Read Nzema Sɛlɛ 26 Bible Online

Sɛlɛ 26 - Nzema bible

Sɛlɛ 26

¹ Ɛdɛnkɛma zele Mosisi kɛ, “Bɛmmayɛ mmonle nee ananze yɛɛ bɛmmasi mpila biala, yɛɛ bɛmmase bolɛ bɛsie ye bɛ azɛlɛ ne azo kɛ bɛbɔ bɛ ti aze bɛamaa bɛ, ɔluakɛ medame a mele Ɛdɛnkɛma bɛ Nyamenle ne a.

²Bɛzie me Ɛnwomenlelielɛ Kenle ne mɔ, na bɛli ɛleka nwuanzanwuanza ne mɔɔ bɛsonle me la eni. Medame a mele Ɛdɛnkɛma a.

³ “Saa bɛdi me mɛla ne mɔ azo na bɛyɛ me ngyehyɛlɛ ne mɔ a,

⁴yemɔ ɛlobɔ ne dwu a, mebamaa ezule adɔ na azɛlɛ ne aye aleɛ dɔɔnwo amaa bɛ, na kpɔkɛ nu mbaka amaa bɛ nzoleɛ.

⁵Bɛ bɛyɔba bara dɔɔnwo, yeahɔdwu vanye ma ɛdelɛ, na bɛade vanye ma toonwo yeahɔdwu mekɛ mɔɔ bɛfa bɛdua aleɛ la. Bɛbanyia aleɛ bɛali bɛ ko ayi, na bɛ nwo ayɛ twetwe wɔ bɛ azɛlɛ ne azo.

⁶“Mebamaa bɛ nzo nu adwo bɛ wɔ azɛlɛ ne azo, na bɛalie bɛ ɛnwomenle, yɛɛ awie biala ɛnrɛha bɛ ɛzulolɛ. Mebaye nane mɔɔ ɛnle kpalɛ la amuala wɔ azɛlɛ ne azo yɛɛ konle ɛnrɛzi maanle ne anu.

⁷Bɛbavoa bɛ kpɔvolɛma na bɛahu bɛ muala.

⁸Bɛ nuhua nnu bɔbɔ bahola aha menli ɛya agua ɛbɔ nu, yɛɛ bɛ nuhua ɛya bahola aha apenle bulu agua ɛbɔ nu; na bɛbahu bɛ kpɔvolɛma amuala.

⁹Mebanlea bɛ nwo zo kpalɛ na meamaa bɛawo mralɛ dɔɔnwo, na bɛ nwo azo, na meamoa me ngyekyeleɛ ne mɔɔ me nee bɛ kyekyele la azo.

¹⁰“Bɛbali bɛ aleɛ mɔɔ bɛvale bɛziele dɛba la, bɛbaye dɛba ne bɛavinde na bɛava fofolɛ bɛazie.

¹¹Me nee bɛ badɛnla yɛɛ menrɛkpo bɛ ɛlɛ.

¹² Me nee bɛ balua, meayɛ bɛ Nyamenle, na bɛayɛ me menli.

¹³Medame a mele Ɛdɛnkɛma bɛ Nyamenle ne, mɔɔ menyele bɛ menvile Yigyibiti azɛlɛ zo a, amaa bɛanyɛ Yigyibitima ahanra. Meye bɛ kɔme kpomgbolo ne memaa bɛnyia bɛ ti.

¹⁴“Na saa bɛandie me ne, bɛanyɛ mɔɔ meze bɛ la,

¹⁵saa bɛbulu me mɛla ne mɔ azo, na bɛkpo me ngyehyɛlɛ ne mɔ, na yemɔti bɛnrɛyɛ mɔɔ meze bɛ la amuala, na bɛtulu me ngyekyeleɛ ne a,

¹⁶mɔɔ mebava meayɛ bɛ la ɛne: Mebamaa ɛzulolɛ kpole bie araheda bɛ nwo zo, meamaa ewule mɔɔ maa nwonane wie la, nee ebunlu fufule aha bɛ, azi bɛ nye na yeahu bɛ. Bɛbalua ma na bɛnrɛnyia bie, ɔluakɛ bɛ kpɔvolɛma barali.

