Read Nzema Gyɛ 11 Bible Online

Gyɛ 11 - Nzema bible

Gyɛ 11

¹Ɛdɛnkɛma zele Gyɛlɛmaya kɛ,

²“Gyɛlɛmaya, tie ngyekyeleɛ ne anu edwɛkɛ agbɔkɛ ne mɔ na ka kile Dwudama nee Gyɛlusalɛmma.

³Ka kile bɛ kɛ Ɛdɛnkɛma, Yizilayɛ Nyamenle ne se: Munzule baha awie biala mɔɔ anli ngyekyeleɛ ɛhye azo la.

⁴Ɔle ngyekyeleɛ mɔɔ me nee bɛ ze mɔ kyekyele wɔ mekɛ mɔɔ me nee bɛ vi Yigyibiti maanle ne mɔɔ le kɛ senle tandane la anu rale la. Menzele bɛ kɛ bɛdie me ne na bɛyɛ mɔɔ menwɔze bɛ la amuala. Saa bɛyɛ ɛhye a bɛbayɛ me menli, na medame meayɛ bɛ Nyamenle.

⁵Na mebali ɛwɔkɛ ne mɔɔ membɔle bɛ ze mɔ kɛ mebava azɛlɛ ne mɔɔ kye aleɛ, mɔɔ kɛkala bɛde zolɛ la meamaa bɛ la azo.” Membuale kɛ, “Ɛdɛnkɛma, maa ɔyɛ zɔhane.”

⁶Ɛdɛnkɛma zele me kɛ, “Kɔbɔ edwɛkɛ ɛhye nolo wɔ Dwuda azuamgbole ne mɔ nee Gyɛlusalɛm guabile ne mɔ amuala azo kɛ: Bɛdie ngyekyeleɛ ne anu edwɛkɛ na bɛli zolɛ.

⁷Ɔluakɛ mekɛ mɔɔ me nee bɛ ze mɔ vi Yigyibiti rale la, membɔle bɛ kɔkɔ ɛsesebɛ kɛ bɛdie me, na mehɔ zolɛ mehakye bɛ toonwo a yeradwu ɛnɛ a.

⁸Noko bɛandie, yɛɛ bɛanli zolɛ. Ko biala ɔdaye ɔyɛle ɛtane mɔɔ ɔ kunlu dwo nwolɛ la. Yemɔti menvale ndeanlɛ kɔsɔɔti mɔɔ bɛhile wɔ ngyekyeleɛ ne anu la mendeanle bɛ, noko bɛampili.”

⁹Ɛdɛnkɛma zele me bieko kɛ, “Nea, Dwudama nee Gyɛlusalɛmma ɛde atua.

¹⁰Bɛlɛyɛ bɛ ze mɔ mɔɔ kpole kɛ bɛnrɛdie me ne la ɛtane ne mɔ bie; bɛzonle nyamenle gyɛne gyɛne. Yizilayɛma nee Dwudama ɛtulu ngyekyeleɛ ne mɔɔ me nee bɛ ze mɔ kyekyele la.

¹¹Yemɔti, medame Ɛdɛnkɛma, bɛnlea, memaa munzule ado bɛ.

¹²Saa munzule ɛhye to Dwudama nee Gyɛlusalɛmma a, bɛbahɔzu bɛazɛlɛ moalɛ wɔ nyamenle ne mɔ mɔɔ bɛkpu ɛyɛlɛ bɛmaa bɛ la ɛkɛ, noko bɛ nyamenle ne mɔ ɛnrɛhola bɛ die.

¹³Dwudama nyamenle ne mɔ ɛzo kɛ bɛ azuamgbole ne mɔ ala la, yɛɛ Gyɛlusalɛmma azukponle mɔɔ ɛsisi, mɔɔ bɛkpu ɛyɛlɛ zolɛ bɛmaa bozonle Beeyale la ɛzo kɛ bɛ awɔdenle ne mɔ la. Bɛva bɛgua bɛ nyunlu aze.

¹⁴Yemɔti Gyɛlɛmaya, mmasɛlɛ ɛmaa menli ɛhye mɔ anzɛɛ mmabodo ɛmaa bɛ wɔ mekɛ mɔɔ ngyegyelɛ kɛdo bɛ la, ɔluakɛ menrɛdie bɛ.

¹⁵“Menli mɔɔ mekulo bɛ la ɛlɛyɛ amumuyɛ ninyɛne. Duzu adenle a bɛlɛ kɛ ɔwɔ kɛ bɛba me Ɛzonlenlɛ Sua ne anu a? Bɛdwenle kɛ saa bɛbɔ ɛwɔkɛ dɔɔnwo dɔɔnwo na bɛfa nane bɛbɔ azu a ɛnee munzule ɛndo bɛ ɔ? Ɛhye kɛmaa bɛ nye kɛlie ɔ?

¹⁶Medame Ɛdɛnkɛma menvɛlɛle bɛ ‘ɔlivi baka buzuu mɔɔ lɛ ma ngɛnlɛma’ la. Na kɛkala, mekulu kokye meado senle nu meayela ye nya ne mɔ wee meamaa ye ngane ne mɔ abubu agua.

¹⁷“Medame Tumivolɛ Ɛdɛnkɛma a menluale bɛ kɛ mbaka a. Noko melɛsɛkye bɛ, ɔluakɛ bɛmɛ Yizilayɛma nee Dwudama, bɛyɛ ɛtane. Bɛkpu ɛyɛlɛ bɛbɔ azu bɛmaa bozonle Beeyale bɛva bɛha me ɛya.”

¹⁸Ɛdɛnkɛma yele hilele me kɛ me kpɔvolɛma ɛlɛbɔ me nwo adwenle ahu me.

¹⁹Ɛnee mele kɛ boane ralɛ mɔɔ ɛnze nwolɛ bie na bɛ nee ye ɛlɛkɔ ahunleɛ la. Menze kɛ mame a bɛlɛdwenle me nwo adwenle ɛtane la. Ɛnee bɛlɛka kɛ, “Bɛmaa yɛzɛkye baka ne nee ye ma ne mɔ amuala. Bɛmaa yɛpɛ ye yɛvi azɛlɛ ne azo, amaa awie angakye ye bieko.”

²⁰Yemɔti Gyɛlɛmaya zɛlɛle kɛ, “Tumivolɛ Ɛdɛnkɛma, ɛle ndɛnebuavolɛ mɔɔ di pɛlepɛle a; ɛneɛnlea menli ahonle nee bɛ adwenle nu. Me edwɛkɛ ye wɔ ɛ sa nu. Senra menli ɛhye mɔ maa me.”

²¹Ɛnee Anato ezuavolɛ ne kulo kɛ bɛku me. Bɛduale me kɛ memmabɔ Ɛdɛnkɛma nrɛlaleɛ ne nolo, anrɛɛ bɛkɛhu me.

²²Yemɔti Tumivolɛ Ɛdɛnkɛma se, “Mebadea bɛ! Bɛ mgbavolɛ badɔ konle nu; bɛ mra mrenya nee bɛ mra mraalɛ bawu ɛhɔne nu. Bɛ bo zo babɔ.

²³Mebamaa munzule ado Anatoma. Mekɛ ne dwu a, bɛ biala fee ɛnrɛha.”