Read Nzema Sɛlɛ 7 Bible Online

Sɛlɛ 7 - Nzema bible

Sɛlɛ 7

¹“Abozozielɛ (fɔlɛlilɛ) azubɔdeɛ nwo mɛla ne ɛne; ɔle nwuanzanwuanza kpalɛ kpalɛ.

²Ɔwɔ kɛ bɛku ye wɔ ɛleka mɔɔ bɛku ɛyelalɛ azubɔdeɛ ne la, na bɛto ye mogya ne bɛgua azukponle ne anwo amuala bɛyia.

³Akee bɛyeye ɔ kunlu ɛnlome ne amuala, ɔ dua dɔlera ne, ɔ kunlu ninyɛne ne mɔ anwo ɛnlome ne, ye ɛzizira nwiɔ ne nee nwolɛ ɛnlome ne mɔɔ wɔ ɔ nze nu la, yɛɛ ye ɛbolɛ ne anwo ninyɛne ne mɔ, bɛyɛ azubɔdeɛ.

⁵Sɛlɛvolɛ ne bayela ɔ muala wɔ azukponle ne azo abɔ azu amaa Ɛdɛnkɛma. Ɔle fɔlɛlilɛ azubɔdeɛ.

⁶Nrenya biala mɔɔ wɔ sɛlɛvolɛma ne anu la kola di bie Ɔwɔ kɛ bɛdi ye wɔ ɛleka mɔɔ te la. Ɔle nwuanzanwuanza kpalɛ kpalɛ.

⁷“Abozozielɛ azubɔdeɛ ne le kɛ ɛtane azubɔdeɛ ne ala la, yɛɛ bɛ mu nwiɔ bɛ nwo mɛla le ko. Sɛlɛvolɛ ne mɔɔ fa ayɛ mgbɔdalɛ azubɔdeɛ ne la ɛdeɛ ɔ.

⁸Sɛlɛvolɛ biala noko mɔɔ kɛbɔ ɛyelalɛ azu ne la a lɛ azubɔdeɛ nwoma ne a.

⁹Ma azubɔdeɛ biala mɔɔ bɛdo ye fonlomo nu nee mɔɔ bɛloa ye kyɛnze anzɛɛ fulonvule nu la le sɛlɛvolɛ ne mɔɔ kɛva kɛbɔ azu ne la ɛdeɛ.

¹⁰Na azubɔdeɛ biala mɔɔ bɛva nwole bɛfɔtɔ anzɛɛ mɔɔ le reserese la le Aalɔn amra ne mɔ ɛdeɛ. Ɔwɔ kɛ bɛkyɛ ye bɛ ti pɛpɛ.

¹¹“Anzonudwolɛ[1] azubɔdeɛ mɔɔ bɛfa bɛabɔ azu bɛamaa Ɛdɛnkɛma la anwo mɛla ɛne:

¹²Saa ahenle fa ba kɛ ɔfa yeayɛ mo a, ɛnee ɔwɔ kɛ ɔfa kpanwo ngyikyi mɔɔ mgbɔvonle ɛnle nu na bɛva nwole bɛfɔtɔ la, kpanwo ngyikyi ndɛbandɛba ngukulungukulu mɔɔ mgbɔvonle ɛnle nu na nwole wɔ nwolɛ la, yɛɛ belɛde mɔɔ bɛva esamo kpalɛ mɔɔ bɛva nwole bɛfɔtɔ bɛyɛ la.

¹³Ɔwɔ kɛ ahenle fa kpanwo ndɛbandɛba mɔɔ mgbɔvonle wɔ nu la boka ye anzonudwolɛ azubɔdeɛ ne anwo ɔbabɔ azu ne.

¹⁴Ɔbava kpanwo ndɛbandɛba ɛhye mɔ ko yeaboka azubɔdeɛ ko biala anwo kɛ ɔle azubɔdeɛ yeamaa Ɛdɛnkɛma. Ɛhye le sɛlɛvolɛ ne mɔɔ to anzonudwolɛ azubɔdeɛ mogya ne gua azukponle ne anwo yia la ɛdeɛ.

¹⁵Ɔwɔ kɛ bɛdi anzonudwolɛ azubɔdeɛ ne mɔɔ bɛva bɛbɔ azu bɛyɛ mo la amuala kenle ko ne. Ɔnle kɛ bɛgyakyi bie bɛsie ɛkɛ ne bɛmaa aleɛ kye zolɛ.

¹⁶“Na saa azubɔdeɛ ne le ɛwɔkɛyelɛ azubɔdeɛ anzɛɛ azubɔdeɛ mɔɔ ahenle ɛyeye ɔ kunlu ɛva ɛra la a, yemɔ bɛli azubɔdeɛ ne kenle ko ne ala, na saa bie ka ɛdeɛ a, bɛkola bɛdi wɔ ye alehyenlɛ nu.

¹⁷Noko saa bie ka na ɔdi kenle nsa a, ɔwɔ kɛ bɛyela ye.

¹⁸Saa azubɔlɛ aleɛ ne bie ka, ɔdi kenle nsa na bɛdi a, ɔnle kɛ bɛdie ahenle mɔɔ nee azubɔdeɛ ne rale la bɛto nu, yɛɛ ɔnle kɛ bɛfa ye kɛ ɔvale debie bɔbɔ ɔrale. Ɔle munzule debie, yɛɛ mɔɔ kɛli bie la, ɛtane ne zo ɔdaye.

¹⁹Nane mɔɔ kɛha debie mɔɔ anwo ɛnde la, ɔnle kɛ bɛdi Ɔwɔ kɛ bɛyela ye. “Awie biala mɔɔ anwo te la kola di nane ne bie.