¹⁷Mebava me nye meawula bɛ nyunlu, meamaa bɛ kpɔvolɛma ali bɛ nwo zo konim. Menli ne mɔɔ kyi bɛ la bazie bɛ, na bɛbanriandi wɔ mekɛ mɔɔ awie ɛndoa bɛ la.

¹⁸“Na saa ɛhye mɔ anzi na eza bɛnrɛdie me ne a, akee mebahwi bɛ ɛza fane nsuu wɔ bɛ ɛtane ne mɔ ati.

¹⁹Mebazɛkye bɛ adubɛnwo anwosesebɛ biala; ezule ɛnrɛdɔ, na bɛ azɛlɛ ne bahwie ayɛ ketekete kɛ bolɛ.

²⁰Bɛbavɛ mgbane, ɔluakɛ bɛ azɛlɛ ɛnrɛhye aleɛ yɛɛ ɛbɔ nu mbaka ɛnrɛzo.

²¹“Saa bɛkɔ zolɛ na bɛandie me ne, na bɛkpo me a, mebamaa ewulenzane mɔɔ anu yɛ se tɛla bɛ ɛtane ne mɔ fane nsuu la adɔ bɛ nwo.

²²Mebatulu nanemgbole anwo ɛzulolɛ wɔ bɛ avinli, meamaa bɛahu bɛ mra, bɛazɛkye bɛ nlankɛ, amaa bɛ nwo ayɛ ekyi na bɛ ndenle ne mɔ azo adɔ mgbane.

²³“Eza saa ndeanlɛ ɛhye anzi bɛangakyi bɛanzia bɛamba me nwo, na bɛkpo me a,

²⁴medame noko mebakpo bɛ, na medame mumua ne meadea bɛ fane nsuu wɔ bɛ ɛtane ne mɔ ati.

²⁵Mebamaa ɛlɔnema ara bɛ nwo zo na bɛahu bɛ bɛadua me ngyekyeleɛ ne mɔɔ bɛtulu ye la abo zo. Saa bɛnriandi bɛkɔfea bɛ azuamgbole zo a, mebava ewule meado bɛ nwo, meamaa bɛ kpɔvolɛma asa aha bɛ.

²⁶Saa metua, mɔɔ bɛnnyia aleɛ la a, mraalɛ bulu babɔ nu ado kpanwo fonlomo ko anu, na bɛazuzu bɛava bɛarɛlɛ bɛ; bɛbali, na bɛ ko ɛnrɛyi ɛlɛ.

²⁷“Na saa ɛhye mɔ amuala anzi na eza bɛnrɛdie me ne, na bɛkpo me a,

²⁸akee mebava ɛya kpole kpalɛ meakpo bɛ, na medame mumua ne meadea bɛ ndeanlɛ fane nsuu wɔ bɛ ɛtane ne mɔ ati.

²⁹Mebamaa bɛali bɛ mra mrenya nee mraalɛ nwonane.

³⁰Eza mebazɛkye bɛ ɛleka ne mɔ mɔɔ bɛkɔsonle la, na meabubu bɛ ɛyɛlɛ evuanlɛ azukponle ne mɔ, na meavuandi bɛdabɛ bɛ avunli meagua bɛ mmonle avunli ne mɔ azo, na meahyi bɛ bɔkɔɔ.

³¹Mebamaa bɛ azuamgbole ayɛ azuadu, na meazɛkye bɛ ɛleka nwuanzanwuanza ne mɔ mɔɔ bɛsonle la, yɛɛ menrɛlie bɛ azubɔlɛ evuanlɛ ne mɔ.

³²Mebazɛkye azɛlɛ ne, na ɔbazi bɛ kpɔvolɛma mɔɔ de zolɛ la anwo.

³³Mebamaa ɛlɔne ava bɛ aze, na meazande bɛ wɔ maanle maanle zo. Bɛ azɛlɛ ne badɔ mgbane, na bɛ azuamgbole ayɛ azuadu.

³⁴Akee bɛ azɛlɛ ne balie ye ɛnwomenle mekɛ tendenle mɔɔ awie ɛnle zolɛ na bɛwɔ bɛ kpɔvolɛma maanle nu la. Azɛlɛ ne balie ye ɛnwomenle mɔɔ awie ɛnyɛ debie zolɛ a.

