhye le ngyekyeleɛ mɔɔ kyekye Yizilayɛma dahuu a.

⁹Kpanwo zɔhane mɔ le Aalɔn nee ɔ mra mrenya ne mɔ ɛdeɛ, yɛɛ ɔwɔ kɛ bɛdi ye wɔ ɛleka mɔɔ le nwuanzanwuanza la, ɔboalekɛ ɔle azubɔdeɛ mɔɔ bɛyela bɛmaa Ɛdɛnkɛma la anu bie Ɔle nwuanzanwuanza kpalɛ kpalɛ na dahuu ɔle sɛlɛvolɛma ne mɔ ɛdeɛ.”

¹⁰Nrenya bie wɔ Yizilayɛma avinli, ɔ ze le Yigyibitinli, yɛɛ ɔ nli le Yizilayɛnli. Bɛfɛlɛ ɔ nli Hyɛlomete. Hyɛlomete ɔ ze a le Debelae, mɔɔ vi Dan abusua ekpunli ne anu la. Ɔrale kɛ kenle ko nrenya ne nee Yizilayɛnli bie nyianle butule; nrenya ne bɔle Nyamenle sasa, na bɛhyele ye bɛhɔmanle Mosisi.

¹²Bɛvale ye bɛziele kɛ bɛkendɛ edwɛkɛ mɔɔ Ɛdɛnkɛma baha wɔ nwolɛ la.

¹³Ɛdɛnkɛma zele Mosisi kɛ,

¹⁴“Bɛva ahenle ne mɔɔ bɔle sasa ne la bɛvinde azokoɛleɛ ne kandiba lɔ, na bɛdabɛ mɔɔ bɛdele ye sasabɔlɛ ne la, biala ɛva ɔ sa ɛdo nrenya ne anwoma azo ɛli daselɛ, na akee ɛlɔne ne amuala ɛzi ye awolɛ ɛhu ye.

¹⁵Akee ka kile Yizilayɛma kɛ: Awie biala mɔɔ kɛbɔ ye Nyamenle sasa la, ɔdaye ye ɛtane zo ye.

¹⁶Awie mɔɔ kɛbɔ Nyamenle sasa la, bɛbahu ye. Menli ne amuala bazi ye awolɛ ahu ye. Saa ɔle ɛyɛvolɛ o, ɔle Yizilayɛnli o, ɔwɔ kɛ bɛku ye kɛ yebɔ Nyamenle sasa a.

¹⁷“Awie biala mɔɔ kɛhu sonla la, ɔwɔ kɛ bɛku ye,

¹⁸yɛɛ awie biala mɔɔ kɛhu awie ayɛmoa la, ɔbazie ɔ bo zo. Ngyehyɛlɛ ne a le kɛ, bɛfa ngoane bɛsie ngoane bo zo.

¹⁹“Saa awie boda ɔ gɔnwo a, ɔwɔ kɛ bɛboda ye bie, kɛ ɔzile ɔbodale ye ala la.

²⁰Ɛbu awie bowule a, ɔwɔ kɛ bɛbu ɛdawɔ wɔ bowule nu, ɛtu awie anye a, ɔwɔ kɛ bɛtu ɛ nye, yɛɛ ɛtu egyele a, ɔwɔ kɛ bɛtu ɛ gye. Kɛ ɛkɛzi ɛkɛboda ahenle la, zɔhane ala yɛɛ ɔwɔ kɛ bɛboda ɛdawɔ noko a.

²¹Awie mɔɔ kɛhu ayɛmoa la, ɔwɔ kɛ ɔsie ɔ bo zo, yɛɛ awie mɔɔ kɛhu sonla la, ɔwɔ kɛ bɛku ye.

²² Mɛla ko ala a wɔ ɛkɛ maa Yizilayɛnli nee ɛyɛvolɛ mɔɔ de Yizilayɛma avinli la a, ɔluakɛ medame a mele Ɛdɛnkɛma bɛ Nyamenle ne a.”

²³Yemɔti Mosisi hanle mɛla ne amuala hilele Yizilayɛma amuala. Bɛvale nrenya ne mɔɔ bɔle sasa ne la bɛhɔle azokoɛleɛ ne kandiba ne na bɛzile ye awolɛ. Yizilayɛma yɛle mɔɔ Ɛdɛnkɛma luale Mosisi anwo zo hanle hilele bɛ la.