Read Nzema Gyɛ 14 Bible Online

Gyɛ 14 - Nzema bible

Gyɛ 14

¹Edwɛkɛ mɔɔ Ɛdɛnkɛma hanle wɔ nzule ɛhɔne ne anwo hilele Gyɛlɛmaya la ɛne:

²“Dwuda ɛlɛdi nyane, ye azuamgbole ne mɔ ɛlɛbɔ, ye menli weweɛ bɛ nwo aze ye awolɛ, Gyɛlusalɛmma ɛlɛsu kpole.

³Menli mɔɔ de boɛ la soa bɛ ngɛkɛlɛ kɛ bɛhɔ azule; bɛba azule ne mɔ azo a bɛnnyia nzule; bɛfa dwora ne mɔ mgbane bɛsia. Nyiane ku bɛ, bɛ adwenle ka bɔ nu na bɛkeda bɛ ti zo.

⁴Kɛmɔ ezule ɛndɔ na azɛlɛ nwo ɛwe resee la, nyiane ɛlɛku ɛyazonlɛma na ɔmaa bɛkeda bɛ ti zo.

⁵Ndile ɛnfifi, yemɔti weɛlɛ mɔɔ la kpɔkɛ nu la nriandi gyakyi ɔ ra adɔma.

⁶Ɛbɔ nu asoaso fo gyinla awoka ne mɔ azo, bɛdie ɛnwomenle ndɛndɛ kɛ ɛzonlɛ, bɛ nye zo yɛ kisii, ɔboalekɛ bɛnnyia ndile bɛnli.

⁷Akee me menli ne bazu avɛlɛ me kɛ, ‘Yɛ ɛtane ne mɔ ɛbu ɛzia yɛ bɔbɔ ɛdeɛ, O Ɛdɛnkɛma, keha ɛ nwo wɔ wɔ duma ne ati. Yɛhakyi yɛ nzi yɛzi wɔ fane dɔɔnwo, yɛyɛ ɛtane yɛtia wɔ.

⁸O Ɛdɛnkɛma, Yizilayɛ anyelazo a le wɔ, wɔmɔ mɔɔ ɔkyele zo a ɛdie yɛ la, duzu ati a wɔyɛ ɛ nwo ɛyɛvolɛ wɔ azɛlɛ ne azo kɛ adendulɛnli bie mɔɔ makyi ala kenle ko ahɔ a?

⁹Duzu ati a wɔyɛ kɛ sonla mɔɔ ye adwenle ɛha ɛbɔ nu, anzɛɛ wɔyɛ kɛ katakyie mɔɔ ɛngola ngoane die ɛ? Noko O Ɛdɛnkɛma, ɛ nee yɛ de, yɛɛ bɛfa wɔ duma a bɛfɛlɛ yɛ a; mmagyakyi yɛ.’ ”

¹⁰Edwɛkɛ mɔɔ Ɛdɛnkɛma hanle wɔ menli ɛhye mɔ anwo la ɛne: “Bɛ kunlu dwo kɛ bɛkɛluolua nuhua zɔhane. Bɛtɛfule bɛ nwo, yemɔti medame Ɛdɛnkɛma, menrɛdɛne bɛ zo. Menea bɛ ɛtane nee bɛ amumuyɛ ne mɔ mɔɔ bɛyɛ la anwo meadea bɛ.”

¹¹Ɛdɛnkɛma zele me kɛ, “Anrɛɛ mmayɛ nzɛlɛlɛ wɔ menli ɛhye mɔ kpalɛyɛlɛ nwo.

¹²Saa bɛkye nwolɛ ɛhɔne bɔbɔ a, menrɛdie bɛ ɛzunlɛ, yɛɛ saa bɛfa ɛyelalɛ azubɔdeɛ anzɛɛ ma azubɔdeɛ bɛba me nyunlu a, me nye ɛnrɛzɔ ye. Mebava mealua konle, ɛhɔne, yɛɛ anwonyane nu meayela bɛ wee.”

