Read Nzema Gyɛ 13 Bible Online

Gyɛ 13 - Nzema bible

Gyɛ 13

¹Ɛdɛnkɛma zele me kɛ, “Kɔdɔ lenen abɛlako na mo; anrɛɛ mmawula ye nzule nu.”

²Yemɔti mendɔle abɛlako ne na memonle, kɛmɔ Ɛdɛnkɛma zele me ala la.

³Ɛdɛnkɛma zele me bieko kɛ,

⁴“Ye abɛlako ne mɔɔ wɔdɔ wɔmo la kɔvea bolɛ tokule bie anu wɔ Azule Yufileti ne anloa.”

⁵Yemɔti menvale mengɔnveale Yufileti ne anloa, kɛmɔ Ɛdɛnkɛma zele me la.

⁶Mekɛ guale nu la Ɛdɛnkɛma zele me kɛ, “Sia kɔ Yufileti ne anloa kɔye abɛlako ne mɔɔ memanle ɛvale ɛhɔveale lɔ la.”

⁷Mengɔle Yufileti ne anloa mengɔnvunle menyele abɛlako ne. Na nea, ɛnee yezɛkye bɔkɔɔ; ɛfa ye fee a ɔnva.

⁸Akee Ɛdɛnkɛma dendɛle zele me kɛ,

⁹“Kɛ medame Ɛdɛnkɛma mebazi meazɛkye Dwudama adubɛnwo ne nee Gyɛlusalɛmma adubɛnwo ne la ɛne.

¹⁰Amumuyɛma ɛhye mɔ ɛdu bɛ gye kɛ bɛnrɛdie me ne. Bɛli bɛ ahonle ɛtane nzi na bɛzonle nyamenle gyɛne gyɛne bɛbɔ bɛ ti aze bɛmaa bɛ. Yemɔti bɛbayɛ kɛ abɛlako ne mɔɔ ɛfa ɛyɛ ɛhwee a ɔnyɛ boɛ la.

¹¹Kɛmɔ abɛlako kyekye sonla bo kɛnlɛma la, zɔhane ala yɛɛ mekulo kɛ Yizilayɛma nee Dwudama amuala kɛbeta me kyengye a. Menyɛle bɛ zɔhane, amaa bɛayɛ me menli, mɔɔ ɔlua bɛ nwo zo bɛbabɔ me duma, bɛayeyɛ me, na bɛawula me anyunlunyia; noko bɛandie me ne.”

¹²Ɛdɛnkɛma zele me kɛ, “Ka kile bɛ kɛ Ɛdɛnkɛma, Yizilayɛ Nyamenle ne se: Bɛgua nwanye wɔ nwanye dwora ko biala anu bɛmaa ɔyi. Bɛbaha bɛahile wɔ kɛ bɛze kɛ ɔwɔ kɛ bɛgua nwanye wɔ dwora ko biala anu bɛmaa ɔyi;

¹³na bua bɛ kɛ, Ɛdɛnkɛma se: Bɛnlea, mebaye nzabolɛ meado menli mɔɔ de azɛlɛ ye azo la kɔsɔɔti anwo: Arelemgbunli mɔɔ di Devidi ebia ne bie, sɛlɛvolɛma, Nyamenle kpɔmanvolɛma, yɛɛ Gyɛlusalɛmma amuala banlo nwanye abo.

¹⁴Na mebava bɛ ti meafifi nwo ngoko, selɛ nee mralɛ mrenya amuala, medame Ɛdɛnkɛma a mese a. Menrɛze anwunvɔne yɛɛ menrɛvavi bie fee; yɛɛ menrɛnyia ahunluyelɛyelalɛ kɛ akee menrɛzɛkye bɛ.”

¹⁵Yizilayɛma, bɛdie na Ɛdɛnkɛma ɛdendɛ! Bɛmmamemaa bɛ nwo zo.

¹⁶Bɛwula Ɛdɛnkɛma bɛ Nyamenle ne anyunlunyia kolaa na yeamaa awozinli ava bɛ, na bɛandu koti wɔ awoka ne mɔ azo, amaa saa bɛkpondɛ wienyi a yeangakyi awozinli kabii.

¹⁷Na saa bɛnrɛdie me ne a, mebavea meazu wɔ bɛ adubɛnwo ne ati, mebaye awolɛ meahwi monle kpalɛ, ɔboalekɛ bɛhye Ɛdɛnkɛma menli ne nuokɛ.

¹⁸Ɛdɛnkɛma zele me kɛ, “Ka kile belemgbunli ne nee ɔ nli kɛ bɛvi bɛ mbia ne mɔ azo bɛdwu aze, na bɛ abɔtile ngɛnlɛma ne mɔ vi bɛ ti ɛdu ɛgua.

¹⁹Bɛtoto Dwuda nyiakɛ azuamgbole ne mɔ nlenkɛ ne mɔ anu; awie ɛngola bɛ buke. Bɛvula Dwudama amuala, bɛva bɛ kɔsɔɔti bɛhɔ nlɔnu.”

²⁰Gyɛlusalɛmma, bɛnlea! Kɛ bɛ kpɔvolɛma vi sɔlɔ nehane ɛlɛba ɛ! Nienwu a mboane ne mɔ mɔɔ bɛvale bɛ bɛwulale bɛ sa nu la wɔ a? Bɛ mboane ngɛnlɛma ne hale nienwu?

²¹Saa bɛfa menli mɔɔ bɛmɛ bɛvale bɛ kɛ konle nu agɔnwolɛma la bie bɛsie bɛ kpanyinli a, bɛmɛ Yizilayɛma, duzu edwɛkɛ a bɛkɛha a? Asoo bɛ nwo ɛnrɛfofo bɛ, bɛnrɛde nyane kɛ raalɛ mɔɔ ɛvo awolɛ zo la?

²²Saa bɛbiza bɛ nwo ngoko kɛ, “Duzu ati a edwɛkɛ ɛhye mɔ ɛsisi me nwo zo a,” anrɛɛ bɛbanwu kɛ bɛ ɛtane ne mɔ ɛyɛ kpole, ɛye bɛ nwo zo ɛya, na bɛdua bɛ kakɛ.

²³Asoo sonla bile kola kakyi ye bile ne, anzɛɛ sobolɛ mɔɔ ɛtane ala a bɛdi la, bɛdabɛ noko bɛkola bɛdi boɛ.

²⁴Mebabɔ bɛ asande kɛ abonle mɔɔ ɛsɛlɛ zo anwoma ɛlɛbɔ ye la.

²⁵Mɔɔ mehyehyɛ kɛ mefa meayɛ bɛ la ɛne. Medame Ɛdɛnkɛma a mese a, ɔboalekɛ bɛkpo me na bɛhɔli adalɛ nzi.

²⁶Medame mumua ne mebaye bɛ nwo zo ɛya meamaa nyiane ahu bɛ.

²⁷Menwu bɛ bɛkyi ninyɛne mɔɔ bɛyɛ, bɛ awuvolɛvalɛ, nee bɛ huhunliyɛlɛ, yɛɛ bɛ tuutuulilɛ wɔ ɛbɔ nu awoka zo. Gyɛlusalɛmma, abule ɛbu bɛ! Kenlenzu bɔbɔ yɛɛ bɛkɛmaa bɛ nwo kɛde a?