Read Nzema Sɛlɛ 25 Bible Online

Sɛlɛ 25 - Nzema bible

Sɛlɛ 25

¹ Ɛdɛnkɛma zele Mosisi wɔ Saenae Boka kɛ,

²“Ka kile Yizilayɛma kɛ: Saa bɛdwu azɛlɛ ne mɔɔ mefa meamaa bɛ la azo a, azɛlɛ ne banyia ye ɛnwomenlelielɛ mekɛ, bɛava bɛali Ɛdɛnkɛma eni.

³Bɛbava ɛvolɛ nsia bɛazo bɛ ɛya, bɛaziezie bɛ vanye mbaka ne mɔ na bɛade zolɛ ma.

⁴Ɛvolɛ ne mɔɔ tɔ zolɛ nsuu la le azɛlɛ ne ɛnwomenlelielɛ mekɛ; ɔle Ɛdɛnkɛma ɛnwomenlelielɛ mekɛ. Ɔnle kɛ bɛso ɛya yɛɛ ɔnle kɛ bɛsiezie bɛ vanye mbaka ne mɔ.

⁵Ɔnle kɛ bɛbu bɛyɔba biala mɔɔ ɔdaye ɔ ngome ɔkɛvinde bɛ ɛya ne mɔ anu la, yɛɛ ɔnle kɛ bɛtete bɛ vanye mbaka ne mɔ azo ma ne mɔ. Ɔwɔ kɛ azɛlɛ ne die ye ɛnwomenle bɔkɔɔ.

⁶Azɛlɛ ne ɛnwomenlelielɛ ne ati, aleɛ bavinde azɛlɛ ne azo. Bɛnrɛzo ɛya bɔbɔ ɛdeɛ wɔ mekɛ ne anu, noko aleɛ bavinde azɛlɛ ne azo yeamaa bɛdabɛ, bɛ sonvolɛ mrenya nee mraalɛ, bɛ ɛkpama nee bɛ nyɛvolɛ mɔɔ nee bɛ de la amuala anyia bie ali wɔ ɛvolɛ ne anu.

⁷Eza bɛbanyia aleɛ bɛamaa bɛ nlankɛ nee bɛ nyɛmoa, yɛɛ nane ngakyile noko mɔɔ wɔ ɛbɔ nu la banyia bie ali.

⁸“Akee bɛbadia ɛvolɛ nsuu nsuu fane nsuu, mɔɔ ye dodo le ɛvolɛ abulanla nee ngɔnla la.

⁹Na soa maa bɛhɔbɔ aweɛne tendenle ne wɔ ɛvolɛ zɔhane siane nsuu ne kenle bulu ne azo, wɔ maanle ne anu amuala; kenle ne le mgbɔdalɛ kenle.

¹⁰Ɛhye kile kɛ bɛbadu ɛvolɛ abulanlu ne bɛazie ɛkɛ, na bɛabɔ ye nolo kɛ awie biala di ɔ ti anwo wɔ maanle ne anu. Ɔle ɛvolɛ mɔɔ nuhua yɛɛ awie biala mɔɔ ɔ gɔnwo debie wɔ ye ɛkɛ ne awoba la, ɔbaye yeamaa ye a. Awie mɔɔ bɛdɔnenle ye kanra la noko bazia ahɔ ye abusua sua nu kɛ ɔnle kanranli bieko.

¹¹Ɔle ɛvolɛ abulanlu ɛvoyia ɔmaa bɛ. Saa ɔdwu zo a, bɛnlua, bɛmbu yɛɛ bɛntete ma mɔɔ wɔ bɛ vanye mbaka ne mɔ azo la.

¹²Ɔle ɛvolɛ abulanlu ɛvoyia; ɔwɔ kɛ ɔyɛ nwuanzanwuanza ɔmaa bɛ. Yemɔti bɛbali debie biala mɔɔ kpɔkɛ ne kɛye kɛmaa bɛ la.

¹³“Wɔ ɛvolɛ abulanlu ɛvoyia ɛlilɛ ɛhye anu, awie biala mɔɔ ye agyadeɛ wɔ awoba la, ɔwɔ kɛ ɔ sa ka ye.

¹⁴Yemɔti saa ɛtɔ debie wɔ ɛ gɔnwo ɛkɛ anzɛɛ ɛtɔne debie wɔamaa ɛ gɔnwo a, mmamaa nzisi ba nu.