²⁰Na saa evinli ɛha awie na ɔfa ɔdi anzonudwolɛ azubɔdeɛ ne mɔɔ bɛva bɛbɔ azu bɛmaa Ɛdɛnkɛma la bie a, ɔwɔ kɛ bɛye ye bɛfi ye menli ne avinli.

²¹Zɔhane ala yɛɛ ɔwɔ kɛ bɛyɛ awie biala mɔɔ anwo kɛha debie mɔɔ anwo ɛnde la, saa sonla o, nane o, anzɛɛ kyibadeɛ biala, na ɔkɛli anzonudwolɛ azubɔdeɛ ne mɔɔ bɛva bɛbɔ azu bɛmaa Ɛdɛnkɛma la aleɛ ne bie la a. Ɔwɔ kɛ bɛye sonla zɔhane bɛfi ye menli ne avinli.”

²²Ɛdɛnkɛma zele Mosisi kɛ,

²³“Ka kile Yizilayɛma kɛ, ɔnle kɛ bɛdi nane ɛnlome, saa ɛnlankɛ o, boane o anzɛɛ abɔnkye o.

²⁴Bɛkola bɛfa nane mɔɔ ɔdaye ɔ ngome ɔkɛwu anzɛɛ nane kpole bie kɛhu ye la ɛnlome bɛyɛ sua nu ninyɛne bie mɔ; noko ɔnle kɛ bɛdi ye fee.

²⁵Awie biala mɔɔ kɛli nane mɔɔ bɛva bɛbɔ ɛyelalɛ azu bɛmaa Ɛdɛnkɛma la ɛnlome la, bɛye ye bɛvi ye menli ne avinli.

²⁶ Eza ɔnle kɛ bɛdi mogya biala fee. Saa ɔle anloma anzɛɛ nane mɔɔ wɔ wɔ sua nu bɔbɔ la a, ɔnle kɛ bɛdi ye mogya

²⁷Awie biala mɔɔ kɛli mogya la, ɔwɔ kɛ bɛye ye bɛfi ye menli ne avinli.”

²⁸Ɛdɛnkɛma zele Mosisi kɛ,

²⁹“Ka kile Yizilayɛma kɛ: Ɔwɔ kɛ awie biala mɔɔ bɔ anzonudwolɛ azu amaa Ɛdɛnkɛma la fa ye azubɔdeɛ ne bɛlɛ Ɛdɛnkɛma. Ye anzonudwolɛ azubɔdeɛ ne mɔɔ bɛva bɛbɔ azu ne la,

³⁰ɔwɔ kɛ ɔdaye mumua ne ɔfa nuhua ɛyelalɛ azubɔdeɛ ne ɔ sa nu ɔbɛlɛ Ɛdɛnkɛma. Ɔwɔ kɛ ɔfa nane ne ɛnlome ne nee ɔ kɛnra azo ne a ba a, amaa bɛado ɔ kɛnra azo ne ehono bɛabɔ ehono azu bɛamaa Ɛdɛnkɛma.

³¹Sɛlɛvolɛ ne bayela ɛnlome ne wɔ azukponle ne azo, na ɔ kɛnra azo ne le Aalɔn nee ɔ mra ne mɔ ɛdeɛ.

³²Ɔwɔ kɛ bɛfa nane ne ɛzɔlɛ fema ne mɔɔ bɛkɛdu la bɛmaa sɛlɛvolɛ ne kɛ azubɔdeɛ mɔɔ vi anzonudwolɛ azubɔdeɛ ne anu la.

³³Ɛzɔlɛ ɛhye le sɛlɛvolɛ ne nee Aalɔn amra ne mɔ mɔɔ to anzonudwolɛ azubɔdeɛ mogya ne gua azukponle ne anwo la ɛdeɛ.

³⁴Ɔluakɛ nane ne akɛnra azo ne nee ɛzɔlɛ ne mɔɔ bɛkɛdu la, melie mevi Yizilayɛma ɛkɛ, mevi bɛ anzonudwolɛ azubɔdeɛ ne mɔ anu, na meva memaa Sɛlɛvolɛ Aalɔn nee ɔ mra ne mɔ na meyɛ ye kɛ dahuu biala ɔle bɛ ɛdeɛ.

³⁵Ɔle Aalɔn nee ɔ mra ne mɔ ɛdeɛ mɔɔ ɔwɔ kɛ bɛfa bɛmaa bɛ, bɛye bɛfi ɛyelalɛ azubɔdeɛ ne mɔ mɔɔ bɛfa bɛabɔ azu bɛamaa Ɛdɛnkɛma la anu a. Mekɛ mɔɔ bɛdule bɛ bɛmanle Ɛdɛnkɛma kɛ bɛle ye sɛlɛvolɛma la yɛɛ bɛdule ɛhye bɛziele ɛkɛ bɛmanle bɛ a.

³⁶Ɛdɛnkɛma yɛle ye mɛla wɔ kenle mɔɔ bɛkpokpale bɛ nwole la kɛ ɔwɔ kɛ Yizilayɛma fa maa bɛ dahuu wɔ awolɛndoazo muala anu.”

³⁷Ɛyelalɛ azubɔdeɛ, ma azubɔdeɛ, ɛtane azubɔdeɛ, fɔlɛlilɛ azubɔdeɛ, ɛnluanlɛ anzɛɛ anwotumaa yɛɛ anzonudwolɛ azubɔdeɛ ne mɔ anwo mɛla

³⁸mɔɔ Ɛdɛnkɛma hyehyɛle manle Mosisi wɔ Saenae Boka, wɔ mekɛ mɔɔ ɔzele Yizilayɛma kɛ bɛva bɛ azubɔdeɛ ne mɔ bɛrɛlɛ Ɛdɛnkɛma la ɛne. Mekɛ ne anu ɛnee bɛwɔ Saenae fienemgbole ne anu.