³⁵Mekɛ tendenle ala mɔɔ awie ɛnle zolɛ la, ɔbalie ye ɛnwomenle ne mɔɔ mekɛ mɔɔ bɛwɔ zolɛ la bɛamaa yeannyia ye la.

³⁶“Bɛdabɛ mɔɔ bɛbaha mɔɔ bɛbahye bɛ bɛahɔ nlɔnu la, mebamaa ahunlundetelɛ adɔ bɛ nwo mɔɔ ɛya mgbane mɔɔ kɛde la bamaa bɛanriandi a; bɛbanriandi kɛ menli mɔɔ ɛgua ndwɛlɛ aze wɔ konle nloa na bɛ kpɔvolɛma zi bɛ zo la, na bɛbadu bɛagua aze wɔ mekɛ mɔɔ awie ɛndoa bɛ la.

³⁷Bɛbadu bɛagua bɛ ngome bɛ nwo zo kɛ asɛɛ bɛdoa bɛ wɔ konle nu la, noko awie ɛndoa bɛ; bɛnrɛnyia gyinlagyakɛ wɔ bɛ kpɔvolɛma anyunlu.

³⁸Bɛbawu bɛazie bɛ wɔ nlɔnu, wɔ bɛ kpɔvolɛma maanle nu.

³⁹Bɛdabɛ noko mɔɔ bɛbaha la ɛnrɛkpazi wɔ bɛ kpɔvolɛma maanle ne anu, wɔ bɛ ɛtane ne mɔ nee bɛ ze mɔ ɛtane ne mɔ ati.

⁴⁰“Na saa bɛka bɛ amumuyɛ ne mɔ bɛto gua, bɛka bɛ ze mɔ amumuyɛ ne mɔ mɔɔ bɛ nye la nwo bɛyɛle bɛtiale me na bɛkpole me,

⁴¹mɔɔ yemɔti medame memkpole bɛ na menvale bɛ mengɔle bɛ kpɔvolɛma maanle nu la bɛto gua, na saa akee bɛbɛlɛ bɛ ahonle ne mɔ mɔɔ ɛsolo la aze, na bɛsia bɛ nzi bɛfi bɛ amumuyɛ ne mɔ anwo a,

⁴²mebahakye me ngyekyeleɛ ne mɔɔ me nee Gyekɔbo, Ayezeke, yɛɛ Ebileham kyekyele la, na meahakye azɛlɛ ne noko.

⁴³Noko bɛbagyakyi azɛlɛ ne bɛamaa yealie ye ɛnwomenle wɔ mekɛ mɔɔ bɛnde zolɛ la; eza ɔwɔ kɛ bɛsia bɛ nzi bɛfi bɛ amumuyɛ nwo, ɔboalekɛ bɛbulule me ngyehyɛlɛ ne mɔ azo, yɛɛ bɛanli me mɛla ne mɔ azo.

⁴⁴Noko akee ɛhye mɔ ati, saa bɛwɔ bɛ kpɔvolɛma maanle nu a, menrɛbu me nye menrɛgua bɛ nwo zo, yɛɛ menrɛhyi bɛ menrɛmaa bɛnrɛzɛkye bɛ bɔkɔɔ, eza menrɛtulu me ngyekyeleɛ ne mɔɔ me nee bɛ kyekyele la. Ɔluakɛ medame a mele Ɛdɛnkɛma bɛ Nyamenle ne a.

⁴⁵Bɛdabɛ bɛ ti mebahakye ngyekyeleɛ mɔɔ me nee bɛ ze mɔ kyekyele la. Menvale bɛ ze mɔ menvile Yigyibiti azɛlɛ zo, menluale maanle maanle avinli membale, amaa meayɛ bɛ Nyamenle: Medame a mele Ɛdɛnkɛma a.”

⁴⁶Mɛla nee ngyehyɛlɛ mɔɔ Ɛdɛnkɛma luale Mosisi anwo zo vale manle Yizilayɛma wɔ Saenae Boka la a le ɛhye mɔ.