¹⁵Saa ɛya yɛɛ bɛka nwolɛ edwɛkɛ a, bɛzuzu nwolɛ bɛnlea kɛ toonwo mɔɔ ɔkadwu ɛvolɛ abulanlu ɛvoyia ne anloa la, nzoleɛ nyɛ yɛɛ bavinde nu a, yɛɛ ɛvolɛ biala nzoleɛ ne anloa bado ɛzɛ kolaa na bɛadɔne anzɛɛ bɛadɔ ɛya ne.

¹⁶Saa ɛvolɛ mɔɔ ɛha kolaa na ɛvolɛ abulanlu ɛvoyia ne adwu la zonle a, ɔwɔ kɛ deɛ ne bolɛ kɔ ɔ nyunlu, saa mɔɔ ɛha noko la anzo a, ɔwɔ kɛ deɛ ne bolɛ ka aze, ɔluakɛ ma dodo mɔɔ ɔbanyia ye la yɛɛ ahenle ne ɛlɛtɔne amaa wɔ a.

¹⁷Ɔnle kɛ bɛsisi bɛ nwo; ɔwɔ kɛ bɛsulo Nyamenle, ɔluakɛ medame a mele Ɛdɛnkɛma bɛ Nyamenle ne a.

¹⁸“Zɔhane ati bɛli me mɛla ne mɔ azo; bɛzie me ngyehyɛlɛ ne mɔ na bɛyɛ, amaa bɛ nwo adɔ bɛ wɔ azɛlɛ ne azo

¹⁹Azɛlɛ ne bamaa bɛ nzoleɛ dɔɔnwo, bɛbali bɛ ko ayi, na bɛ nwo adɔ bɛ.

²⁰“Wɔannea a bɛ bie babiza kɛ, ‘Na ɛvolɛ ne mɔɔ tɔ zolɛ nsuu la anu, yɛnrɛlua yɛɛ yɛnrɛbu la, ɛnee kɛ ɔkɛyɛ na yɛali debie ɛ?’

²¹Medame, Ɛdɛnkɛma, mebamaa me nyilalɛ ara bɛ nwo zo wɔ ɛvolɛ ne mɔɔ tɔ zolɛ nsia ne la anu, amaa bɛanyia aleɛ mɔɔ sa bɛ di la dedee ɛvolɛ nsa.

²²Ɛvolɛ mɔtwɛ ne azo bɔbɔ mɔɔ ɛnee bɔ zo mɔɔ bɛlɛso bɛ ɛya ne mɔ la, bɛbanyia aleɛ bɛali toonwo yeahɔdwu ɛvolɛ ngɔnla ne anu; yemɔ anu bɔbɔ, bɛbanyia aleɛ dɛba bɛali.

²³“Ɔnle kɛ bɛtɔne azɛlɛ biala bɔkɔɔ, ɔluakɛ azɛlɛ ne le Nyamenle ɛdeɛ; yɛɛ bɛle nyɛvolɛ nee adendulɛma mɔɔ nee me de a.

²⁴“Kanza ɛtɔ azɛlɛ ne amuala bɔbɔ a, ɔwɔ kɛ adenle da ɛkɛ ne mɔɔ maa azɛlɛ menlema kola tɔ bɛ azɛlɛ ne mɔ die bɛ debie la.

²⁵Saa ɛ diema bie kyia na ɔ nwo kyele ye maa ɔtɔne ye agyadeɛ ne foa ko ɔmaa wɔ a, ɔ nwo sonla kola bakpɔne deɛ ne mɔɔ ɔ diema ne ɛdɔne ye la.

²⁶Saa ahenle ɛnlɛ awie mɔɔ kola kpɔne ye agyadeɛ ne maa ye, na nzinlii ɔ nwo yɛ boɛ, na ɔnea na ɔkɛhola ye deɛ ne kpɔne a,

²⁷ɛ nee ye bɛsese bɛnwu ɛvolɛ dodo mɔɔ deɛ ne ralile ɛ sa nu la, na maa ɔdua kakɛ mɔɔ ɛha ɔ nzi la, na ɔlie ye debie.

²⁸Na saa ahenle ɛnlɛ ezukoa mɔɔ ɔkola ɔdie ye debie a, yemɔ ɛnee ahenle mɔɔ deɛ ne li ɔ sa nu la ɛmaa ɔli ɔ sa nu toonwo ɔhɔdwu ɛvolɛ abulanlu ɛvoyia ne. Ɛvolɛ abulanlu ɛvoyia ne ɛlilɛ nu yɛɛ ɔ sa baha ye agyadeɛ ne na yeahɔ zolɛ a.

