Read Nzema Sɛlɛ 27 Bible Online

Sɛlɛ 27 - Nzema bible

Sɛlɛ 27

¹Ɛdɛnkɛma zele Mosisi kɛ,

²“Ka kile Yizilayɛma kɛ: Saa awie fa sonla bɔ ɛwɔkɛ maa Ɛdɛnkɛma a, ɔkola ɔtua ezukoa ɔkpɔne sonla zɔhane,

³kɛmɔ bɛ maamɛla ne kile la: - nrenya kpanyinli mɔɔ ɛli ɛvolɛ abulanwiɔ mɔɔ kɔ abulasia la: dwɛtɛ fufule abulanlu - raalɛ kpanyinli: dwɛtɛ fufule abulasa - nrenya kpavolɛ mɔɔ ɛli ɛvolɛ nnu mɔɔ kɔ abulanwiɔ la: dwɛtɛ fufule abulanwiɔ - raalɛ bɛlɛra: dwɛtɛ fufule bulu - kakula nrenya mɔɔ ɛli siane ko mɔɔ kɔ ɛvolɛ nnu la: dwɛtɛ fufule nnu - kakula raalɛ: dwɛtɛ fufule nsa - nrenya kpanyinli mɔɔ ɛbo ɛvolɛ abulasia la: dwɛtɛ fufule bulu nee nnu - raalɛ kpanyinli mɔɔ ɛbo ɛvolɛ abulasia la: dwɛtɛ fufule bulu.

⁸“Saa ahenle le ehyianli mɔɔ ɛngola ɛndua mɔɔ maamɛla ne se la a, ɛnee bɛva sonla ne mɔɔ bɛvale bɛbɔle ɛwɔkɛ ne la bɛrɛlɛ sɛlɛvolɛ ne bɛmaa ɔnlea ahenle ne mɔɔ bɔle ɛwɔkɛ ne la gyinlabelɛ nwo ɔpɛ bolɛ ɔmaa ɔdua.

⁹“Saa ɛwɔkɛ ne fane ayɛmoa nwo, na ayɛmoa ne le mɔɔ bɛfa bɛbɔ azu bɛmaa Ɛdɛnkɛma a ɔyɛ boɛ a, ɛnee ahyɛlɛdeɛ ne mɔɔ ahenle vale manle Ɛdɛnkɛma la anwo te.

¹⁰Ɔfa debie ɔkakyi ye a ɔnyɛ boɛ, yɛɛ ɔnle kɛ ɔkakyi ye ɔfa kpalɛ ɔdie ɛtane anzɛɛ ɔfa ɛtane ɔdie kpalɛ. Saa ɔfa ayɛmoa ɔkakyi ayɛmoa, na ɔle ayɛmoa mɔɔ sɔ ɛnyelɛ a, ɛnee ayɛmoa zɔhane nee mɔɔ ɔvale ɔbɔle ɛwɔkɛ ne la, bɛ mu nwiɔ bɛ nwo te na bɛle Ɛdɛnkɛma ɛdeɛ.

¹¹Na saa ɛwɔkɛ ne kɔyɛ ayɛmoa mɔɔ anwo ɛnde na bɛfa bɛbɔ azu bɛmaa Ɛdɛnkɛma a ɔnyɛ boɛ a, ɛnee ahenle ɛva ayɛmoa ne ɛrɛla sɛlɛvolɛ ne ɛkɛ;

¹²sɛlɛvolɛ ne banlea kɛ ye kpalɛ nee ye ɛtane si de la na yeabɔ ye bolɛ. Bolɛ biala mɔɔ sɛlɛvolɛ ne kɛbɔ la, ɛnee ɔdaye ne ala ɛne.

¹³Na saa ahenle mɔɔ vale ayɛmoa ne rale la kulo kɛ ɔkpɔne ye ayɛmoa ne a, ɔbava bolɛ ne mɔɔ sɛlɛvolɛ ne bɔle la ngyɛnu nnu ɛkpɔ ko yeado ayɛmoa ne ati bolɛ ne azo yeadɔ.

¹⁴“Saa awie tu ye sua sie ahane maa Ɛdɛnkɛma a, ɛnee sua ne anwo te. Sɛlɛvolɛ ne bapɛ ye bolɛ, kɛmɔ ye kpalɛ anzɛɛ ye ɛtane si de la; bolɛ mɔɔ sɛlɛvolɛ ne bapɛ la ɛnee ɔdaye ne ala ɛne.

¹⁵Na saa ahenle mɔɔ dule sua ne manle Ɛdɛnkɛma la se kɛ ɔkpɔne ye sua ne a, ɔbava sua ne ati bolɛ ngyɛnu nnu ɛkpɔ ko yeado sua ne ati bolɛ ne azo, yeadua sua ne kakɛ na sua ne ayɛ ye ɛdeɛ.

¹⁶“Saa awie tu ye azɛlɛ mɔɔ le ye agyadeɛ la foa ko maa Ɛdɛnkɛma a, ye bolɛ bayɛ kɛ ma dodo mɔɔ sa ye dua la bolɛ Bɛbasese ye kakɛ ne ma kilo abulanwiɔ biala dwɛtɛ fufule bulu.

¹⁷Saa ɔdule ɛya ne ɔmanle Ɛdɛnkɛma wɔ ɛvolɛ abulanlu ɛvoyia ne anloa a, ye bolɛ ne gyi kɛmɔ ɔgyi ye ala la.