¹³Menganle kɛ, “Awulae Nyamenle, nrɛlaleɛ mɔɔ Nyamenle kpɔmanvolɛma ka kile bɛ la a le kɛ, ‘Konle ɛnrɛdo bɛ; yɛɛ ɛhɔne ɛnrɛhu bɛ; anzonudwolɛ ala a mebava meamaa bɛ wɔ azɛlɛ ɛhye azo a.’ ”

¹⁴Na Ɛdɛnkɛma buale me kɛ, “Nyamenle kpɔmanvolɛma ne mɔ ɛlɛbɔ me duma aha adalɛ nrɛlaleɛ. Meanzoa bɛ, yɛɛ me nee bɛ andendɛ bɔbɔ. Adalɛ ɛnyelɛzodeɛnwunlɛ, menli munzule ɛbɔlɛ mɔɔ nvasoɛ ɛnle zolɛ, yɛɛ bɛdabɛ bɛ ti anu a bɛbɔ bɛka ɛhye mɔ bɛkile bɛ a.

¹⁵Yemɔti medame Ɛdɛnkɛma, meka meahile bɛdabɛ Nyamenle kpɔmanvolɛma mɔɔ lɛ me duma ɛlɛka nrɛlaleɛ, noko tɛ medame a menzoanle bɛ, na bɛka kɛ, ‘Konle nee ɛhɔne ɛnrɛra azɛlɛ ɛhye azo ɛlɛ,’ la kɛ konle nee ɛhɔne nu yɛɛ Nyamenle kpɔmanvolɛma zɔhane badɔ a.

¹⁶Bɛbahu menli ne mɔɔ bɛka adalɛ nrɛlaleɛ ne bɛkile bɛ la noko wɔ konle nu, yɛɛ bie mɔ bawu ɛhɔne nu: bɛdabɛ, bɛ ye mɔ, bɛ mra mrenya, yɛɛ bɛ mra mraalɛ. Mebamaa bɛ munzule abɔ bɛ ti. Bɛbawu bɛagua Gyɛlusalɛm guabile zo. Bɛnrɛnyia awie ɛnrɛzie bɛ.”

¹⁷Ɛdɛnkɛma zele me kɛ menga me nyane mengile menli ne mɔ kɛ: “Mesu meamaa monle abia me takaa alehyenlɛ nee aledwolɛ. Menrɛgyakyi ɛzunlɛ, ɔluakɛ bɛbodɛboda me menli ne, bɛanzuzu bɛamboda bɛ.

¹⁸Saa mebɔ me ti ɛbɔkunlu a, konle nu avunli ngome; meba suakpole ne azo a, ɛhɔne ɛlɛku menli ne agua bɛ lɔ. Nyamenle kpɔmanvolɛma nee sɛlɛvolɛma ɛlɛyɛ bɛ gyima, noko bɛnze mɔɔ bɛlɛyɛ la.”

¹⁹Ɛdɛnkɛma, yemɔti wɔye Dwudama bɔkɔɔ? Asoo ɛkyi Zayɔnoma? Duzu ati a wɔboda yɛ kpole zɛhae mɔɔ yɛyɛ ayile a yɛ nwo ɛnza ɛ? Yɛkpondɛle anzonudwolɛ, noko kpalɛ amba, yɛkpondɛle anwonzalɛ, na nea, ɛzulolɛ a rale a.

²⁰O Ɛdɛnkɛma, yɛnwu yɛ amumuyɛ mɔɔ yɛyɛ, nee egya mɔ ɛtane mɔɔ yɛle tiale wɔ la, ɔluakɛ yɛyɛ ɛtane yɛtia wɔ.

²¹Ɔlua wɔ duma ne ati, mmakpo yɛ; mmasɛkye wɔ anyunlunyia belemgbunli ebia ne duma; kakye yɛ na mmatulu wɔ ngyekyeleɛ ne mɔɔ ɛ nee yɛ kyekyele la.

²²Asoo maanle maanle ne mɔ nyamenle ne mɔ kola tɔ ezule? Asoo anwomanyunlu angome kola tɔ ezule? Tɛ wɔmɔ Ɛdɛnkɛma yɛ Nyamenle ne a tɔ ezule a? Yɛ anyelazo a le wɔ, ɔluakɛ ɛdawɔ a ɛyɛ ninyɛne ɛhye mɔ amuala a.