Read Nzema Gyɛ 15 Bible Online

Gyɛ 15 - Nzema bible

Gyɛ 15

¹ Akee Ɛdɛnkɛma zele me kɛ, “Saa Mosisi nee Samoɛle bɔbɔ bagyinla me nyunlu kpa kyɛlɛ a, menrɛva menli ɛhye mɔ anwo edwɛkɛ menrɛhyɛ bɛ ɛlɛ. Ye bɛ fi me nye zo,

² Saa bɛbiza wɔ kɛ nienwu ɛleka a bɛhɔ a, bua bɛ kɛ medame Ɛdɛnkɛma, mese: Bɛ nuhua mɔɔ fɛta anwonyane la bawu anwonyane nu, bɛ nuhua mɔɔ ɔwɔ kɛ tɔ dadeɛ nloa la badɔ dadeɛ nloa; bɛ nuhua mɔɔ ɔwɔ kɛ wu ɛhɔne nu la bawu ɛhɔne nu, yɛɛ bɛ nuhua mɔɔ fɛta nuokɛhyelɛ la, bɛbahye ye nuokɛ bɛahɔ.

³Mebamaa ninyɛne mgbole nna asisi bɛ nwo zo azɛkye bɛ, medame Ɛdɛnkɛma a mese a. Bɛbahu bɛ konle nu, ahwea batete bɛ avunli, nloma basuso bɛ nwonane, yɛɛ nanemgbole bali bɛ nwonane bɔkɔɔ.

⁴ Mebamaa maanle maanle mɔɔ wɔ aleɛabo la kɔsɔɔti ahonle adu wɔ bɛ ti wɔ mɔɔ Hɛzikaya ara nrenya Manasɛ, Dwuda belemgbunli ne yɛle wɔ Gyɛlusalɛm la ati.”

⁵Ɛdɛnkɛma se, “Gyɛlusalɛmma, nwane a banwu bɛ anwunvɔne a? Nwane a bazu bɛ a? Nwane bɔbɔ a bagyinla abiza bɛ kpalɛyɛlɛ nwo edwɛkɛ a?

⁶Bɛkpo medame Ɛdɛnkɛma, atua ala a bɛte a, yemɔti a medende me sa metia bɛ na mezɛkye bɛ a; akee mezi bɛ nwo abotane mevɛ.[5]

⁷Me menli ne anvi bɛ ninyɛndane nwo, yemɔti mehu bɛ, mezɛkye bɛ; meva me akegyebɛ ne mehegye bɛ wɔ suakpole biala azo wɔ maanle ye anu.

⁸Memaa azɛlɛ ne azo ahunlanvolɛ mraalɛ ɛzo ɛdɛla ɛnweazo anwea. Mezɛkye mgbavolɛ ewia henlema memaa mrɛladane ɛyɛ anwunvɔne; memaa bɛ ɛbolɛ ɛde, ɛzulolɛ ɛha bɛ arɛlevilɛ nu.

⁹Raalɛ ne mɔɔ wole mralɛ nsuu la, nyane ngome ɛmaa ɔ nye zo ɛbulu. Ye sɛnzɛne lunle ewia henlema, bɛbɔ ye anyiemgba, bɛgua ɔ nyunlu aze. Mebamaa bɛ kpɔvolɛma ahu bɛdabɛ mɔɔ bɛha la. Medame Ɛdɛnkɛma a mese a.”

¹⁰Abule ɛbu me, ɔmɔ, kɛ ɛwole me ralɛ nrenya ɛdole azɛlɛ ye mɔɔ zolɛ le konle nee kpolerazulɛ ngome la azo a. Metɛbɔle awie bosea yɛɛ awie ɛtɛbizale me bie, noko awie biala bɔ me sasa.

¹¹Ɛdɛnkɛma, saa metɛkpale bɛ ti kyɛlɛ wɔ bɛ ɛkpazilɛ nwo, saa metɛbodole wɔ wɔ me kpɔvolɛma ati wɔ bɛ ɛmianlɛ nee ngyegyelɛ mekɛ nu a, ɛnee maa sasa mɔɔ bɛlɛbɔ me la ɛha me.

¹²(Asoo awie kɛhola bulalɛ, bɔbɔ bulalɛ mɔɔ bɛ nee ye vi sɔlɔ, mɔɔ bɛva kɔbele bɛfonla nu la bu?)

¹³Ɛdɛnkɛma zele me kɛ, “Mebamaa kpɔvolɛma arasesa me menli ne anwonyia nee bɛ ezukoa ahɔ mgbane. Meyɛ ɛhye meava meadea bɛ wɔ bɛ ɛtane ne mɔ mɔɔ bɛyɛ wɔ azɛlɛ ne azo la ati.

¹⁴Mebamaa bɛahɔzonle bɛ kpɔvolɛma wɔ maanle bie mɔɔ bɛnze nu la anu. Ɔluakɛ mame, saa mefa ɛya a ɔle senle; ɔsɔ a ɔnnu ɛlɛ.”

¹⁵Menganle kɛ, “O Ɛdɛnkɛma, wɔmɔ, ɛze ninyɛne kɔsɔɔti. Kakye me na boa me. Die me ti na di menli mɔɔ yɛ me kpɔdekpɔde la nzenralɛ. Mmasi bɛ nwo abotane toonwo ɛmaa bɛku me; nwu ye kɛ ɔlua wɔmɔ ɛ ti yɛɛ bɛlɛbɔ me aholoba a.

¹⁶O Ɛdɛnkɛma, Tumivolɛ Nyamenle, ɛdendɛle ɛhilele me, na mendiele. Wɔ edwɛkɛ ne manle me nye liele na menlile fɛlɛko; ɔlua zolɛ bɛfa wɔ duma a bɛfɛlɛ me a.

¹⁷Meandɛnla menli mɔɔ akunlu ɛdwo bɛ nwo na bɛdi fɛlɛko la avinli meanga meanzele. Mendɛnlanle koonwu, ɔboalekɛ ɛnee ɛ sa la me nwo zo, yɛɛ wɔmaa ɛya ɛwolo me.

¹⁸Duzu ati a me anwofofolɛ ne ɛngyakyi ɛ? Duzu ati a me hanlɛ ye ɛyɛ kukulabi, mɔɔ meyɛ ye ayile a ɔngɔ a? Mmabɛlɛbɛla me kɛ azule mɔɔ ɛngyɛ na asesa la.”

¹⁹Yemɔti Ɛdɛnkɛma buale kɛ, “Saa ɛsia ɛ nzi a, mebalie wɔ na wɔazia wɔayɛ me sonvolɛ. Saa wɔanva ɛ nloa wɔanga mgbane mgbane, na ɛfa ɛka nrɛlɛbɛ edwɛkɛ a, mebayɛ wɔ me kpɔmanvolɛ. Menli ne bazia aradoa wɔ na tɛ wɔmɔ yɛɛ ɛbahɔdoa bɛ a.

²⁰Mebamaa wɔayɛ kɛ bane mɔɔ bɛva kɔbele bɛdo la wɔ menli ne akɔme nu. Bɛbava konle bɛadoa wɔ, na bɛnrɛnyia gyinlagyakɛ, ɔluakɛ me nee wɔ lua kɛ medie wɔ na mealie wɔ ngoane. Medame Ɛdɛnkɛma a mese a.

²¹Mebalie wɔ meavi amumuyɛma nee kɔdiawuma asa anu.”