Read Nzema Gyɛ 1 Bible Online

Gyɛ 1 - Nzema bible

Gyɛ 1

¹Gyɛlɛmaya mɔɔ ɔ ze a le sɛlɛvolɛ Helekaya mɔɔ boka sɛlɛvolɛma mɔɔ wɔ Anato mɔɔ wɔ Bɛngyaman maanzinli nu la anwo la anloa edwɛkɛ ɛne:

² Ɛdɛnkɛma dendɛle hilele Gyɛlɛmaya wɔ Dwuda Belemgbunli Emɔn ara Dwosaya mekɛ zo. Ɛnee Dwosaya ɛli ebia ne ɛvolɛ bulu nee nsa.

³ Ɛdɛnkɛma dendɛle hilele Gyɛlɛmaya bieko wɔ Belemgbunli Gyɛhɔyakem mɔɔ le Dwuda Belemgbunli Dwosaya ara ne mekɛ zo. Ɔdendɛle ɔhilele ye toonwo Belemgbunli Zɛdikaya mɔɔ le Dwuda Belemgbunli Dwosaya ara ne lile ɛvolɛ bulu nee ko wɔ ebia zo, na bɛhyele Gyɛlusalɛmma nuokɛ bɛhɔle nlɔnu wɔ siane nnu ne anu la.

⁴Ɛdɛnkɛma dendɛle hilele me. Ɔse,

⁵“Mekabɔ wɔ meado ɛ nli akunlu la ɛnee meze wɔ, yɛɛ bɛkawo wɔ la ɛnee mekpa nu meye wɔ, na meyɛ wɔ maanle maanle Nyamenle kpɔmanvolɛ.”

⁶Membuale kɛ, “O, Awulae Nyamenle, mele kakula, me nloa ɛtɛtele.”

⁷Na Ɛdɛnkɛma zele me kɛ, “Mmaka kɛ ɛle kakula, ɔluakɛ menli mɔɔ mebazoa wɔ bɛ avinli la, ɔwɔ kɛ ɛkɔ, yɛɛ edwɛkɛ biala mɔɔ menwɔze wɔ la, ɔwɔ kɛ ɛka.

⁸Mmasulo bɛ, ɔluakɛ me nee wɔ lua; mebalie wɔ. Medame Ɛdɛnkɛma a mese a.”

⁹Akee Ɛdɛnkɛma dendenle ɔ sa, ɔvale ɔhanle me nloa na ɔzele me kɛ, “Nea, meva me edwɛkɛ ne medua ɛ nloa.

¹⁰Ɔvi ɛnɛ kenle ye, memaa wɔ tumi wɔ maanle maanle nee arelemgbunli nwo zo kɛ ɛdudu na ɛbubu bɛ ɛgua, ɛzɛkye bɛ na ɛvuandi bɛ ɛgua, kɛ ɛkyekye na ɛlua.”

¹¹Ɛdɛnkɛma bizale me kɛ, “Gyɛlɛmaya, duzu a ɛnwu ye a?” Membuale kɛ, “Menwu alemɔn baka.”

¹²Na Ɛdɛnkɛma zele me kɛ, “Nɔhalɛ ɔ, wɔnwu ye kɔsɔɔ, ɔluakɛ melɛnea meamaa me edwɛkɛ ne ayɛ zɔhane.”

¹³Eza Ɛdɛnkɛma dendɛle hilele me bieko kɛ, “Duzu a ɛnwu ye a?” Membuale kɛ, “Menwu buakɛ mɔɔ ɛlɛwu kɛ ɔgyi senle zo wɔ sɔlɔ nehane, na ɔkyea ɔba me nwo ɛke.”

¹⁴Ɛdɛnkɛma akee zele me kɛ, “Munzule vi sɔlɔ nehane bara menli mɔɔ wɔ azɛlɛ ye azo la amuala anwo zo,

¹⁵ɔluakɛ melɛfɛlɛ maanle maanle mɔɔ wɔ sɔlɔ la amuala. Bɛ arelemgbunli bava bɛ arelemgbunli mbia araziezie Gyɛlusalɛm nlenkɛ mgbole ne mɔ anloa. Bɛbava bɛ mbia ne mɔ bɛabɛnra bɛayia Gyɛlusalɛm bane ne mɔ kɔsɔɔti nee Dwuda azuamgbole mɔɔ ɛha la amuala.

¹⁶Mebadea me menli ne wɔ bɛ amumuyɛ mɔɔ bɛyɛ, bɛkpo me na bɛhɔkpu ɛyɛlɛ bɛmaa nyamenle gyɛne gyɛne, na bɛzonle bɛdabɛ bɛ sa anloa gyima la anwo.

¹⁷Na wɔmɔ, Gyɛlɛmaya, bɛza; dwazo na kɔha edwɛkɛ biala mɔɔ melɛfa meazoa wɔ la kile bɛ. Mmasulo bɛ anrɛɛ menwɔmaa ɛkɛyɛ anwunvɔne wɔ bɛ nyunlu na ɛkɛzulo bɛ kpalɛ.

¹⁸Na nea, ɔvi ɛnɛ, meyɛ wɔ suakpole mɔɔ bɛbɔ nwolɛ bane, meyɛ wɔ bulalɛ mpila na meyɛ wɔ kɔbele bane mɔɔ mefa meatia maanle ye kɔsɔɔti, meatia Dwuda arelemgbunli, ye mgbanyima, ye sɛlɛvolɛma, yɛɛ menli mɔɔ wɔ maanle ne anu la amuala.

¹⁹Bɛbaho bɛatia wɔ, na bɛnrɛhola wɔ, ɔluakɛ me nee wɔ lua kɛ medie ɛ ti. Medame Ɛdɛnkɛma a mese a.”