Read Nzema Gyɛ 17 Bible Online

Gyɛ 17 - Nzema bible

Gyɛ 17

¹Ɛdɛnkɛma se, “Bɛva bulalɛ pɛne a bɛhɛlɛ Dwudama ɛtane mɔɔ bɛyɛ la a. Bɛva pɛne mɔɔ ati le daemɔn la bɛhɛlɛ bɛ ɛtane ne mɔ wɔ bɛ ahonle nwo na bɛhɛlɛ bɛgua bɛ azukponle ne mɔ abati kpokpɔkoo ne mɔ azo.

²Bɛ bo zo amra sonle bozonle raalɛ Ahyela wɔ azukponle mɔɔ bɛhyehyɛ wɔ baka buzuu biala abo la azo,

³wɔ awoka mgbole nee ngyikyi ne mɔ azo wɔ kpɔkɛ nu. Mebamaa bɛ kpɔvolɛma arave bɛ ezukoa nee bɛ nwo ninyɛne wɔ bɛ ɛtane mɔɔ bɛyɛ ye azɛlɛ ne azo la ati.

⁴Azɛlɛ ne mɔɔ menvale memanle bɛ la bavi bɛ sa, na meamaa bɛazonle bɛ kpɔvolɛma wɔ azɛlɛ mɔɔ bɛnze zolɛ fee la azo, ɔboalekɛ mame, saa mefa ɛya a ɔle senle; ɔsɔ a ɔnnu ɛlɛ.”

⁵Ɛdɛnkɛma se: “Munzule ɛha sonla ne mɔɔ fa ɔ rɛle wula sonla nu, ɔkpo me na ɔfa ɔ rɛle ɔwula sonla anwosesebɛ nu la.

⁶Ɔle kɛ ɛsɛlɛ zo aziakɛ mɔɔ fifi fienemgbole nu azɛlɛ resee mɔɔ ngyenle wɔ nu na sonla ɛnle zo la. Debie kpalɛ biala ɛnvinde ye.

⁷“Nyilalɛ ɛha sonla ne mɔɔ kɛva ɔ rɛle kɛwula medame Ɛdɛnkɛma me nu la.

⁸ Ɔle kɛ baka mɔɔ gyi azule nloa, ye ndinli dwu azule ne anu, ɔnzulo wawaa mekɛ, dahuu ye nya le duhuduhu, ezule ɛndɔ na azɛlɛ nwo we a ɔndwenle nwo, ɔluakɛ ɔso mekɛ biala.

⁹“Ahonle le mɛlɛbɛla tɛla debie biala, yezɛkye yebo zolɛ; nwane a kɛhola kɛde ɔ bo a?

¹⁰ Medame Ɛdɛnkɛma a meneɛnlea sonla adwenle nu na meneɛnlea ye ahonle nu a. Meboa awie biala, kɛmɔ ye ndenle ne mɔ de la, kɛmɔ ye nyɛleɛ ne si kɔ ye la.”

¹¹Sonla mɔɔ kpondɛ ezukoa amile nu la le kɛ anloma mɔɔ bobɔ aholonvia mɔɔ tɛ ye a ɔdole la; ɔndwu mgbanyifoa ɛnee yevi ɔ sa, ye awieleɛ nu ɛnee yeyɛ koasea.

¹²Yɛ Ɛzonlenlɛ Sua ne le kɛ anyunlunyia belemgbunli ebia, ɔbɔ ɔ bo la ɔgyi boka kpole zo.

¹³O Ɛdɛnkɛma, Yizilayɛma anyelazo, awie biala mɔɔ kpo wɔ la anyunlu gua aze; bɛdabɛ mɔɔ bɛkakyi bɛ nzi bɛsi wɔ la abo zo baminli, kɛ asɛɛ bɛhɛlɛ bɛ aluma wɔ munlutu nu, ɔluakɛ bɛkpo wɔmɔ Ɛdɛnkɛma mɔɔ ɛle ngoane nzufeanvea la.

¹⁴O Ɛdɛnkɛma, yɛ me ayile, na me nwo baza; die me, na mebanyia ngoane. Wɔmɔ a ɔwɔ kɛ meye wɔ ayɛlɛ a.

