Read Nzema Gyɛ 16 Bible Online

Gyɛ 16 - Nzema bible

Gyɛ 16

¹Ɛdɛnkɛma dendɛle hilele me, ɔse,

²“Mmagya raalɛ, ɛwo mraalɛ mrenya nee mraalɛ ɛgua ɛke.

³Ɔluakɛ melɛ edwɛkɛ meka mekile wɔ wɔ mralɛ mrenya nee mralɛ mraalɛ mɔɔ bɛkɛwo bɛ ɛke nee bɛ awovolɛma ne mɔ anwo.

⁴Ewule ɛzulolɛ bie a bahu bɛ a. Bɛwu a bɛnrɛzu bɛ yɛɛ bɛnrɛzie bɛ; bɛ avunli bagua azɛlɛ ye azo mgbane mgbane akpɔlɔ. Bɛbahu bie mɔ konle nu, yɛɛ ɛhɔne ngome bahu bie mɔ; bɛ avunli bayɛ nloma nee nanemgbole aleɛ.

⁵“Medame Ɛdɛnkɛma, mese: Mmakɔ awuke mɔɔ ɛzɛne ɛdɔ ɛkɛ ne la anu. Mmakɔsu awie biala, ɔluakɛ meye me anzonudwolɛ ne mɔɔ menvale memanle menli ɛhye mɔ la. Melie me anwunvɔnezelɛ ne, me ɛhulolɛ kpundii ne nee me anzonudwolɛ mevi menli ɛhye mɔ ɛkɛ.

⁶Menli mɔɔ lɛ bie nee mɔɔ ɛnlɛ bie, mɔɔ wɔ azɛlɛ ɛhye azo la amuala bawu. Bɛnrɛzie bɛ yɛɛ awie biala ɛnrɛzu bɛ anzɛɛ ɛnrɛbodɛboda ɔ nwo anzɛɛ ɛnrɛkpa ɔ ti ɛnrɛli nyane ɛnrɛmaa bɛ.

⁷Awie biala ɛnrɛva debie ɛnrɛdende sonla mɔɔ ɛlɛsu awie la anyunlu kɛ ɔfa yeakyekye ɔ rɛle, yɛɛ awie biala ɛnrɛkyekye awie arɛle kɛ yeminli ɔ ze anzɛɛ ɔ nli la.

⁸“Mmawolo awuke mɔɔ bɛlɛdi, bɛanlo, bɛalie bɛ nye la anu, ɛkɔtɛnla aze ɛ nee bɛ di, no.

⁹ Ɔluakɛ medame Tumivolɛ Ɛdɛnkɛma, Yizilayɛ Nyamenle ne, mese: Nea, mebadu anyelielɛ anzɛɛ fɛlɛkolilɛ bo wɔ maanle ye anu wɔ ɛdawɔ ɛ nye zo wɔ wɔ mekɛ zo. Bɛbagyakyi atɔfolɛlielɛ nee nwolɛ ɛkponledolɛ nee anyelielɛ.

¹⁰“Saa ɛka edwɛkɛ ɛhye mɔ amuala ɛkile menli ne mɔ na bɛbiza wɔ kɛ, ‘Na kɛ ɔyɛ mɔɔ Ɛdɛnkɛma ɛdua yɛ kakɛ kpole zɛhae ɛ? Duzu ɛtane a yɛyɛ a? Duzu ɛtane yɛɛ yɛyɛ yɛtia Ɛdɛnkɛma yɛ Nyamenle ne a?’ a,

¹¹se bɛ kɛ, medame Ɛdɛnkɛma, mese: Ɔboalekɛ bɛ ze mɔ ɛkpo me na bɛhɔzonle nyamenle gyɛne gyɛne, bɛbɔ bɛ ti aze bɛmaa bɛ, yɛɛ bɛanli me mɛla ne azo.

¹²Akee bɛmɛ bɔbɔ bɛyɛ bɛmaa yebo bɛ ze mɔ ɛdeɛ ne azo. Ɔluakɛ nea, awie biala lua ɔdaye ye adenle ɛtane ɛdeɛ mɔɔ ɔ kunlu dwo nwolɛ la azo, yɛɛ bɛkpo kɛ bɛnrɛdie me ne.

¹³Ɛhye ati mebaye bɛ azɛlɛ ɛhye azo meahɔgua azɛlɛ mɔɔ bɛmɛ anzɛɛ bɛ ze mɔ ɛnze zolɛ la azo. Ɛkɛ ne, bɛbazonle nyamenle gyɛne gyɛne alehyenlɛ nee aledwolɛ: na menrɛze bɛ anwunvɔne fee.”

¹⁴Ɛdɛnkɛma se, “Mekɛ ɛlɛba mɔɔ menli ɛnrɛha kɛ, ‘Suzuamgba ala mɔɔ Ɛdɛnkɛma mɔɔ yele Yizilayɛma vile Yigyibiti la de aze la.’

¹⁵Bɛbaha kɛ, ‘Suzuamgba ala mɔɔ Ɛdɛnkɛma mɔɔ yele Yizilayɛma vile sɔlɔ maanle ne nee maanle maanle kɔsɔɔti, mɔɔ ɔkpondenle Yizilayɛma nu la rale la de aze la.’ Ɔluakɛ mebava bɛ meazia meara bɛdabɛ bɛ maanle nu, wɔ azɛlɛ ne mɔɔ menvale memanle bɛ ze mɔ la azo.”

¹⁶Ɛdɛnkɛma se, “Bɛnlea, melɛto ɛsalɛ meavɛlɛ fɛlɛkyevoma dɔɔnwo meamaa bɛarahye menli ne. Ɛhye anzi mebavɛlɛ menli mɔɔ di ɛbɔlɛ la dɔɔnwo meamaa bɛahɔhwe menli ne bɛavi awoka mgbole nee ngyikyi ne mɔ azo, yɛɛ awolɛ mgbole ne mɔ avinli bɛara.

¹⁷Menye dua bɛ nyɛleɛ ne mɔ kɔsɔɔti, bɛ ɛtane ne mɔ ɛnvea, bɛ kɔsɔɔti bɛgua me sa nu.

¹⁸Bɛva bɛ bɛkyi mmonle ninyɛne ne mɔ bɛzɛkye me azɛlɛ ne. Bɛkyi nyɛleɛ ngome a bɛyɛ ye azɛlɛ ne azo a, yemɔti mebadua bɛ amumuyɛ nee bɛ ɛtane mɔɔ bɛlɛyɛ ye ɛkɛ ne la anwo kakɛ mɔnwo.”

¹⁹O Ɛdɛnkɛma, ɛle me anwosesebɛ nee me aranemgbole, me ɛvealeka wɔ me anwongyelelɛ mekɛ nu. Maanle maanle vi maanle ti nee maanle bo bariandi araze wɔ kɛ, “Yɛ ze mɔ annyia agyadeɛ kpaziwɔkɛ biala kɛ adalɛ nee ninyɛne mgbane mgbane mɔɔ nvasoɛ ɛnle zolɛ la ala.

²⁰Asoo sonla ɔdaye ɔkola ɔyɛ nyamenle ɔmaa ɔ nwo? Ninyɛne zɛhae mɔ ɛnle nyamenle!”

²¹Na Ɛdɛnkɛma zele kɛ, “Yemɔti bɛnlea, mebamaa maanle maanle kɔsɔɔti anwu me. Mebayɛ ko ɛhye meamaa bɛanwu me tumi nee me anwosesebɛ na bɛanwu kɛ medame, me duma a le Ɛdɛnkɛma.”