²⁹“Saa awie tɔne ye sua mɔɔ wɔ suakpole mɔɔ bɛlie nwolɛ bane la azo a, eza ɔkola ɔkpɔne ye debie wɔ ɛvolɛ ko ne ala anu. Saa ɔnyia ɛvolɛ a, ɔkola ɔkpɔne ye debie.

³⁰Saa ɛvolɛ mumua ko dwu na yeamkpɔne ye sua ne a, yemɔ ɛnee sua ne, kɛmɔ ɔwɔ suakpole mɔɔ bɛhye nwolɛ la azo la ati, ɔyɛ ahenle mɔɔ dɔle la nee ɔ bo zo amra ɛdeɛ bɔkɔɔ, wɔ awolɛndoazo muala anu. Ɛvolɛ abulanlu dwu a, bɛnrɛziane ye bɛnrɛmaa ɔ menle.

³¹Na azua mɔɔ wɔ namunamu mɔɔ bɛtɛkyele nwolɛ la azo la, saa awie tɔ bie a, ahenle kola kpɔne ye mekɛ biala, yɛɛ saa ɛvolɛ abulanlu ɛvoyia ne dwu a, ɔwɔ kɛ bɛsiane ye bɛmaa ɔ menle.

³²Noko wɔ Livaema azuamgbole ne mɔ azo, Livaema ne kola kpɔne bɛ azua ne mɔ mekɛ biala.

³³Na saa Livaenli bie le ehyianli somaa la ati yeangola ye sua ne kpɔne a, ɛnee saa ɛvolɛ abulanlu ɛvoyia ne dwu a, ɔwɔ kɛ bɛsiane ye debie bɛmaa ye. Ɔluakɛ Livaema azua ne mɔ mɔɔ bɛlɛ, wɔ bɛ azuamgbole ne mɔ azo la a le bɛ agyadeɛ mɔɔ bɛlɛ, wɔ bɛ mediema Yizilayɛma avinli a.

³⁴Adidileka mɔɔ la Livaema azuamgbole ne mɔ anwo, mɔɔ bɛ muala bɛdidi zolɛ la, yemɔ ɔnle kɛ awie tɔne bie, ɔluakɛ ɔle bɛ agyadeɛ dahuu.

³⁵ “Saa ɛ diema yɛ anwunvɔne na ɔngola ɔ nwo nea a, nea ye. Bu ye kɛ ɔle ɛyɛvolɛ anzɛɛ adendulɛnli yɛɛ ɔ nee wɔ de a.

³⁶Mmadie ye nzinwo anzɛɛ mmasoa ye ɛnlomboɛ; wɔmɔ sulo wɔ Nyamenle, amaa ɛ diema ne ahola ɔ nee wɔ adɛnla.

³⁷Mmabɔ ye bosea na ɛdie nwolɛ nzinwo anzɛɛ mmatɔne aleɛ mɔɔ ɛfa wɔamaa ye la ɛdie nvasoɛ.

³⁸Mame a mele Ɛdɛnkɛma bɛ Nyamenle ne mɔɔ nee bɛ vi Yigyibiti azɛlɛ zo rale kɛ mebava Keena azɛlɛ ne meamaa bɛ na meayɛ bɛ Nyamenle la a.

³⁹ “Saa ɛ diema bie mɔɔ bikye wɔ la yɛ anwunvɔne, na ɔtɔne ɔ nwo ɔmaa wɔ a, mmamaa ɔsonle wɔ kɛ kanranli.

⁴⁰Maa ɔ nee wɔ ɛdɛnla kɛ wɔ ɛkpanli anzɛɛ ɛyɛvolɛ Ɔbazonle wɔ toonwo ɛvolɛ abulanlu ɛvoyia ne adwu,

⁴¹na akee ɔvi ɛ nwo ɛkɛ ne yeahɔ. Ɔkɔ a ɔ nee ɔ mra a kɔ a; ɔbahɔ ye abusua nu nee ɔ ze mɔ awuke nu.

⁴²Ɔluakɛ bɛle me sonvolɛma mɔɔ me nee bɛ vi Yigyibiti azɛlɛ zo rale a. Ɔnle kɛ bɛtɔne bɛ ahanra.