¹⁸Saa ɔdule ɔmanle, wɔ mekɛ mɔɔ ɛnee ɛvolɛ abulanlu ɛvoyia mekɛ ne ɛhɔ dɔɔnwo la a, sɛlɛvolɛ ne basese bolɛ ne ahɔdwu mekɛ dodo mɔɔ yeha na bɛali ɛvolɛ abulanlu ɛvoyia ne la, na akee bɛade zolɛ.

¹⁹Saa ahenle mɔɔ dule azɛlɛ ne manle Ɛdɛnkɛma la kulo kɛ ɔkpɔne ye azɛlɛ ne a, ɔbava azɛlɛ ne bolɛ ne ngyɛnu nnu ɛkpɔ ko yeado azɛlɛ ne ati bolɛ ne azo na yeava yeadɔ.

²⁰Na saa ɔngulo kɛ ɔkpɔne ye azɛlɛ ne, anzɛɛ saa yedɔne azɛlɛ ne yemaa awie a, yemɔ bɛnzia bɛmkpɔne azɛlɛ ne.

²¹Saa ɛvolɛ abulanlu ɛvoyia ne dwu a, ɛnee ɛya ne anwo te na ɔle Ɛdɛnkɛma ɛdeɛ, kɛ azɛlɛ mɔɔ bɛboɔboa bɛdu bɛmaa Ɛdɛnkɛma la; ɔwɔ kɛ ɔyɛ sɛlɛvolɛ ne ɛdeɛ.

²²“Saa awie tu azɛlɛ mɔɔ yedɔ la maa Ɛdɛnkɛma, na ɔle azɛlɛ mɔɔ ɔmboka ye agyadeɛ nwo a,

²³sɛlɛvolɛ ne basese ye bolɛ ne ahɔdwu ɛvolɛ abulanlu ɛvoyia ne anloa, na mɔɔ ɔkɛyɛ la ahenle adua. Ezukoa zɛhae anwo te na ɔle Ɛdɛnkɛma ɛdeɛ.

²⁴Ɛvolɛ abulanlu ɛvoyia ne dwu a, ɔwɔ kɛ bɛsiane azɛlɛ ne bɛmaa ɔ menle ne mɔɔ dɔnenle ye na azɛlɛ ne le ye agyadeɛ la.

²⁵“Bolɛ biala mɔɔ bɛsese la, ɔwɔ kɛ bɛsese ye wɔ nwuanzanwuanza ɛleka ne ezukoa nu: gilaa abulanwiɔ le hyikɛle ko anzɛɛ ɛkpanli kenle nna ahatualɛ.

²⁶“Noko akee, kɛmɔ ayɛmoa biala ara mɔɔ ɔkɛlumua ɔkɛwo ye la le Ɛdɛnkɛma ɛdeɛ la ati, awie biala ɛnlɛ adenle kɛ ɔkɛdu ɔkɛmaa; saa ɔle ɛnlankɛ o, anzɛɛ boane o, ɔle Ɛdɛnkɛma ɛdeɛ.

²⁷Saa ayɛmoa ne anwo ɛnde a, yemɔ ɔ menle kola tɔ ye bolɛ mɔɔ bɛkɛpɛ bɛkɛdo nwolɛ la, na ɔfa bolɛ ne ngyɛnu nnu ɛkpɔ ko ɔboka nwo. Saa yeangola ye kpɔne a, bɛbadɔne ye, kɛmɔ bɛsesenle ala la.

²⁸ “Debie biala mɔɔ awie lɛ na yedu yemaa Nyamenle la, saa sonla o, ayɛmoa o, anzɛɛ ye agyadeɛ azɛlɛ ne bie o, ɔnle kɛ bɛtɔne ye anzɛɛ ɔ menle eza kpɔne ye debie. Debie biala mɔɔ bɛdu bɛmaa Ɛdɛnkɛma bɔkɔɔ la anwo te na ɔle Ɛdɛnkɛma ɛdeɛ bɔkɔɔ.[5]

²⁹Ɔnle kɛ bɛfa ezukoa bɛkpɔne sonla mɔɔ bɛdu ye bɛmaa Ɛdɛnkɛma kɛ bɛzɛkye ye la. Ɔwɔ kɛ bɛku ye.

³⁰ “Azɛlɛ ne azo ngyɛnu bulu ɛkpɔ ko ne mɔ amuala, saa ma o, saa baka nzoleɛ o, biala le Ɛdɛnkɛma ɛdeɛ. Ɔle debie mɔɔ anwo te na ɔle Ɛdɛnkɛma ɛdeɛ a.

³¹Saa awie kpondɛ kɛ eza ɔtɔ ye ngyɛnu bulu ɛkpɔ ko ne a, ɔwɔ kɛ ɔfa deɛ ne ati bolɛ ne ngyɛnu nnu ɛkpɔ ko ɔboka deɛ ne ati bolɛ ne anwo.

³²Nlankɛ nee nyɛmoa ngyɛnu bulu ɛkpɔ ko a le kɛ, saa mboaneneavolɛ ne tia bɛ a, mɔɔ tɔ zolɛ bulu biala la anwo te na ɔle Ɛdɛnkɛma ɛdeɛ.

³³Ɔnle kɛ awie biala biza nwolɛ edwɛkɛ kɛ ɔle kpalɛ anzɛɛ ɔnle kpalɛ, yɛɛ ɔnle kɛ bɛkakyi bie; saa ɔkakyi bie a, mɔɔ ɔvale ɔhakyile nee alumua ayɛmoa ne amu nwiɔ le Ɛdɛnkɛma ɛdeɛ. Ɔnle kɛ ɔ menle kpɔne ye.”

³⁴Ɛhye mɔ a le mɛla ne mɔ mɔɔ Ɛdɛnkɛma luale Mosisi anwo zo vale manle Yizilayɛma wɔ Saenae Boka a.