¹⁵Nea, menli ne ka kile me kɛ, “Ɛdɛnkɛma edwɛkɛ ne wɔ nienwu? Ɔva ɔrɛla ɛ!”

¹⁶Ɛdawɔ ɛze kɛ metɛkpole kɛ menrɛyɛ mboaneneavolɛ wɔ wɔ gyima nu. Edwɛkɛ biala mɔɔ vi me nloa anu vindele la vi wɔ ɛkɛ.

¹⁷Mmaka me ɛzulolɛ, ɔluakɛ wɔmɔ yɛɛ ɛle me ɛvealeka wɔ me ngyegyelɛ mekɛ nu a.

¹⁸Maa menli mɔɔ yɛ me kpɔdekpɔde la anyunlu ɛgua aze, na mmamaa me nyunlu gua aze. Maa bɛ ahonle ɛdu, na mmamaa me ahonle tu. Maa munzule ɛdo bɛ na bɔ bɛ bo zo fane nwiɔ.

¹⁹Ɛdɛnkɛma zele me kɛ, “Kɔgyinla Bɛngyaman Anlenkɛ Kpole ne anloa, ɛleka mɔɔ Dwuda arelemgbunli pe wolo Gyɛlusalɛm na eza bɛpe bɛfinde la, nee Gyɛlusalɛm nlenkɛ mgbole ne mɔ anloa na bɔ nolo kɛ:

²⁰Dwuda arelemgbunli nee bɛ ezuavolɛ, Gyɛlusalɛmma amuala mɔɔ dua nlenkɛ mgbole ɛhye mɔ anu kɔ suakpole ne azo la, bɛdie edwɛkɛ mɔɔ Ɛdɛnkɛma ɛlɛka la.

²¹ Ɔse: Saa bɛkpondɛ bɛ ngoane a ɛnee bɛmmafa bɔlɛ bɛsie bɛ ti zo wɔ Ɛnwomenlelielɛ Kenle ne. Bɛmmasoa debie biala bɛba Gyɛlusalɛm.

²² Bɛmmasoa debie bɛfi azua nu bɛfinde, yɛɛ bɛmmayɛ gyima biala, na bɛzie Ɛnwomenlelielɛ Kenle ne nwuanzanwuanza, kɛmɔ menzele bɛ ze mɔ la.

²³Noko bɛ ze mɔ andie me ne, bɛampili me. Bɛyɛle anzosesebɛ, amaa bɛandie edwɛkɛ biala na yeayɛ ngilehilelɛ.

²⁴“Na saa bɛtie medame Ɛdɛnkɛma me ne, na bɛanzoa bɔlɛ bɛamba Gyɛlusalɛm, bɛanyɛ gyima biala wɔ Ɛnwomenlelielɛ Kenle ne, na bɛsie kenle ne nwuanzanwuanza na bɛanyɛ gyima a,

²⁵yemɔ menli ɛnrɛkpa suakpole ye azo ɛlɛ. Bɛ arelemgbunli badɛnla ehwili nu nee mgbɔnwɔ zo, bɛmɛ yɛɛ bɛ mgbanyima banyia tumi, kɛmɔ Belemgbunli Devidi nyianle la.

²⁶Na menli bava ɛyelalɛ azubɔdeɛ nee azubɔlɛ, ma azubɔdeɛ, ɛyɛlɛ evuanlɛ, yɛɛ moyɛlɛ azubɔdeɛ vi Dwuda maanzinli nu azuamgbole ne mɔ, nee azua mɔɔ ɛbɔ Gyɛlusalɛm ɛyia Bɛngyaman maanzinli nu, adɔleɛ awoka ngyikyi ne mɔ azo, awoka mgbole ne mɔ azo yɛɛ Dwuda nyiakɛ arɛlɛ Ɛdɛnkɛma.

²⁷Na saa bɛandie me, bɛanzie Ɛnwomenlelielɛ Kenle ne nwuanzanwuanza, na awie biala soa bɔlɛ ba Gyɛlusalɛm a, mebado senle wɔ suakpole ne nlenkɛ mgbole ne mɔ anu, ɔbayela Gyɛlusalɛm azua ne mɔ bɔkɔɔ, na bɛnrɛhola ye nua.”