⁴³Ɔnle kɛ ɛfa atisesebɛ ɛsie ye; ɔwɔ kɛ ɛsulo Nyamenle.

⁴⁴Mɔɔ fane ahanra mraalɛ nee mrenya mɔɔ bɛbanyia bɛ la anwo, bɛkola bɛtɔ ahanra mraalɛ nee mrenya wɔ maanle maanle gyɛne ne mɔ mɔɔ zuozua bɛ la anu.

⁴⁵Eza bɛkola bɛtɔ bɛfi nyɛvolɛ anzɛɛ adendulɛma mɔɔ nee bɛ de la anu anzɛɛ nyɛvolɛ mbusua mɔɔ wɔ azɛlɛ ne azo bie la anu, na bɛfa bɛ bɛyɛ bɛ agyadeɛ.

⁴⁶Bɛkola bɛfa bɛyɛ agyadeɛ bɛmaa bɛ mra mrenya kɛ bɛle bɛ ɛdeɛ bɔkɔɔ. Bɛkola bɛyɛ ɛhye mɔ ahanra bɔkɔɔ; na bɛ mediema Yizilayɛma ɛdeɛ, bɛmmafa atisesebɛ bɛsie bɛ.

⁴⁷“Saa ɛyɛvolɛ bie anzɛɛ adendulɛnli bie mɔɔ nee bɛ de la nyia ɔ nwo, na bɛ diema bie mɔɔ bikye ye la yɛ anwunvɔne na ɔtɔne ɔ nwo ɔmaa ye, anzɛɛ ɛyɛvolɛ ne busuanli bie a,

⁴⁸mɔɔ yedɔne ɔ nwo yewie la bɛkola bɛkpɔne ye; ɔ mediema ne mɔ ko ɛhɔkpɔne ye.

⁴⁹Ɔ wuvuanyi, ɔ nli anzɛɛ ɔ ze adiema ara, anzɛɛ ɔ nwo sonla biala mɔɔ wɔ ye abusua ne anu la kola kpɔne ye; anzɛɛ saa nzinlii ɔdaye ɔnyia ezukoa a, ɔkola ɔkpɔne ɔ nwo.

⁵⁰Saa ɔkakpɔne ɔ nwo anzɛɛ awie yɛɛ kakpɔne ye a, ɔwɔ kɛ bɛsese bɛnwu ɛvolɛ dodo mɔɔ ɛha na bɛali ɛvolɛ abulanlu ɛvoyia ne la, na bɛtua nwolɛ kakɛ biala bɛmaa ahenle mɔɔ dɔle ye la. Ɛvolɛ dodo biala mɔɔ ɔlile wɔ ahenle mɔɔ dɔle ye la sua nu la, bɛbasese ye kɛ ɔle ɛkpanli.

⁵¹Saa bɛsese na ɛvolɛ dodo mɔɔ wɔ ɔ nyunlu la wale a, bolɛ ne mɔɔ bɛduale ye ɔ ti la bie yɛɛ ɔwɔ kɛ bɛsese bɛfa bɛkpɔne ye a.

⁵²Na saa ɛvolɛ mɔɔ ɛha la anzo na bɛali ɛvolɛ abulanlu ɛvoyia ne a, yemɔ bɛbasese, na ɛvolɛ dodo mɔɔ yeli wɔ ahenle mɔɔ dɔle ye la asa anu la yeava nwolɛ ɛkpabɔdeɛ ne bie yeadua yeakpɔne ɔ nwo.

⁵³Mekɛ mɔɔ ɔ nee ye de la, ɛnee ɔle kɛ ɛkpanli mɔɔ bɛbɔ ye ɛkpa ɛvolɛ ɛvolɛ la. Ɔnle kɛ bɛgyinla bɛnea ye bɛmaa ɔyɛ ye amumuyɛ.

⁵⁴Saa bɛangola ye kpɔne wɔ adenle ɛhye mɔ biala azo a, yemɔ ɛnee ɛvolɛ abulanlu ɛvoyia ne dwu a ɔwɔ kɛ ɔdaye nee ɔ mra ne mɔ amuala nyia bɛ ti.

⁵⁵Ɔluakɛ mame, Yizilayɛma amuala le sonvolɛma. Bɛle me sonvolɛma mɔɔ me nee bɛ vi Yigyibiti azɛlɛ zo rale a: medame a mele Ɛdɛnkɛma bɛ Nyamenle ne a.”