Read Nzema Gyɛ 10 Bible Online

Gyɛ 10 - Nzema bible

Gyɛ 10

¹Yizilayɛma, bɛdie edwɛkɛ mɔɔ Ɛdɛnkɛma ɛlɛka ahile bɛ la.

²Ɔse, “Bɛmmasukoa maanle maanle ne mɔ nyɛleɛ ne mɔ; maanle maanle ne mɔ ahonle tu anwomanyunlu sɛkɛlɛneɛ ne mɔ anwo, na bɛmɛ, bɛmmamaa bɛ ahonle tu nwolɛ.

³Menli ɛhye mɔ nyamenlezonlenlɛ le mgbane. Bɛpɛ baka ɛbɔ nu; na dwinvolɛ fa ye mbulalɛ ne se,

⁴na bɛfa dwɛtɛ fufule nee ezukoa nvutuke bɛfɔle nwolɛ. Bɛfa pɛlɛko bɛbobɔ nu amaa bɛandudu bɛangua noko nea, bɛsonle abaaba ɛhye mɔ.

⁵Abaaba ɛhye mɔ le kɛ ahule nu ananze, bɛngola bɛndendɛ; ɔwɔ kɛ bɛsoa bɛ, ɔboalekɛ bɛngola bɛndia. Bɛmmasulo bɛ, ɔluakɛ bɛngola bɛnyɛ bɛ ɛhwee, yɛɛ bɛngola bɛnyɛ debie kpalɛ.”

⁶O Ɛdɛnkɛma, awie nee wɔ ɛnzɛ; ɛle bedevinli, wɔ duma ne le kpole, tumi wɔ nu.

⁷ Maanle maanle Belemgbunli, nwane a ɛnzulo wɔ a? Enililɛ le wɔ ɛdeɛ. Maanle maanle ne mɔ anu nrɛlɛbɛvolɛma o, bɛ nuhua arelemgbunli o, ko bɔbɔ nee wɔ ɛnzɛ.

⁸Bɛle ahɔnwɔne, bɛle ahoasea. Abaaba ne mɔ ngilehilelɛ le mgbane.

⁹Bɛva dwɛtɛ fufule mɔɔ vi Sepeen la bɛfɔle abaaba ne mɔ anwo, bɛva ezukoa nvutuke mɔɔ vi Ɛfaze la bɛfɔle nwo, bɛle dwinvolɛ asa anloa gyima. Bɛva arelemgbunli ɛdanlɛ anye buluwu nee kɔkɔlɛ yɛɛ akɔlɛ ɛnlome nee kɔkɔlɛ bɛheda bɛ; menli mɔɔ ze adwinli la a nwonle ɛdanlɛ ne a.

¹⁰Na wɔmɔ Ɛdɛnkɛma, ɛle nɔhalɛ Nyamenle; wɔmɔ a ɛle tease Nyamenle nee Damɛnlangoate Belemgbunli ne a. Saa ɔfa ɛya a azɛlɛ kpusu. Maanle maanle ɛngola ye ɛya nloa gyinla.

¹¹(Se bɛ kɛ, “Bɛbazɛkye awozonle ne mɔ mɔɔ tɛ bɛmɛ a bɛbɔle anwuma nee aze la. Bɛnrɛnyia ewiade ye ɛleka biala bɛnrɛdɛnla.”)

¹²Ɛdɛnkɛma vale ye tumi a bɔle azɛlɛ ye a, ɔvale ye nrɛlɛbɛ a ɔbɔle ewiade a, ɔvale ye ndelebɛbo a ɔbɔle anwomanyunlu a.

¹³Saa ɔtea nu a anwomanyunlu nzule yɛ begyebegye; ɔmaa amungu kye ewiade ɛleka biala. Ɔmaa ezule fedevede na ɔmaa ahumu tu.

¹⁴Wɔ ɔ nyunlu, awie biala le kɔnwɔne, yɛɛ ɔnlɛ adwenle; ezukoa dwinvolɛ biala ananze mɔɔ ɔkɛyɛ la gua ɔdaye mumua ne ɔ nyunlu aze, ɔluakɛ ye ananze ne mɔ mɔɔ ɔyɛ la le adalɛ, ngoane ɛnle bɛ nu.

¹⁵Nvasoɛ ɛnle bɛ nwo zo, bɛfa bɛto agyiba; saa bɛ ndeanlɛ mekɛ ne dwu a bɛbazɛkye bɛ.

¹⁶Gyekɔbo Nyamenle ne ɛnle kɛ nyamenle ɛhye mɔ, ɔluakɛ yemɔ a ɔbɔle ninyɛne kɔsɔɔti a, yɛɛ Yizilayɛ abusua ekpunli ne le ye agyadeɛ: ye duma a le Tumivolɛ Ɛdɛnkɛma.

¹⁷O Yizilayɛma mɔɔ bɛva bɛ aze a, bɛhuohua bɛ nwo.

¹⁸Ɔluakɛ Ɛdɛnkɛma se, “Bɛnlea, mekɛ ye anu ala mefuandi bɛdabɛ mɔɔ bɛde azɛlɛ ɛhye azo la kɔsɔɔti meagua. Mebamaa bɛanwu bɛ nyunlu meamaa yeade bɛ kpalɛ.”

¹⁹Yizilayɛma zunle zele kɛ, “Abule ɛbu yɛ, ɔboalekɛ yɛboda! Yɛ nganlɛ ne mɔ ɛlɛkile yɛ nyane, na ɔwɔ kɛ yɛdi ye yɛ kunlu.

²⁰Bɛzɛkye yɛ ndanlɛ azua ne mɔ, nyɛma mɔɔ dedɛ bɛ la amuala ɛtete. Yɛ mra ne mɔ vi yɛ nwo ɛdu, bie ɛnle ɛke mɔɔ kɛzi yɛ ndanlɛ azua ne mɔ bieko a, bie ɛnle ɛke mɔɔ kɛva mgbɛnu ndanlɛ ne mɔ kɛhendɛhenda a.”

²¹Membuale kɛ, “Yɛ mgbanyima ne mɔ le ahɔnwɔne; bɛyɛ debie a bɛmbiza Ɛdɛnkɛma moalɛ. Yemɔti a bɛamkpazi, na bɛbɔ yɛ menli ne asande la.

²²Bɛdie! Yɛde edwɛkɛ bie! Basabasa vi sɔlɔ maanle bie anu ɛlɛba arabɔ Dwuda azuamgbole ne mɔ, yeamaa bɛayɛ azuadu; bɛbayɛ ɛzonlɛ dabelɛ.”

²³O Ɛdɛnkɛma, meze kɛ sonla ɔdaye ɔnlɛ ɔ nwo; sonla ɔdaye ɔnlɛ ye ngoane zo tumi.

²⁴O Ɛdɛnkɛma, tea me, noko anrɛɛ suzu, mmafa ɛya ɛtea me, anrɛɛ me awieleɛ ne ala ɛne.

²⁵Wola wɔ ɛya ne gua maanle maanle mɔɔ ɛnze wɔ, nee menli mɔɔ ɛnzonle wɔ la anwo zo; bɛhu wɔ menli ne; bɛbɔ Gyekɔbo abo zo amra abo zo tɔɔ; bɛmaa bɛ maanle ne ɛdɔ mgbane.