Read Nzema Gyɛ 12 Bible Online

Gyɛ 12 - Nzema bible

Gyɛ 12

¹O Ɛdɛnkɛma, kanza mebɔ wɔ somolɛ bɔbɔ a, wɔmɔ, ɛdi benle. Noko mesɛlɛ wɔ meava me edwɛkɛ meado ɛ nyunlu. Duzu ati a amumuyɛma kpazi ɛ? Duzu ati a menli mɔɔ ɛnli nɔhalɛ la wie boɛ ɛ?

²Ɛdua bɛ, na bɛsɔ ndinli; bɛnyi na bɛso ma. Bɛ nloa anu a, ɛbikye bɛ kpalɛ, noko bɛ ahonle nu a, ɛmbikye bɛ.

³Na wɔmɔ, O Ɛdɛnkɛma, ɛze me; ɛnwu me, yɛɛ ɛsɔ adwenle mɔɔ melɛ ye ɛ nwo la ɛnea. Twili amumuyɛma ɛhye mɔ kɛ mboane mɔɔ bɛkahu bɛ la, fa bɛ sie kɔdwu kenle mɔɔ bɛku bɛ la.

⁴Yɛ azɛlɛ ye ɛzɛkye ɛhyɛ; ndile mɔɔ wɔ zo la kɔsɔɔti ɛyela. Nyɛmoa nee nloma ɛlɛwu, wɔ menli mɔɔ de zo la amumuyɛ ti, ɔboalekɛ menli ka kɛ, “Ɛdɛnkɛma ɛnrɛnwu mɔɔ yɛlɛyɛ la.”

⁵Ɛdɛnkɛma zele me kɛ, “Gyɛlɛmaya, saa ɛ nee menli ɛzu ɛnriandilɛ na wɔangola bɛ a, kɛ ɛsi ɛkola ɛ nee mgbɔnwɔ su ɛnriandilɛ ɛ? Na saa ɛlua azɛlɛ wienyi zo wɔdu wɔdɔ a, ɛnee saa ɛlua Dwɔdan kpɔkɛmile nu a, kɛ ɛkɛyɛ ɛ?

⁶Ɔluakɛ ɛdawɔ ɛ mediema nee ɛ ze sua nu amra nee wɔ ɛli ye ngunzi nu, bɛboka menli mɔɔ ɛlɛyɛ wɔ la. Bɛ nloa anu menlemenle, noko mmadie bɛ ɛdi.”

⁷Ɛdɛnkɛma se, “Megyakyi Yizilayɛma anzi ɛlilɛ; mekpo me agyadeɛ ne. Meye menli ne mɔɔ la me ahonle nwo la mewula bɛ kpɔvolɛma asa anu.

⁸Menli ne mɔɔ le me agyadeɛ la ɛhakyi me nwo kpɔkɛmile nu awenade; ɛkpolɛ ala a bɛkpo me a, yemɔti mekyi bɛ.

⁹Menli ne mɔɔ le me agyadeɛ la ɛyɛ kɛ anloma ndeta mɔɔ sianza dɔɔnwo ɛbɔ ɛyia ye la. Bɛhɔ bɛhɔboɔboa nanemgbole kɔsɔɔti anloa kɛ bɛrali aleɛ.

¹⁰Mboaneneavolɛma dɔɔnwo ɛzɛkye me vanye egyinli ne, bɛtietia me vanye mbaka ne mɔ azo, bɛmaa me azɛlɛ kɛnlɛma ne ɛhakyi ɛsɛlɛ.

¹¹Bɛzɛkye azɛlɛ ne, bɛyɛ ye mgbane bɛdo ɛkɛ; yezɛkye ɔla ɛkɛ ɔlɛkendɛ me. Azɛlɛ ne amuala ɛhakyi ɛsɛlɛ, na ɔnvane awie biala anwo.

¹²Menli ɛra ɛsɛlɛ ne awoka ne mɔ azo, bɛzɛkye ɛkɛ kɔsɔɔti; ɔluakɛ medame Ɛdɛnkɛma, me dadeɛ ɛlɛdi gyima wɔ azɛlɛ ne azo kɔsɔɔti; awie biala ɛnlɛ anzonudwolɛ.

¹³Me menli ne ɛgua hwiiti, na bɛde mbowundile; bɛvɛ toonwo, na bɛvua asakpane. Ɔlua me ɛya kpole ne ati, bɛ bɛyɔba bayɛ anyiemgba.”

¹⁴Edwɛkɛ mɔɔ Ɛdɛnkɛma hanle wɔ kpɔvolɛma mɔɔ nee ye menli Yizilayɛma bɔ ɛweɛne na bɛfa bɛ sa bɛka agyadeɛ mɔɔ yeva yemaa ye menli Yizilayɛma kɛ bɛ ɛdeɛ ɔ la anwo la ɛne: Ɔse, “Bɛnlea, mebadu bɛ meavi bɛ maanle ne mɔ anu, na meaye Dwudama meavi bɛ nu.

¹⁵Saa metu bɛ zɔhane a, nzinlii mebanwu bɛ anwunvɔne, na mebava bɛ meazia meara bɛ azɛlɛ ne mɔ mɔɔ le bɛ agyadeɛ la azo.

¹⁶Na ɔbara kɛ, saa bɛbafa me menli ne agyakɛ bɛbɔ me duma bɛdi amonle kɛ, ‘Kɛmɔ Ɛdɛnkɛma de aze la.’ kɛmɔ bɛmanle Yizilayɛma vale bɛ bozonle Beeyale ne hanle ndane la a, bɛ nee me menli ne badɛnla na bɛakpazi.

¹⁷Na maanle biala mɔɔ andie me ne la, mebadu ye meabɔ ɔ bo zo. Medame Ɛdɛnkɛma a mese a.”